ކުރިޔަށް އޮތް ރިޔާސީ އިންތިޚާބަށް މިހާރު ބާކީ އޮތީ އެންމެ ދެމަސް ދުވަހެވެ. އަދި އިންތިޚާބުގައި ވާދަކުރުމަށް ބޭނުންވާ ކެނޑިޑޭޓުން އިލެކްޝަންސް ކޮމިޝަނަށް އެޕްލިކޭޝަން ހުށަހެޅުމަށް ކުރިޔަށް އެންމެ 25 ދުވަސް ބާކީ އޮތްއިރު، އީދު ބަންދަށްފަހު އެކަށީގެންވާ ގޮތެއްގައި ރިޔާސީ ކެމްޕޭންތައް ފެށުމަށް ޕާޓީތަކަށް މަޖުބޫރު ވެގެންދާނެއެވެ.

އޭގެ އެއް ސަބަބަކީ، ރިޔާސީ އިންތިޚާބަށް ވާވައުދުތައް ރައްޔިތުންނަށް ވިއްކުމަށް ރާއްޖޭގެ ހުރިހާ ރަށަކަށް ކެނޑިޑޭޓުން ދަތުރު ކުރައްވަން ޖެހިވަޑައިގަންނަވާއިރު، ޖުލައިމަސް ފެށިގެން ދިއުމަށްފަހު ބާކީ ރިޔާސީ އިންތިޚާބަށް އޮންނާނީ އެންމެ ދެމަސް ދުވަސްކަމަށް ވުމާއެކުއެވެ.

މިގޮތުން ކުރިޔަށް އޮތް ރިޔާސީ އިންތިޚާބުގައި ވާދަ ކުރައްވާނޭކަން މިހާތަނަށް 4 ސިޔާސީ ޕާޓީއަކުންނާއި، މިނިވަން ކެނޑިޑޭޓުންގެ ގޮތުގައި ވާދަކުރައްވާނޭކަން 3 ފަރާތަކުން އިއުލާން ކުރައްވާފައިވިނަމަވެސް، އޭގެ ތެރޭގައި ހިމެނޭ އިދިކޮޅު އެންމެ ބޮޑު ޕާޓީގެ ކެނޑިޑޭޓް، ކުރީގެ ރައީސް ޔާމިން އަދިވެސް އޮންނެވީ ޖަލުގައިކަން މި ފުރުސަތުގައި ފާހަގަ ކޮށްލާން ޖެހެއެވެ.

އެހެންނަމަވެސް ގިނަ ބަޔަކު އަދިވެސް ގަބޫލުކުރާ ގޮތުގައި ސަރުކާރު ހިންގާ ޕާޓީ، އެމްޑީޕީއަށް އަދިވެސް އެކަށީގެންވާ ވަރުގެ "ޗެލެންޖެއް" ކުރުމުގެ ގާބިލްކަން، އާންމު ރައްޔިތުންގެ ތާއީދު އޮތް މިންވަރަށް ބަލާއިރު އަދިވެސް އޮތީ އިދިކޮޅު ޕީޕީއެމްއަށެވެ. އޭގެ އެއް ސަބަބަކީ، ކުރިޔަށް އޮތް ރިޔާސީ އިންތިޚާބުގައި ވާދަކުރާނޭކަން އިއުލާންކޮށްފައިވާ، ސަރުކާރާ މިހާރު ޚިޔާލު ތަފާތުވެފައިވާ، މަހުޖަނު ގާސިމް އިބުރާހިމްގެ ޖުމުހޫރީ ޕާޓީން ކުރިޔަށް އޮތް ރިޔާސީ އިންތިޚާބަށް އަމާޒުކޮށް މިހާތަނަށްވެސް އެއްވެސް އުފެއްދުންތެރި މަސައްކަތްތަކެއް ކޮށްފައި ނުވާތީވެސްމެއެވެ.

އަދި އޭގެ އިތުރަށް، އެމްޑީޕީއާއި ޚިޔާލު ތަފާތުވެގެން، އެޕާޓީއާއި ވަކިވެ، އާ ސިޔާސީ ޕާޓީއެއް އުފެއްދުމަށް މަސައްކަތް ކުރަމުންދާ، "ދަ ޑިމޮކްރެޓްސް" ޕާޓީއަށް އެޕާޓީގެ ސިޔާސީ ހަރަކާތްތައް އިތުރު އެހެން މަރުހަލާއަކަށް ގެންދެވިދާނެކަމަށް ގިނަބަޔަކަށް ގަބޫނުކުރެވޭތީވެސްމެއެވެ.

އިދިކޮޅު ޕީޕީއެމް އަދިވެސް ކަސްތޮޅުގައި، އަމާޒެއް ނެތިފައި!

ކުރިޔަށް އޮތް ރިޔާސީ އިންތިޚާބު 2 މަހެއްހާ ދުވަހަށް ގާތްވެފައިވާއިރު، ރައީސް ސާލިހަށް ގޮންޖެހުމެއް ކުރިމަތި ކުރެވޭ ވަރުގެ ހަމައެކަނި ޕާޓީއެއްގެ ގޮތުގައި ގިނަ ބަޔަކު އަދިވެސް ސިފަކުރަމުންދަނީ ހަމައެކަނި އިދިކޮޅު ޕީޕީއެމްއެވެ.

ހަމައެއާއެކު ފާހަގަ ކޮށްލާންޖެހޭ އެންމެ މުހިންމު ނުކުތާއަކީ އެޕާޓީގެ "ބަދަލުވުމެއް ނެތް" ހާލަތެވެ. ރާއްޖޭގެ ސިޔާސީ ޕާޓީތަކުގެ ތެރެއިން އެންމެ ފުރަތަމަ ރިޔާސީ ޓިކެޓް ހަވާލުކުރި ޕާޓީއަކީ އިދިކޮޅު ޕީޕީއެމްކަމުގިވާއިރި، ރިޔާސީ އިންތިޚާބަށް އަމާޒުކޮށް އެންމެ ފުރަތަމަ ކެމްޕޭން ފެށި ޕާޓީއަކީވެސް އެޕާޓީއެވެ. އެހެންނަމަވެސް، ރިޔާސީ ޓިކެޓާއި ހަވާލުވުމަށްފަހު، ޕާޓީގެ ރިޔާސީ ކެނޑިޑޭޓަށް ކެމްޕޭން ދަތުރުތައް ކުރެއްވޭވަރުވީ މަދު ރަށްތަކަކަށެވެ.

ފާއިތުވި އަހަރުގެ ޑިސެމްބަރުމަހު، ކޮރަޕްޝަނާއި ޚިޔާނާތުގެ ދައުވާ ސާބިތުވެ، ކުރިމިނަލް ކޯޓުން ކުރި 11 އަހަރުގެ ޖަލު ހުކުމާއެކު، ޕީޕީއެމްގެ ރިޔާސީ ކެނޑިޑޭޓަށް ވަޑައިގަންނަވަން ޖެހިވަޑައިގަތީ ޖަލު ހުކުމް ތަންފީޒު ކުރައްވަން ޖަލަށެވެ.

އެއަށްފަހު، ރައީސް ޔާމިން މިނިވަންކުރުމަށް އިދިކޮޅު ޕީޕީއެމްއިން މަގުމަތީ ހަރަކާތްތައް ހިންގަމުން އައިނަމަވެސް، ރިޔާސީ އިންތިޚާބަށް އަމާޒުކޮށް އެޕާޓީއަށް އުފެއްދުންތެރި އެއްވެސް މަސައްކަތެއް ކުރެވިފައި ނުވާކަމީ ވަރަށްވެސް ސާފުކޮށް ފެންނާން އޮތް ހަގީގަތަކެވެ.

ޕާޓީގެ ރިޔާސީ ކެނޑިޑޭޓަށް ޖަލުގައި އޮންނަވަން ޖެހިވަޑައިގެން، ޝަރީއަތްތައް މިހާރުވެސް ކުރިޔަށްދާ މިސްރާބާއި ސްޕީޑަށް ބަލާއިރުވެސް، ރައީސް ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަ ކުރެއްވޭނެކަމުގެ އުއްމީދު އިންތިހާއަށް ފަނޑުކޮށް އޮތްނަނަމަވެސް، އެޕާޓީގެ އެއްވެސް މެމްބަރަކަށް އެހެން ކެނޑިޑޭޓެއްގެ ވާހަކަ ދެއްކުމުގެ އެއްވެސް ފުރުސަތެއް، އެކަމުގެ ހުއްދައެއްވެސް ނެތެވެ.

އެއާއެކު ޕާޓީގެ އާންމު މެމްބަރުންނަށް އަންނަމުންދާ މާޔޫސްކަމަށް ތަސައްލީއެއް ހޯދުމަށް އަމާޒުކޮށް، ޕާޓީގެ ރިޔާސީ ކެމްޕޭން ފަށާނެކަމަށް އެތައް ފަހަރެއްގެމަތިން އިއުލާން ކޮށްފައިވެއެވެ. މިގޮތުން ފާއިތުވި ރޯދަމަހަށްފަހު ރިޔާސީ ކެމްޕޭން ފަށާނޭކަން އިއުލާންކޮށް، އެއަށްފަހު އޭގެ ފަހަށް 3 މަސް ފާއިތުވެގެން ދިޔައިރުވެސް ޕީޕީއެމްއަށް ރަށްރަށަށް އެޕާޓީގެ ދަތުރުތައް ފެށިފައެއް ނުވެއެވެ.

އެއަށްފަހު މިހިނގާ ޖޫންމަހުގެ މެދުތެރޭގައިވެސް ކެމްޕޭން ދަތުރުތައް ރަށްރަށަށް ފަށާނޭކަން ޕާޓީގެ ލީޑަރޝިޕުގެ ބޭފުޅުން އިއުލާން ކުރިނަމަވެސް އެ ދަތުރުތަކެއްވެސް ޕާޓީއަށް ފެށިފައެއް ނުވެއެވެ. އޭގެފަހުން ކެމްޕޭން މެނޭޖަރުން ޕާޓީގެ ފަރާތުން ހަމަޖައްސާ، އަނެއްކާވެސް، މިހާރު ކުރިޔަށްދާ އީދު ބަންދަށްފަހު ކެމްޕޭން ދަތުރުތައް ފަށާނޭކަން ޕާޓީގެ ފަރާތުން އަނެއްކާވެސް ވަނީ އިއުލާން ކޮށްފައެވެ.

އެހެންނަމަވެސް، ހުރި ގޮންޖެހުންތަކަށް ބަލާއިރު މިއީވެސް، ޕާޓީގެ މެމްބަރުންގެ އުދާސްތަކަށް ވަގުތީ ތަސައްލީއެއް ހޯދާދިނުމުގެ މަގުސަދުގައި އެކަނި ޕާޓީގެ ލީޑަރޝިޕުން އާންމު ކޮށްފައިވާ މައުލޫމާތެއްކަމުގައި ގިނަބަޔަލު ދަނީ ގަބޫލުކުރަމުންނެވެ.

ރައިސް ޔާމިންގެ އެކައުންޓުގައި 100 މިލިއަން ރުފިޔާ! ނަމަވެސް ފައިސާ ނެތިގެން ޕީޕީއެމްއަށް ރިޔާސީ ކެމްޕޭން ނުފެށިފައި!

އިދިކޮޅު ޕީޕީއެމްއިން ރިޔާސީ ކެމްޕޭންގެ ކެމްޕޭން މެނޭޖަރަކު އައްޔަންކޮށް، އަދި ރިޔާސީ ކެމްޕޭން ފެށުމަށް ތަކުރާރުކޮށް، ހަދާފައިވާ ޕްލޭންތައް އާންމުކޮށްފައިވި ނަމަވެސް، އެޕާޓީއަށް ރިޔާސީ އިންތިޚާބުގެ ކެމްޕޭން ފެށިފައި ނުވާ ހަގީގީ ސަބަބަކީ ފައިސާގެ ދަތިކަން ކަމުގައި ޕާޓީގެ އިސްބޭފުޅުން "އޮފް ދަ ރެކޯޑުގައި" ގެންދަވަނީ ވިދާޅުވަމުންނެވެ.

ޕާޓީގެ އިސްބޭފުޅުންގެ މި ވާހަކަތަކަށް ދަލީލުކޮށްދޭ އެއް ހެއްކަކަކީވެސް، އިދިކޮޅު އެންމެ ބޮޑު ސިޔާސީ ޕާޓީގެ ގޮތުގައި އޮވެމެ، އެޕާޓީން މިހާތަނަށް ރިޔާސީ އިންތިޚާބަށް އަމާޒުކޮށް އުފެއްދުންތެރި އެއްވެސް މަސައްކަތެއް ކޮށްފައި ނުވުމެވެ. ޕާޓީގެ ފަރާތުން ކުޑަމިނުން ރަށްރަށުގައި ގާއިމްވެފައިވާ ސްޓިއަރިން ކޮމިޓީތަކާވެސް ބައްދަލުކުރުމަށް ދަތުރުތަކެއްހާ މިންވަރުވެސް ކުރަމުން ނުދާތީއެވެ.

އުޒުރެއްކަމުގައި ޕާޓީގެ ލީޑަރޝިޕުން ދައްކަވާފައިވަނީ ޕާޓީއަށް ކުރިމަތިވެފައިވާ ފައިސާގެ ދަތިކަމެވެ.

އެހެންނަމަވެސް، ރައީސް ޔާމިންގެ މައްޗަށް ކުރިމިނަލް ކޯޓުން އެންމެ ފުރަތަމަ އުފުލި ދައުވާއާއި ގުޅޭގޮތުން ފުލުހުންގެ މުވައްސަސާއިން ހިންގި ތަހުގީގަށްފަހު ފުލުހުން އާންމު ކޮށްފައިވާ މައުލޫމާތުތަކުން އެނގޭ ގޮތުގައި، ވެރިކަން ނިމިގެން ދިޔައިރު، ރައީސް ޔާމިންގެ އަމިއްލަފުޅު އެކައުންޓަށް 100 މިލިއަނަށްވުރެ ގިނަ ފުރިޔާ ޖަމާކޮށްފައި ހުއްޓެވެ. އެއީ އެނގި، ފެންނާން ހުރި މިންވަރު އެކަންޏެވެ.

އަދި ފުރަތަމަ ހިންގުނު ތަހުގީގަށްފަހު އެފައިސާ ކޯޓުގެ އަމުރަށް "ފްރީޒް" ކުރިނަމަވެސް، އިސްތިއުނާފްގެ މަރުހަލާތަކުން ފަހުންވަނީ އެފައިސާ "އަން ފްރީޒް" ކޮށްފައެވެ.

އެއަށްފަހު، ފާއިތުވި ހުރިހާ ޝަރީއަތެއްގައިވެސް ކޯޓުގައި ވާހަކަ ދައްކަވަމުން ޔާމިން ސާބިތުކޮށް ދިނުމަށް މަސައްކަތް ކުރައްވާފައިވަނީ އެއީ އެމަނިކުފާނުގެ ސިޔާސީ ހަރަކާތްތަކަށް ބޭރުގެ ފަރާތްތަކުން ވެދީފައިވާ އެހީތެރިކަމުގެ ގޮތުގައެވެ.

އެހެންނަމަވެސް، މިފައިސާ ރައީސް ޔާމިންގެ އެކައުންޓުގައި ހުރެމެ، އެމަނިކްފާނުގެ ރިޔާސީ ކެމްޕޭނަށް ފައިސާ ހޯދުމަށް ޕީޕީއެމްގެ ލީޑަރޝިޕްގެ ބައެއް ބޭފުޅުން މުއްސަދި މަހުޖަނުންގެ އަރިހަށް ފައިސާގެ އެހީތެރިކަން ހޯއްދެވުމަށް ވަޑައިގެންފައިވާކަމަށް "ޚަބަރު އޮންލައިން"އާ ވާހަކަދެއްކި، ޕީޕީއެމްގެ އިސް ބައެއް ފަރާތްކުން ވިދާޅުވެފައި ވެއެވެ.

އެބޭފުޅުން ވިދާޅުވަނީ ކެނޑިޑޭޓަކު ދެއްކުމަށް. ރައީސް ޔާމިން ޖަލުގައި އޮންނަވައިގެން، އެމަނިކުފާނަކީ ރިޔާސީ ކެނޑިޑޭޓެއްގެ ގޮތުގައި އެބޭފުޅުން ގަބޫލެއް ނުކުރައްވާ. ވިދާޅުވަނީ ފައިސާގެ އެހީތެރިކަމަށް އެދެންވާނީ ކެނޑިޑޭޓަކު ދެއްކުމަށްފަހު ކަމަށް.

އިދިކޮޅު ޕީޕީއެމްގެ އިސް ބައެއް ބޭފުޅުން ކެމްޕޭނަށް ފައިސާ ހޯދުމަށް މިހާތަނަށް ކޮށްފައިވާ ބައެއް މަސައްކަތްތަކަށް އިޝާރާތް ކުރައްވަމުން، "ޚަބަރު އޮންލައިން" އާއި ވާހަކަ ދެއްކެވި ޕީޕީއެމްގެ އިސް ބޭފުޅަކު ވިދާޅުވިއެވެ.

ކޮންމެއަކަށް އިދިކޮޅު ޕީޕީއެމްއިން ފެންނާން އޮތީ، ރިޔާސީ އިންތިޚާބަށް އެންމެ 2 މަހަށް ވެގެންދިޔަ ނަމަވެސް، ޕާޓީގެ މެމްބަރުނަށް މާޔޫސްކަމާއި މޮޅިވެރިކަމެވެ.

ޕާޓީގެ ރިޔާސީ ކެނޑިޑޭޓަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެއްވުނުނަމަވެސް، އެޕާޓީގެ އެހެން ކެނޑިޑޭޓަކަށް ފުރުސަތު ދެއްވާކަށް ރައީސް ޔާމިން ބޭނުންފުޅެއް ނުވެއެވެ. ޕާޓީއަށް ޚަރަދު ކުރައްވާކަށްވެސް ބޭނުންފުޅެއް ނުމެވޭމެއެވެ. އެކައުންޓުގައި ހުރި 100 މިލިއަނަށްވުރެ ގިނައި ދިވެހި ރުފިޔާއަކީ ސިޔާސީ ހަރަރާކަތަކަށް އެކި ފަރާތްތަކުން ދީފައިވާ އެހީކަމުގައި އަމިއްލަފުޅަށް ވިދާޅުވިއެއްކަމަކު، ހުންނެވީ އެފައިސާ ޕާޓީއަށް ޚަރަދު ކުރައްވާކަށްވެސް ނުމެ ނޫންމެއެވެ.

ހުންނެވީ ހުރިހާ ގޮތަކުންވެސް ޕާޓީގައި ކަސްތޮޅު އަޅުއްވައިގެންނެވެ.