މިހާރު ކުރެވުމުންދަނީ އާ ޓީމެއް ބިނާކުރުމުގެ މަސައްކަތް ކަމުގައި ސްޕެއިންގެ ގައުމީޓީމުގެ ކޯޗް ލުއިސް އެންރީކޭ ބުނިފި އެވެ.
ބައިނަލްއަގުވާމީ އެކުވެރިކަމުގެ މެޗެއްގައި މިރޭ ޔޫރަޕުގެ ޗެމްޕިއަން ޕޯޗުގަލްއާ ދެކޮޅަށް ނުކުތުމުގެ ކުރިން ވާހަދައްކަމުން ސްޕެއިންގެ ގައުމީ ފުޓްބޯޅަ ޓީމުގެ ކޯޗު އެންރީކޭ ބުނީ ޓީމެއް ބިނާ ކުރުމުގެ މަސައްކަތް ކުރިޔަށްދަނީ އެންމެ ކުޅުންތެރިޔަކަށް ވިސްނައިގެން ނޫންކަމަށާއި، އެ މަސައްކަތް ކުރިޔަށްދަނީ މުޅި ޓީމަށް ވިސްނައިގެންކަމަށެވެ.
މިވަގުތު ސްޕެއިންގައި ދިމާވާ އެންމެ ބޮޑު މައްސަލައަކީ ޓީމުގައި މޮޅު ފޯވާޑެއް ނެތުންކަމަށް އެންރީކޭ ވަނީ ފާހަނގަކޮއްފައެވެ. އެހެންކަމުން މިވަގުތު ލަނޑުޖެހުމުގައި ބޭނުންކުރެވެން ހުރި ގޮތްތަކާ މެދު ވިސްނަންޖެހިފަވާ ކަމަށް އެންރީކޭ ވަނީ ބުނެފައެވެ. އޭނާ ބުނީ ޕޯޗުގަލްއާ ދެކޮޅަށް ނުކުންނަ މެޗު ބޭނުންކުރާނީ އާކަންތައްތައް ދަސްކުރަންކަމަށާއި މެޗުގައި ބައެއް ކުޅުންތެރިންނަށް އަރާމްކުރަން ފުރުސަތުދޭނެ ކަމަށެވެ.
ވާދެވެރިންގެ ތިބިކަހަލަ ފާހަގަކޮއްލެވޭ މޮޅުފޯވާޑެއް އަހަރެމެންގެ ނެތް، އެންމެ ބޮޑު ހިތްހަމަޖެހުމަކީ ޓީމުގެ މިޑްފީލްޑަރުން ވެސް ލަނޑުޖެހުން. އެންރީކޭ ބުންޏެވެ.
މި ދެޓީމު އެންމެފަހުން ވާދަކޮއްފަވަނީ 2018 ވަނަ އަހަރުގެ ވޯލްޑްކަޕް ފުޓްބޯޅަ މުބާރާތުގައެވެ. އެ މެޗު ނިމުނީ 3-3 ލަނޑުން އެއްވަރުވެގެންނެވެ.
