ހުރިހާ ކަމެއް ތަރުތީބުވެގެން މިދަނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ދެވަނަ ދައުރެއް ލިބޭގޮތަށް ކަމުގައި އަދާލަތު ޕާޓީގެ ރައީސް އިމްރާން ވިދާޅުވެއްޖެއެވެ.
ސެޕްޓެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި، ރައީސް އިބްރާހިމް މުހައްމަދު ޞާލިހު ދެވަނަ ދައުރަކަށް އިންތިޚާބު ކުރުމަށް ރައީސް ޞާލިހަށް ތާއީދު ކުރުމަށް އަދާލަތު ޕާޓީން ވަނީ ނިންމާފައެވެ. އެޕާޓީން ދަނީ ރައީސް ޞާލިހުގެ ކެމްޕެއިންގެ ކަންކަން ކުރިއަށް ގެންދިއުމުގައި މަސައްކަތް ކުރާނެ ގޮތްތަކާއި ކެމްޕެއިން ޓީމުތައް އެކުލަވާލަމުންނެވެ.
އިމްރާން ވިދާޅުވީ ރާއްޖޭގެ މިހާރު ކަންކަން ހިނގަމުންދާ ގޮތުންނާއި، ކަންކަން ތަރުތީބުވެ އެތުރެމުންދާ ގޮތަށްބަލާއިރު، ފެނިގެންދަނީ ރައީސް އިބްރާހިމް މުހައްމަދު ޞާލިހަށް ރިޔާސީ ދެވަނަ ދައުރެެއް ލިބޭތަން ކަމަށެވެ. ސިޔާސީ ކަންކަން ތަރުތީބު ވަމުންދާ ގޮތުން ފަސޭހަ ކަމާއިއެކު ރައީސް ޞާލިހަށް ދެވަނަ ދައުރެއް ލިބޭތަން ފެންނަ ކަމަށްވެސް އިމްރާން ވިދާޅުވިއެވެ.
މާތް ރަސްކަލާންގެ ހެޔޮ ރަޚުމަތުން ކަންކަން ތަރުތީބުވެ ނިމެމުން މިދަނީ ރައީސް އިބްރާހިމް މުހައްމަދު ޞާލިހަށް ދެވަނަ ދައުރެއް ލިބުމަށް ފަހިވެ ފަސޭހަވާ ގޮތަށްކަން އިންސާފުވެރި، ހަރު ބުއްދީން ވިސްނާ ކޮންމެ މީހަކަށް ފެންނާނެއެވެ.
– އިމްރާން ވިދާޅުވިއެވެ.
އިމްރާން މިހެން ވިދާޅުވިއިރު، ރައީސް ޞާލިހު ވެރިކަމަށް ގެނައި ކޯލިޝަންގައިި ހިމެނޭ ބައިވެރިންގެ ތެރެއިން މިހާރު އެމަނިކުފާނާއިއެކު ތިއްބެވީ އަދާލަތު ޕާޓީއެކަންޏެވެ. ޖުމްހޫރީ ޕާޓީއާއި، ރައީސް ނަޝީދާއި، އެމްއާރުއެމްއާއި، ކާނަލް ނާޒިމްވެސް ވަނީ މިސަރުކާރާއި ފެއަށް ޖެހިފައެވެ.
ރިޔާސީ އިންތިޚާބުގައި ރައީސް ޞާލިހާއިކެކު ބައިއަތު ހިފައިގެން ތިބީ އަދާލަތާއި، އެމްޑީއޭއެވެ. ރައީސް ޞާލިހު ވިދާޅުވެފައިވަނީ ރިޔާސީ އިންތިޚާބު ފުރަތަމަ ބުރުން ކާމިޔާބު ކުރައްވާނެކަމަށެވެ.
