އިދިކޮޅު ޕީޕީއެމްއިން ވާދަވެރި ޕާޓީތަކާއެކީ ސިޔާސީ މަޝްވަރާތައް، އެ ޕާޓީގެ ސެނެޓްގެ މަޝްވަރާއާއި ރުހުން ނުހޯދާ ފެށުމާއި ގުޅިގެން ޕާޓީގެ ސެނެޓްގެ ބައެއް މެމްބަރުން ކަންބޮޑުވުން ފާޅުކޮށްފިއެވެ.

ކުރިޔަށް އޮތް ރިޔާސީ އިންތިޚާބުގައި އިދިކޮޅު ޕީޕީއެމްއިން އެޕާޓީގެ ރިޔާސީ ކެނޑިޑޭޓްގެ ގޮތުގައި ކުރީގެ ރައީސް ޔާމިން ވާދަކުރައްވާގޮތަށް ހަމަޖެހިފައިވި ނަމަވެސް، އެޕާޓީންވަނީ ރިޔާސީ އިންތިޚާބަށް އަމާޒުކޮށް، އެކީގައި މަސައްކަތް ކުރުމުގެ މަޝްވަރާތައް، އެމްޑީޕީގެ ކުރީގެ ރައީސް މުހައްމަދު ނަޝީދު އިސްވެ ހުންނަވާ އުފެއްދުމަށް މަސައްކަތް ކުރަމުންދާ "ދަ ޑިމޮކްރެޓްސް" ޕާޓީއާއެކީ ފަށާފައެވެ.

އެހެންނަމަވެސް އެޕާޓީއާއެކީ އިދިކޮޅު ޕީޕީއެމްއިން ރަސްމީކޮށް ސިޔާސީ މަޝްވަރާތައް ފެށިއިރު "ދަ ޑިމޮކްރެޓްސް" އެޕާޓީއަކީ އަދި ރަޖިސްޓްރީވެސްކޮށްފައި ނުވާ ޕާޓީއެއްކަންވެސް ފާހަގަ ކޮށްލެވެއެވެ.

އިދިކޮޅު ޕީޕީއެމްއިން އިއްޔެ، ކުރިޔަށް އޮތް ރިޔާސީ އިންތިޚާބަށް އެކުގައި މަސައްކަތް ކުރެވޭނެ ގޮތްތަކާއި ގުޅޭގޮތުން "ދަ ޑިމޮކްރެޓްސް" ޕާޓީއާއެކީ ސިޔާސީ މަޝްވަރާތައް ފެށިއިރު އެޕާޓީގެ މި މުހިންމު ނިންމުން ސެނެޓްގައި މަޝްވަރާ ކޮށްފައެއް ނުވެއެވެ.

"ޚަބަރު އޮންލައިން" އަށް މައުލޫމާތު ދިން، އިދިކޮޅު ޕީޕީއެމްގެ ސެނެޓްގެ ބައެއް މެމްބަރުން ވިދާޅުވި ގޮތުގައި އެޕާޓީގެ ސިޔާސަތު ރާވާ އެންމެ މުހިންމު އެއް ގުނަވަން ކަމަށްވާ ޕާޓީގެ ސެނެޓްގެ އެއްވެސް މަޝްވަރާއެއް ނެތި، ޕާޓީގެ "ދެތިން މީހެއްގެ ވިސްނުމަށް" އެކަނި މިފަދަ މުހިންމު ނިންމުމެއް ނިންމާ ތަންފީޒު ކުރާން ފެށުމުގެ ކަންބޮޑުވުން ސެނެޓްގެ ވަޓްސްއަޕް ގުރޫޕުގައިވެސް ބައެއް ސެނެޓަރުން ވަނީ ފާޅު ކުރައްވާފައެވެ.

ޕާޓީގެ ސިޔާސަތު ކަނޑައަޅާ އެންމެ މުހިންމު އެއް ގުނަވަނަކީ ޕާޓީގެ ސެނެޓް. އެހެން ސިޔާސީ ޕާޓީތަކާއެކު ސިޔާސީ މަޝްވަރާއަށް ޕާޓީގެ ލީޑަރޝިޕްގައި ހިމެނޭ ދެތިން ބޭފުޅަކު ވަޑައިގެންނެވީ ޕާޓީގެ ސެނެޓްގައި "ހޭ ވެސް" އަހާނުލާ. އެހެންނަމަވެސް ޕާޓީގެ އަސާސީ ގަވާއިދުގައިވާ ގޮތުން، ސެނެޓްގެ މަޝްވަރާނެތި، ޕާޓީގެ ދެތިން މީހަކަށް މިފަދަ ބޮޑެތި ނިންމުންތައް ނުނިންމޭނެ.

އިދިކޮޅު ޕީޕީއެމްގެ ސެނެޓަރަކު "ޚަބަރު އޮންލައިން"އަށް މައުލޫމާތު ދެމުން ވިދާޅުވެފައި ވެއެވެ.

އޭނާ އިތުރަށް ފާހަގަ ކުރެއްވި ގޮތުގައި، މުހިންމު އިންތިޚާބެއް ބޯމަތިވެފައި އޮތްއިރު، ޕީޕީއެމްގެ ސެނެޓްގެ ބައްދަލުވުމެން ނުބާއްވާތާވެސް މިހާރު 3 މަހެއްހާ ދުވަސް ވަނީ ވެފައެވެ. އޭނާ ވިދާޅުވި ގޮތުގައި ޕާޓީގެ ސެނެޓް އެންމެ ފަހުން ބައްދަލު ކޮށްފައިވަނީ އެޕާޓީގެ މަޖިލިސް މެމްބަރެއްގެ ގޮތުގައި ހުންނެވި، ގުރައިދޫ ދާއިރާގެ ކުރީގެ މެމްބަރު އިބުރާހިމް ރިޒާ ނިޔާވުމާއި ގުޅިގެންނެވެ.

ޕާޓީގެ ސެނެޓް ބައްދަލު ނުބާއްވާތާ 3 މަސްދުވަސް ވެއްޖެ. ރިޔާސީ އިންތިޚާބަށް 2 މަހަށްވީ. ޕާޓީގެ ކުރިމަގާއި ގުޅޭގޮތުން ސެނެޓްގެ މަޝްވަރާ ހޯދުމަކާ ނުލާ، ލީޑަރޝިޕްގައި އުޅުއްވާ ދެތިން މީހަކު ހަމައެކަނި މީޑިއާ އެޓެންޝަން ހޯއްވަން ބޮޑު ޕީއާރު ކެމްޕޭނަކަށް ޕާޓީގެ ނަމާއި ލޯގޯ ބޭނުންކުރާ މަންޒަރު ފެންނަމުން މިދަނީ. މިއީ ހިތާމަ ހުރި ކަމެއް.

އިދިކޮޅު ޕީޕީއެމްގެ ލީޑަރޝިޕުން ނިންމާ ނިންމުންތައް ބޮޑަށް އަމާޒުވެފައި ހުރީ ދެތިން ބޭފުޅަކު މީޑިއާގެ ސަމާލުކަން ހޯދުމަށް މިސްރާބު ހިފާފައިކަމަށް ތުހުމަތު ކުރައްވަމުން ސެނެޓްގެ މެމްބަރަކު ވިދާޅުވިއެވެ.

އިދިކޮޅު ޕީޕީއެމްއިން އިއްޔެވަނީ ނަޝީދުގެ "ދަ ޑިމޮކްރެޓްސް"އާއި ބައްދަލުކޮށް، ރިޔާސީ އިންތިޚާބަށް އެކީގައި މަސައްކަތް ކުރުމާއި ގުޅޭގޮތުން މަޝްވަރާ ކޮށްފައެވެ. އަދި މިމަޝްވަރާތަކަށްފަހު ދެފަރާތުންވެސް ބުނެފައިވަނީ ދެ ފަރާތުގެވެސް އެންމެ މުހިންމު ކަމަކަށް އޮތީ މިހާރު އޮތް ވެރިކަން ބަދަލު ކުރުންކަމުގައެވެ. މިމަޝްވަރާތަކުގައި ޕީޕީއެމްގެ ފަރާތުން ބައިވެރިވެފައިވަނީ މެމްބަރު ޝިޔާމާއި، ޓޮމްއެވެ. ޑިމޮކްރެޓްސްގެ ފަރާތުން ބައިވެރިވީ އީވާއާއި، ހަސަން ލަތީފާއި، އާޒިމެވެ.

ގިނަބަޔަކު ފާހަގަ ކުރާގޮތުގައި އިދިކޮޅު ޕީޕީއެމްއިން މިހާރު މަސައްކަތް ކުރަމުންދަނީ، އެޕާޓީ ރަގަޅު މިސްރާބަކަށް ގެންދެވޭނެ ވަރުގެ ހަރުދަނާ ލީޑަރޝިޕެއް އޮވެގެންނެއް ނޫނެވެ. އަދި އެޕާޓީގެ ރައީސް ޔާމިން ޖަލުގައި އޮންނަވައިގެން ނޯޓު ފޮނުއްވާކަމަށް ވިދާޅުވެ، ޕާޓީގެ އިސް ސަފުގައި ތިއްބެވި ބައެއް މެމްބަރުން، ރައީސް ޔާމިން "ވިދާޅުވި ކަމަށް" ބުނެ އޭގެ ސިޔާސީ މަންފާ ނަގަމުންދާކަމަށްވެސް ޕާޓީގެ އާންމު މެމްބަރުން ދަނީ ތުހުމަތު ކުރަމުންނެވެ.