ރ. ދުވާފަރު ކައުންސިލުގެ، ކޮރަޕްޝަން މައްސަލައިގައި ހިމެނޭ 8 މީހެއްގެ މައްޗަށް ދައުވާ ނުކޮށް، އިތުރު ކުށަކަށް އަރައި ނުގަންނަން ޝަރުތުކޮށް، ތުހުމަތުކުރެވޭ 8 މީހުންނާއެކު ނަސޭހަތުގެ އެއްބަސްވުމެއް ހަދާފައިވާ ކަަމަށް ޕްރޮސިކިއުޓާ ޖެނެރަލް އޮފީހުން ބުނެފިއެވެ.
ލޯކަލް ގަވަރމަންޓް އޮތޯރިޓީން އެކުލަވާލި ދުވާފަރު ކައުންސިލްގެ ޚާއްޞަ މޮނިޓަރިންގ ރިޕޯޓަކުން ފާހަގަވި ކޮރަޕްޝަންގެ މައްސަލައާ ގުޅިގެން 12 މީހެއްގެ މައްސަލަ ތަޙުޤީގުކޮށް، ޑިއުޓީ ޕްރޮސިކިއުޝަން މަރުޙަލާއަށްފަހު، ދަޢުވާކޮށްދިނުމަށް ނިންމި 8 މީހުންގެ ތެރޭގައި އެކައުންސިލްގައި އޭރުތިބި މެންބަރުންނާއި ބައެއް މުވައްޒަފުންވެސް ހިމެނެއެވެ.
މިގޮތުން މިމައްސަލާގައި ދަޢުވާކޮށްދިނުމަށް އެދި ޕީޖީ އޮފީހަށް ފޮނުވި 8 މީހުންގެ ތެރޭގައި ހިމެނެނީ، ދުވާފަރު ކައުންސިލްގެ ރައީސް ޙަސަން ޙަކީމް، ކައުންސިލްގެ ނާއިބު ރައީސް ޢިޒްމީލް އަޙުމަދު، ކައުންސިލްގެ އޭރުގެ މެންބަރު އަޙްމަދު ސަމޫޙު، ކައުންސިލްގެ މެންބަރު މުޙައްމަދު ޝާމް، ކައުންސިލްގެ މެންބަރު ޒުހުދާ އާދަމް، ކައުންސިލްގެ މެންބަރު އާމިނަތު ޞަލާޙު އަދި ސެކްރަޓަރީ ޖެނަރަލް މުޙައްމަދު ނާޞިޙްގެ އިތުރުން ދުވާފަރު ކައުންސިލްގެ އިދާރާގެ އޭރުގެ އެސިސްޓެންޓް ޑިރެކްޓަރ، މުޙައްމަދު ޢަލީފުޅުއެވެ.
ޕީޖީ އޮފީހުން ބުނެފައިވަނީ މި 8 މީހުންވެސް ކުށަށް އިއުތިރާފްވެ، އެ އޮފީހާއެކު އިއުތިރާފުގެ އެއްބަސްވުމެއް ހެދުމަށް އެދިފައިވާކަމުގައެވެ. އެގޮތުން ކޮރަޕްޝަންގެ މައްސަލާގައި ޝާމިލްވާ މީހުންގެ ކުށުގެ ރެކޯޑާއި، ކަން ހިނގާފައިވާ ގޮތާއި، އިއުިރާފްވި މީހުން ކުށުގައި ޝާމިލްވެފައިވާ މިންވަރާއި، ކުށުގައި ޝާމިލްވާ މީހުން އަދާކުރަމުންދާ ޒިންމާތަކާއި، އެމީހުން ދައުތަލަށް ޚިދުމަތް ކޮށްފައިވާ މުއްދަތާއި، މިންވަރާއި، ބަދަލު ދައުލަތަށް ލިބިފައިވާ މިންވަރުގެ އިތުރުން އިއުތިރާފްވެފައިވާ މީހުންގެ މައްޗަށް ދައުވާ ކުރުމުން އެމީހުންނަށް ކަނޑައެޅިގެންދާނެ އަދަބަށްވެސް މި ނިންމުން ނިންމުމުގައި ރިއާޔަތް ކޮށްފައިވާނެކަމަށްވެސް ޕީޖީ އޮފީހުން ބުނެފައި ވެއެވެ.
ޕީޖީ އޮފީހުން އިތުރަށް ބުނެފައިވަނީ އެއްބަސްވުމުގެ މުއްދަތުގައި އެއިން އެއްވެސް މީހަކު އިތުރު ކުށަކަށް އަރައިގެންފިނަމަ އެއްބަސްވުން ނިނުމަކަށް އަންނާނެ ކަމަށެވެ. އަދި އެހާލަތުގައި އެމީހެއްގެ މައްޗަށް މިމައްސަލާގައި ދައުވާ އުފުލޭނެކަމަށްވެސް ޕީޖީ އޮފީހުން ބުނެފައި ވެއެވެ.
އޭސީސީން މިމައްސަލަ ތަހުގީގު ކުރުމަށްފަހު، އެންމެންގެ މައްޗަށްވެސް ދަޢުވާކޮށްދިނުމަށް އެދިފައިވަނީ ދިވެހިރާއްޖޭގެ ޤާނޫނުލްޢުޤޫބާތު ގެ 513 ވަނަ މާއްދާގެ ދަށުން، ރަސްމީ ޙައިސިއްޔަތު ނަހަމަ ގޮތުގައި ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ކުށާއި، އެޤާނޫގެ 516 ވަނަ މާއްދާގައިވާ ދައުލަތުގެ މުދަލާއި ފައިސާއަށް ޚިޔާނާތްތެރިވުމުގެ ކުށުގެ އިތުރުން، ހަމަ އެޤާނޫނުގެ 517 ވަނަ މާއްދާގައިވާ ދައުލަތަށް ފައިދާއެއް ލިބެން އޮތްކަމެއްގައި އެނޫންގޮތަކަށް ޢަމަލުކުރުމުގެ ކުށުގެ ދައުވާކަމަށެވެ.
ރ.ދުވާފަރުން ހިންގި ކޮރަޕްޝަންގެ މައްސަލައާއި ގުޅޭގޮތުން އެލްޖީއޭއިން ޢާންމުކުރި ރިޕޯޓްގައިވަނީ ކައުންސިލްގެ ތެރޭގައި ނަހަމަ ގޮތުގައި ކޮށްފައިވާ ފައިސާގެ މުޢާމަލާތްތައް ހާމަކޮށްފައެވެ. އެގޮތުން ޒަކާތު ފައިސާއަށް ޚިޔާނާތްތެރިވުމާއި، ބިޑް ކުރުމާއި ނުލާ ކައުންސިލްގެ މުވައްޒަފުންގެ މަސްލަހަތު އޮންނަ ގޮތަށް މަސައްކަތްތައް ހަވާލުކުރުމާއި، ލިޔެކިޔުން ނެތް ފައިސާގެ އެތައް މުޢާމާލަތްތަކެއް ކޮށްފައިވާކަން ރިޕޯޓްގައި ފާހަގަކޮށްފައިވެއެވެ.
މި މުޢާމަލާތްތަކުގައި ކައުންސިލްގެ ޑިރެކްޓަރާއި، ކައުންސިލްގެ ރައީސްއާއި މެންބަރުންނާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި ކޮންޓްރެކްޓް މުވައްޒަފުންނަށްވެސް ފައިސާ ޖަމާކޮށްފައިވާ ކަމަށް އެލްޖީއޭގެ ރިޕޯޓްގައިވެއެވެ. އަދި ލިޔެކިޔުންނެތި ކައުންސިލްގެ ފައިސާއިން އެތައް ލައްކަ ރުފިޔާއެއް ކައުންސިލްގެ މުވައްޒަފުންގެ އެކައުންޓްތަކަށް، ޖަމާކޮށްފައިވާކަންވެސް އެލްޖީއޭގެ ރިޕޯޓުގައިވަނީ ފާހަގަކޮށްފައެވެ.
