އިދިކޮޅު ޕްރިގްރެސިވް ކޯލިޝަނާއި، ރައީސް ނަޝީދު އިސްކޮށް ހުންވައިގެން އުފައްދަވާ ދަ ޑިމްކޮރެޓްސް އިން ގުޅިގެން ބާއްވާ ސިޔާސީ ފުރަތަމަ ހަރަކާތް އަންނަ މަހު ތިން ވަނަ ދުވަހު ބޭއްވުމަށް ހަމަޖެހިއްޖެއެވެ.
ދަ ޑިމޮކްރެޓްސްއާއި ޕީޕީއެމްއިން މިއަދު ޕީޕީއެމްގެ އޮފީހުގައި ބޭއްވި މަޝްވަރާ ބައްދަލުވުމަށްފަހު ނޫސްވެރިންނާއި ވާހަކަ ދައްކަވަމުން މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވީ އަންނަ މަހުގެ 3 ވަނަ ދުވަހު ކަންމަތީ ބޮޑު ބައްދަލުވުމެއް ބާއްވާން ނިންމާފައިވާކަމަށެވެ. މިބައްދަލުވުމުގައި ޕީޕީއެމްއާއި، ޑިމޮކްރެޓްސްގެ އިސް ބޭފުޅުން ބައިވެރިވާނެކަމަށް އާޒިމް ވިދާޅުވިއެވެ.
މިބައްދަލުވުމަކީ ޕީޕީއެމްއާއި، އާއިއެކު ދަ ޑިމޮކްރެޓްސް އިން ރިޔާސީ އިންތިޚާބަށް ވަމުންދާ ތައްޔާރީގައި ބާއްވާ ފުރަތަމަ ބައްދަލުވުންކަން ފާހަގަކޮށްލެވެއެވެ. މިބައްދަލުވުމުގަިއ ވާހަކަ ދައްކަވަމުން ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވީ ޑިމޮކްރެޓްސްއަކީ ހަގީގީ އެމްޑީޕީ ކަމަށެވެ. އެބޭފުޅުންނާއި ގުޅިގެން މިކުރާ މަސައްކަތަކީ މިވެރިކަން ބަދަލުކުރަން ކުރަންޖެހޭ މަސައްކަތް ކަމަށް ޝިޔާމް ވިދާޅުވިއެވެ.
ސަރުކާރު ޖަވާބުދާރީކޮށް ބަލިކަށި ކުރުމަށް ކުރަންޖެހޭ މަސައްކަތް އަޅުގަނޑުމެން މިކުރަނީ. މަޖިލީހާއި މަޖިލީހުން ބޭރުގައިވެސް މިމަސައްކަތް އިތުރަށް ބާރަށް ކުރާނެ.
– ޝިޔާމް ވިދާޅުވިއެވެ.
ޝިޔާމް ވިދާޅުވީ ސެޕްޓެމްބަރު މަހު 9 ވަނަ ދުވަހު ރައްޔިތުން އެދޭފަދަ ވެރިކަމެއް މިޤައުމުގައި އޮންނާނެ ކަމަށެވެ. އަދި މިހާރު ޑިމޮކްރެޓްސް އާއިއެެކު ބާއްވާ ފުރަތަމަ ކަންމަތީ ބައްދަލުވުމަށްފަހު އިތުރު ގިނަ ހަރަކާތްތަކެއް ރޭވިގެންދާނެކަމަށެވެ. އަދި އީދަށްފަހު މަޝްވަރާ ބައްދަލުވުންތައް އޮންނާނެކަމަށެވެ.
ކަންމަތީ ބައްދަލުވުން ބާއްވާނެ ވަކި ތަނެއް އަދި ހާމަ ނުކުރި ނަމަވެސް ވަރަށް އަވަހަށް އެކަންވެސް އިއުލާން ކުރާނެކަމަށް ޝިޔާމް ވިދާޅުވިއެވެ.
