ސެޕްޓެމްބަރު މަހުގެ 9 ވަނަ ދުވަހު އޮންނަ ރިިޔާސީ އިންތިޚާބު އެމްޑީޕީގެ ރިޔާސީ ކެނޑިޑޭޓް ރައީސް ޞާލިހު އެއްބުރުން ކާމިޔާބު ކުރައްވާނީ ޙައްޖާޖީންގެ މަތިވެރި ދުޢާއާއި އެކުގައި ކަމަށް ރައީސް ޞާލިހު ވެރިކަމަށް ގެނައުމަށް ބައިއަތު ހިފާފައިވާ އަދާލަތު ޕާޓީގެ ރައީސް އިމްރާން ވިދާޅުވެއްޖެއެވެ.
ރިޔާސީ އިންތިޚާބުގައި ރައީސް ޞާލިހާއިއެކު ބައިއަތު ހިފި ސިޔާސީ ލީޑަރުންގެ ތެރެއިިން ފުރަތަމަ ބޭފުޅަކީ އިމްރާނެވެ. އަދި އިމްރާނަކީ ރައީސް ޞާލިހާއިއެކު މަސައްކަތް ކުރެއްވި ލީޑަރުންގެ ތެރެއިން އެމަނިކުފާނު ދެވަނަ ދައުރަކަށް އިންތިޚާބު ކުރެއްވުމަށް ތާއީދު ކުރެއްވި ހަމައެކަނި ލީޑަރުވެސް މެއެވެ. ދެން ތިއްބެވި ބޭފުޅުންވަނީ ރައީސް ޞާލިހަށް ތާއީދު ނުކުރާނެކަން ހާމަކޮށްފައެވެ.
އިމްރާން ވީދާޅުވީ މިއަހަރުގެ ހައްޖުގެ މަތިވެރި އަޅުކަން އަދާކުރަމުންދާ މީހުން ޙައްޖުގެ އަޅުކަންތައް ފަށާ ދުވަހަކީ މިއަދުކަމަށެވެ. ޙައްޖަށް ވަޑައިގެން މީހުންނެ ދުޢާތަކާއިއެކު މިއަހަރުގެ އިންތިޚާބު ރައީސް ޞާލިހު ކާމިޔާބު ކުރާނީ އެއްބުރުން ކަމަށް އިމްރާން ވިދާޅުވިއެވެ.
މިއަދަކީ މާތް ރަސްކަލާންގެ ހަޒުރަތުގައި ލޮބުވެތިކަން ބޮޑުވެގެންވާ ހައްޖާޖީން ހައްޖުގެ އަޅުކަން ފަށާގަންނަ ދުވަހެވެ. މިއަހަރުގެ އިންތިޚާބު އަޅުގަނޑުމެން އެއްބުރުން ކާމިޔާބު ކުރާނީ ހައްޖަށް ވަޑައިގަންނަވާ އަޅުގަނޑުމެން ލޮބުވެތި އަޚުންނާއި އުޚުތުންގެ މަތިވެރި ދުޢާއާއި އެކުގައެވެ.
– އިމްރާން ވިދާޅުވިއެވެ.
މިއަހަރުގެ ޙައްޖަށް ދިޔަ މީހުންގެ ތެރޭގައި އަދާލަތު ޕާޓީގެ އިލްމުވެރިންގެ މަޖިލީހުގައި ހިމެނޭ ޝައިޚު ޑރ.އިޔާޒާއި، ޝައިޚު އިލްޔާސްވެސް ހިމެނެއެވެ.
ޙައްޖު ކޯރޕަރޭޝަންގެ ޙަވާލުގައި ދިޔަ ޙައްޖުވެރިންގެ އެންމެހާ ކަންކަން ބެލެހެއްޓުމަށްޓަކާ 70 މީހުންގެ ޓީމެއް އެހީތެރިންގެ ގޮތުގައި އަންނަނީ ހަރަކާތްތެރިވަމުންނެވެ. މީގެ ތެރޭގައި ޞިއްޙީ ފަރުވާގެ ކަންކަމަށް ޚާއްސަ ސްޕެޝަލިސްޓް ޑޮކްޓަރަކާއި، 4 ނަރުހުންނާއި، ކައްކާއިންނާއި، ދީނީ ޢިލްމުވެރިންނާއި، އެހީތެރިން ހިމެނެއެވެ.
