ކޮރަޕްޝަންގެ ކުށްތަކަކީ ޖިނާއީ އިޖުރާއަތުގެ ޤާނޫނުގައި ބޮޑެތި ކުށްތަކުގައި ގޮތުގައި ކަނޑައަޅާފައިވާ ކުށްތަކަކަށްވާއިރު، އެފަދަ ކުށްތަކަކީ އޯގާތެރި ކުށްތަކަކަށް ނެހެދޭނެކަމަށް ކުރީގެ ކްރިމިނަލް ކޯޓުގެ ކުރީގެ ގާޒީ އަހުމަދު ހައިލަމް ވިދާޅުވެއްޖެއެވެ.
ހައިލަމް މިހެން ވިދާޅުވީ ރ. ދުވާފަރު ކައުންސިލްގެ އެތައް މިލިއަން ރުފިޔާއެއްގެ ފައިސާ ނަހަމަ ގޮތުގައި ބޭނުންކުރި މައްސަލައިގައި، ދައުވާކުރުމުގެ ބަދަލުގައި، ނަސޭހަތުގެ އެއްބަސްވުމެއް ޕްރޮސެކިއުޓާ ޖެނެރަލް އޮފީހުން ހެދުމާއި ގުޅިގެން ކުރެއްވި ޓުވީޓުގައެވެ. ހައިލަމް ވަނީ މިމައްސަލާގައި ދައުވާ ކުރަން ޕީޖީ ބޭނުން ނުވީ މިމައްސަލާގައި ކޮމިޝަނާ އޮފް ޕްރިޒަންސް (ސީޕީ) އަހުމަދު މުހައްމަދު ފުޅުގެ ބައްޕަ ހިމާޔަތްކުރަން ބޭނުންވާތީކަމަށް ތުހުމަތު ކުރައްވާފައެވެ.
ޕީޖީ އޮފީހުން މިމައްސަލާގައި ދައުވާ ނުކުރަން ނިންމި ނިންމުމާއި ގުޅޭގޮތުން ހައިލަމް ވިދާޅުވީ ދުވާފަރު މައްސަލާގައި ހިމެނޭ ފަރާތްތަކުގެ މައްޗަށް ތުހުމަތުކުރެވޭ ކުށްތަކަކީ (ނާޖާއިޒު ފައިދާ ހޯދައިދިނުމުގެ ކުށާއި، ދައުލަތުގެ ފައިސާއަށް ޚިޔާނާތްތެރިވުމުގެ ކުށާއި، ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރުމުގެ ކުށް) ކޮރަޕްޝަންގެ ކުށްތަކެއްކަމަށެވެ. ޖިނާއީ އިޖުރާއަތުގެ ޤާނޫނުގެ 22 ވަނަ މާއްދާގައި ބަޔާންކުރަނީ ކޮރަޕްޝަންގެ ކުށްތަކަކީ ޖިނާއި ބޮޑެތި ކުށްތަކެއްކަމަށް ހައިލަމް ވިދާޅުވިއެވެ.
މި މައްސަލާގައި ތުހުމަތުކުރެވޭ ކުށްތަކުގެ ތެރެއިން، ދައުލަތުގެ ފައިސާއަށް ޚިޔާނާތްތެރިވުމާއި، ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރުން ކުށެއްގެ ގޮތުގައި ކަނޑައެޅިގެންދިޔައީ، ފޮނަދޫ ދާއިރާގެ މެންބަރު ޤާނޫނުލްޢުޤޫބާތަށް ހުށަހެޅުއްވި 4 ވަނަ އިޞްލާޙުންކަން، ހާމަވާކަމަށް ހައިލަމް ވިދާޅުވިއެވެ.
އިޞްލާޙު ހުށަހަޅުއްވަމުން މޫސާ ސިރާޖު ވިދާޅުވެފައިވަނީ "ވަރަށް ބޮޑަށް އަޅުގަނޑުމެންނަށް ފާހަގަކުރެވޭ ކަމެއް، ދައުލަތުގެ މަޤާމުތަކުގައި ތިބެ މިފަދަ ނުފޫޒުން ކަންކަން ހިންގައި، އެމީހާއަށް ނުޙައްޤުން ކަންކަން ހޯދުމަކީ ހަމަ ހިތާމަޔާ އެއްކޮށް ފާހަގަކުރަންޖެހެނީ ދިވެހިރާއްޖޭގައި ވަރަށް އާންމުކަމެއްކަމަށް. އެކަމަކީ ހުއްޓަންޖެހޭ ހުއްޓުވަންޖެހޭ ކަމެއް ކަމުގައި އަޅުގަނޑު ހަމަ ޤަބޫލުކުރަން" ކަމަށެވެ.
މީގެ އިތުރުން ތުހުމަތުކުރެވޭ ޢަމަލުތައް ކުށަކަށް ހެދުމަށް ޤާނޫނަށް ހުށަހެޅުނު އިޞްލާޙަށް ތާއީދުކުރައްވަމުން މާފަންނު މެދު ދާއިރާގެ މެންބަރު ވިދާޅުވެފައިވަނީ "ދިވެހިރާއްޖޭގެ ޤާނޫނުލްޢުޤޫބާތަށް ގެނެވޭ އިޞްލާޙުގެ ސަބަބުން ނަތީޖާއެއް ނެރެވޭނީ ހަމައެކަނި ގާނޫނަކުން އަޅުގަނޑު ހިއެއްނުވޭ ނެރެވޭނެހެނެއް. ހަމަ މި ގާނޫނާ އެއްކޮށް ޕްރޮސިކިއުޓަރ ޖެނެރަލް އޮފީސް ވެސް އަދި ޕްރޮސިކިއުޓަރ ޖެނެރަލް އޮފީހުގައި ތިއްބަވާ ކުދިން ވެސް އެބަޖެހޭ ތަމްރީނުތައް ހޯދަން." ކަމަށެވެ.
ހައިލަމް ވިދާޅުވީ އެކުށަކީ އޭގެ ޒާތުން ބޮޑުކުށެއް ކަމުގައި ނުވިނަމަވެސް އެކުށް ކުރުން ޢާންމުވެފައިވާނަމަ، ނަސޭހަތުގެ އެއްބަސްވުން ހަދައިގެން ނުވާނެކަމަށް އިޖުރާއަތުގެ ޤާނޫނުގެ 99 ވަނަ މާއްދާގެ (ށ)ގެ 12 ވަނަ ނަންބަރުގައި ބަޔާންކޮށްފައިވާއިރު، އަދި ޢާންމުވެފައިވާ ކޮރަޕްޝަންގެ ޢަމަލުތައް ހުއްޓުވުމަށްޓަކައި ރައްޔިތުންގެ މަޖިލިހުން ކުށެއްގެ ގޮތުގައި ކަނޑައެޅުއްވި ކުށްތަކެއްގައި ނަސޭހަތް ދެއްވީ ޤާނޫނާ ޚިލާފަށްކަން ހާމަވާކަމަށެވެ.
ނަސޭހަތްދެވޭ ކުށަކީ، 1 އަހަރު ދުވަހުގެ ޖަލު އަދަބަށްވުރެ ކުޑަ އަދަބެއް ކަނޑައެޅިފައިވާ ކުށެއްގައިކަން އިޖުރާއަތުގެ ޤާނޫނުގެ 98 ވަނަ މާއްދާގައި ކަޅާހުދުން ބަޔާންކޮށްފައި އޮތްއިރު، 1 އަހަރު ތިމަންނާ ގުނާނީ، އަދަބުގެ މިންވަރު ބަޔާންކުރާ ތާވަލުގެ އެންމެފުލުގައި އޮންނަ އަދަބަށް ބަލައިގެން ކަމަށް ވިދާޅުވަނީ އެއްވެސް ޤާނޫނީ އަސާސަކަށް ބިނާކޮށްގެން ނޫންކަމަށް ހައިލަމް ވިދާޅުވިއެވެ.
ދިވެހިރައްޔިތުން ޤަބޫލުކުރަންޖެހޭ ޙަޤީޤަތަކީ މިހާރުގެ ޕީޖީއަކީ، ދިވެހި ތާރީޚުގައި މިހާތަނަށް ހިނގާދިޔަ ކޮރަޕްޝަންގެ އެންމެ ބޮޑު މައްސަލާގައި 150 ދަޢުވާކޮށް 800 އަހަރަށް ޖަލަށް ލެވެން އޮތްއިރު ވެސް، 7 ދަޢުވާކޮށް 20 އަހަރުގެ ޙުކުމަކަށް އެއްބަސްވުމެއް ހެދި މީހެއްކަމަށް ހައިލަމް ވިދާޅުވިއެވެ.
ހައިލަމް ވިދާޅުވީ އަވަސް އަރުވާލައިގެން ނޫސްތަކަށް ލިންކު ފޮނުއްވައިގެން ހަބަރުތަކުގައި ތިމަންނާ އިސްކުރީ "އޯގާތެރިކަމޭ" ބުނިކަމުގައި ވިޔަސް، ފެނުނީ މަނިކުފާނުގެ ވިސްނުންކޮށިކަމުގެ ސަބަބުން ގަމާރުކަން އިސްކުރިތަން ކަމަށެވެ. ސަރުކާރުގެ މަޤާމުތަކުގައި ތިބި ބައެއްގެ ނުފޫޒުގައި ޖެހިގެން ވަކި ބަޔަކަށް ނުޙައްޤު މަންފާ ހޯދައިދީ، ޤާނޫނުއަސާސީގެ 20 ވަނަ މާއްދާއިން ރައްޔިތުންނަށް ކަށަވަރުކޮށްދީފައިވާ ހަމަހަމަކަމަށް އަރައިގަނެ ޤާނޫނުއަސާސީގެ 220 ވަނަ މާއްދާއާ ބޮޑުތަނުން ޚިލާފުވިތަން ކަމަށް ހައިލަމް ވިދާޅުވިއެވެ.
