އޯގާތެރިކަން އިސްކުރެވެން އޮތް ޙާލަތުތަކުގައި، އޯގާތެރިކަން އިސްކުރުމަކުން، ޤާނޫނީ ނުރަނގަޅު ނަތީޖާއެއް ނުނިކުންނާނެކަމަށް ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވެއްޖެއެވެ.

ރ. ދުވާފަރު ކައުންސިލްގެ އެތައް މިލިއަން ރުފިޔާއެއްގެ ފައިސާ ނަހަމަ ގޮތުގައި ބޭނުންކުރި މައްސަލައިގައި، ދައުވާކުރުމުގެ ބަދަލުގައި، ނަސޭހަތުގެ އެއްބަސްވުމެއް ހަދާފައެވެ. މިކަމާއި ގުޅިގެން ޕީޖީ ޝަމީމަށް ވަނީ ވަރަށް ބޮޑެތި ފާޑުކިޔުން އަމާޒުވެފައެވެ. މިކަން ދިފާއު ކުރައްވައި ޝަމީމް އަމިއްލަ ބްލޮގުގައި ވިދާޅުވީ ނަޞޭޙަތުގެ އެއްބަސްވުން ހެދުމުގައި ބަލަންޖެހޭ ދެލިސްޓެއް ޤާނޫނުގައި އޮންނަ ކަމަށެވެ. އެއީ، ޢާންމު މަޞްލަޙަތަށް އެންމެ ފައިދާހުރި ގޮތަކީ ނަޞޭޙަތްދިނުން ކަމުގައި ނިންމުމަށް ބާރުއަޅާ ކަންތައްތަކުގެ ލިސްޓަކާއި، ޢާންމު މަޞްލަޙަތަށް އެންމެ ފައިދާހުރި ގޮތަކީ ދައުވާކުރުން ކަމުގައި ނިންމުމަށް ބާރުއަޅާ ކަންތައްތައް އޮތް ލިސްޓެއް ކަމަށެވެ.

ދުވާފަރު މައްސަލައިގައި، އަޅުގަނޑުމެންގެ ކުރިމަތީގައި އޮތީ މިދެންނެވި ދެލިސްޓުން އަޅައި ބަލައިގެން ނަތީޖާއެއް ނެރުން. ދައުވާކުރަން ބާރުއަޅާ ލިސްޓުން ފުރިހަމަވީ، ލިސްޓުގައި އޮތް 13 ކަންތަކުގެ ތެރެއިން އެންމެ 3 ކަންތައް. ނަޞޭހަތްދިނުމަށް ބާރުއަޅާ ލިސްޓުގައި ހުރި ހުރިހާ ކަމެއް ފުރިހަމަވޭ.

– ޝަމީމް ވިދާޅުވިއެވެ

ޝަމީމް ވިދާޅުވީ ޤާނޫނު މިހާރު އޮތް ގޮތުން، މިމައްސަލައަކީ ނަޞޭޙަތުގެ އެއްބަސްވުމެއް ހެދުމަށް ހުއްދަ ލިބޭ، އެކަމަށް ޤާނޫނު ތަޞައްވުރު ކޮށްފައި އޮތް، ޝަރުޠު ހަމަވާ މައްސަލައެއްކަމަށެވެ. ޤާނޫނު ތަންފީޒުކުރުމުގައިވެސް، އޯގާތެރިކަން އިސްކުރެވެން އޮތް ޙާލަތުތަކުގައި، އޯގާތެރިކަން އިސްކުރުމަކުން، ޤާނޫނީ ނުރަނގަޅު ނަތީޖާއެއް ނުނިކުންނާނެކަމަށް ޕީޖި ވިދާޅުވިއެވެ.

ރ. ދުވާފަރު ކައުންސިލްގެ އެތައް މިލިއަން ރުފިޔާއެއްގެ ފައިސާ ނަހަމަ ގޮތުގައި ބޭނުންކުރި މައްސަލައިގައި، ދައުވާކުރުމުގެ ބަދަލުގައި، ނަސޭހަތުގެ އެއްބަސްވުމެއް ހެދީ ކޮމިޝަނާ އޮފް ޕްރިޒަންސް (ސީޕީ) އަހުމަދު މުހައްމަދު ފުޅުގެ ބައްޕަ ހިމާޔަތްކުރަން ކަމަށް ކްރިމިނަލް ކޯޓުގެ ކުރީގެ ގާޒީ އަހުމަދު ހައިލަމް ވަނީ ވިދާޅުވެފައެވެ.

ދުވާފަރު ކައުންސިލުން ދައުލަތުގެ މާލިއްޔަތު ގަވާއިދުގައި ބަޔާންކޮށްފައިވާ އިޖުރާއަތްތަކާއި ހިލާފަށް ކައުންސިލްގެ މެންބަރުންގެ ޕާސަނަލް އެކައުންޓަށް ފައިސާ ޖަމާކުރުމާއި، ނަގުދު ފައިސާ އިން އެއްވެސް ހުއްދައެއް އަދި ލިޔެކިޔުމެއް ނެތި ކައުންސިލަރުންނަށާއި، އ.ތ.މ ކޮމިޓީގެ މެންބަރުންނަށާއި، މުވައްޒަފުންނަށް ގިނަ އަދަދެއްގެ ފައިސާ ހަވާލުކޮށްފައިވާ ކަމަށް ތުހުމަތު ކުރެވުނެވެ.

އެ މައްސަލައިގައި ޝާމިލުވި މީހުންގެ ތެރޭގައި ކައުންސިލް އިދާރާގެ އެސިސްޓެންޑް ޑިރެކްޓަރު އަދި ސީޕީގެ ބައްޕަ ރ. ކަނދޮޅުދޫ، ރިހިތަޅާގެ، މުހައްމަދު އަލީފުޅާއެކު އިތުރު ހަ މީހަކު ހިމެނެއެވެ. ނަމަވެސް އެ މީހުންނަށް ދައުވާ ކުރުމުގެ ބަދަލުގައި ޕްރޮސިކިއުޓާ ޖެނެރަލް އޮފީހުން ނިންމީ އިއުތިރާފުގެ އެއްބަސްވުމެއް ހަދައި ނަސޭހަތް ދޭށެވެ. އަދި އެ އެއްބަސްވުމުގެ މުއްދަތުގައި އިތުރު ކުށެއް ނުކުރުމަށް ޝަރުތުކޮށް، އެއްބަސްވުމުގެ ޝަރުތުތަކާ ޚިލާފުވެއްޖެނަމަ ދައުވާ އުފުލާށެވެ.