މީގެ 100 އަހަރު ކުރިން އަޑިއަށް ގޮސްފައިވާ، މަޝްހޫރު ޓައިޓޭނިކް އާގު ބޯޓު ބެލުމަށް ކަނޑު އަޑިއަށް ދަތުރު ކުރި ސަބްމެރިން ގެއްލިގެން ހޯދަން ފެށިތާ 4 ދުވަސް ފަހުން، ޓައިޓޭނިކް އޮތް ސަރަހައްދަށް ދަތުރު ކުރަމުން ދަނިކޮށް ސަބްމެރިންގެ ސްޓްރަކްޗަރ ފެއިލްވެ، ސަބްމެރިން ފަޅައިގެން ގޮސް، އޭގައި ދަތުރު ކުރަމުންދިޔަ 5 މީހުންވެސް މަރުވެފައިވާކަން ޔަގީން ކުރެވިއްޖެއެވެ.

މިކަން ޔަގީން ކޮށްދީފައިވަނީ އެމެރިކާގެ ކޯސްޓްގާޑުގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި، ޔޫއެސް ކޯސްޓްގާޑުގެ ރެއަރ އްޑްމިރަލް ޖޯން މުއާގަރއެވެ.

މި ނޫސްވެރިންގެ ބައްދަލުވުމުގައި އެމެރިކާގެ ކޯސްޓްގާޑުން މައުލޫމާތު ދީފައިވާގޮތުގައި ކަނޑުއަޑިން 12،000 ފޫޓު އަޑީގައި އޮތް ޓައިޓޭނިކްއާއި 1،600 ވަރަކަށް ފޫޓު ދުރުންވަނީ ސަބްމެރިންގެ ބައިތައް ފެނިފައެވެ. އޭގެ ތެރޭގައި އަޑިއަށް ދަތުރު ކުރަމުންދިޔަ ކުޑަ ސަބްމެރިންގެ ފަހަތު ކޮޅާއި އަދި އެހެނިހެން ބައިތައްވެސް ހިމެނެއެވެ. ސަބްމެރިންގެ ސްޓްރަކްޗަރ ފެއިލްވެ، ކަނޑުއަޑީގެ ޕްރެޝަރަށް އޭގެ އޮނިގަޑު ފިތި، ސަބްމެރިން ފަޅައިގެން ގޮސްފައިވާކަމަށް ބެލެވެނީ އާދީއްތަ ދުވަހު ކަމަށްވެސް ބުނެފައި ވެއެވެ.

މި ސަބްމެރިމްގެ ބައިތައް ފެނިފައިވަނީ، ސަބްމެރިންގައި ދަތުރު ކުރަމުންދިޔަ މީހުން ސަލާމަތް ކުރުމަށާއި ސަބްމެރިން ހޯދުމަށްޓަކާ، ކަނޑުގެ އަޑީގައި ހުންނަ ތަކެއްޗާއި އަދި އަަޑިއަށް ގޮސްފައިހުންނަ އުޅަނދުފަހަރުތައް ސަލާމަތްކުރުމުގެ ގާބިލްކަންހުރި، އެމެރިކާގެ ނޭވީގެ ސެލްވޭޖް ސިސްޓަމް ބޭނުންކޮށްގެން ކަނޑުގެ އަޑި ހޯދާ ބެލުމުންނެވެ.

ކަނޑުއަޑީގައި އޮތް ޓައިޓޭނިކް ބެލުމަށް ދަތުރު ކުރަމުންދިޔަ 5 މީހުންވެސް މަރުވެފައިވާކަން ޔަގީން ކުރެވުމާއެކު އެމެރިކާގެ ވައިޓްހަސުއިންވަނީ އާއިލާތަކަށް ތައުޒިޔާ ކިޔާފައެވެ. އަދި ވައިޓްހައުސްއިން ބުނެފައިވަނީ، މި ސަބްމެރިންގައި ތިބި މީހުން ސަލާމަތް ކުރުމަށް އެމެރިކާގެ ކޯސްޓް ގާޑުން ކޮށްފައިވާ މަސައްކަތަކަށް ޝުކުރުވެރިވާ ކަމަށާއި، އަދި މިމަސައްކަތުން ދައްކުވައިދެނީ އެގައުމުގެ އަސްކަރިއްޔާގެ ގާބިކަމާއި މީހުންގެ ޚިދުމަތްތެރިކަން ކަމުގައެވެ.

ގެއްލިފައިވާ ސަބްމެރިންއާއި ގުޅުން ކެނޑިފައިވަނީ ކަނޑުގެ އަޑިއަށް ދަތުރުކުރަން ފެށިތާ އެއްގަޑިއިރާއި 45 މިނިޓް ފަހުންނެވެ. މި ސަބްމެރިންއަށް ޓައިޓޭނިކް އޮތް ސަރަހައްދަށް ދާން 2 ގަޑިއިރުގެ ދަތުރެއް ހޭދަވާނެއެވެ. އެއަށްފަހު ޓައިޓޭނިކް ބެލުމުގައި 4 ގަޑިއިރު ހޭދަކުރުމަށްފަހު މައްޗަށް އެރުމަށް 2 ގަޑިއިރު ހޭދަވާނެއެވެ. ސަބްމެރިންއިން ކުރުމަށް ހަމަޖެހިފައިވަނީ ޖުމްލަ 11 ގަޑިއިރުގެ ދަތުރެކެވެ.

ޓައިޓޭނިކް އަޑިއަށް ގޮސްފައިވަނީ 1912 ވަނަ އަހަރު އެޕްރިލްމަހުގެ 15 ވަނަ ދުވަހު، ގަނޑުފެންގަަޑެއްގައި ޖެހިގެންނެވެ. ގަނޑުގެންގަޑެއްގައި ޖެހުނުތާ އެންމެ ދެގަޑިއިރު ތެރޭ، އެޕްރިލްމަހުގެ 14 ވަނަ ދުވަހުގެ ރޭ ދަންވަރު 2:20ގައި ޓައިޓޭނިކް އަަޑިއަށްދިޔަ ހާދިސާގައި 1،500 މީހުން މަރުވިއެވެ. ބޯޓުގައި 2,224 މީހުން ދިޔައީ ދަތުރު ކުރަމުންނެވެ. ޓައިޓޭނިކް އޮތީ ކަނޑުގެ 12،500 ފޫޓު ފުނުގައެވެ.

އެ ބޯޓަކީ އޭރު ދުނިޔޭގައި އޮތް އެންމެ ބޮޑު ޕަސެންޖަރުލައިން ބޯޓެވެ. 1912 ވަނަ އަހަރު މި ބޯޓު އަޑިއަށް ދިޔަފަހުން، ކަނޑު އަޑިން ބޯޓު އޮތް ސަރަހައްދު ހޯދިފައިވަނީ 1985 ވަނަ އަހަރުއެވެ. އެއަށްފަހު މި ބޯޓު އޮތް ސަރަހައްދަކީ ކަނޑުއަޑިއަށް ދަތުރުކުރާ ފަތުރުވެރިންގެ އެންމެ މަގުބޫލު އެއް މަންޒިލެވެ.