އެމްޓީސީސީގެ ބޮޑު ޑްރެޖަރު، މަހާ ޖައްރާފުގައި މަސައްކަތް ކުރާ ހުރިހާ ފަޅުވެރިން ދިވެހިންނަށް ބަދަލުކޮށްފިއެވެ.
އެމްޓީސީސީން ވިދާޅުވީ 2017 ވަނަ އަހަރު އެމްޓީސީސީއިން ރާއްޖެ ގެނައި މަހާ ޖައްރާފަކީ މި ސަރަހައްދުގައިވެސް އޮތް އެންމެ ބޮޑު އެއް ޑްރެޖަރުކަމަށެވެ. ބިދޭސީ ފަޅުވެރިންނާއިއެކު މަސައްކަތް ފެށި މަހާ ޖައްރާފުގައި މިއަދުން ފެށިގެން މަސައްކަތް ކުރާނީ 17 ދިވެހިންނެވެ. މީގެ ތެރޭގައި ބޯޓުގެ ކެޕްޓަން، 2 ޗީފް އޮފިސަރުން، ޗީފް އިންޖިނިއަރު، ސެކަންޓް އިންޖިނިއަރ، 4 ޕައިޕް އޮޕަރޭޓަރ، އިލެކްޓްރޯ ޓެކްނިކަލް އޮފިސަރ، އަދި ކްރޫއިންނާއި ކައްކާ ހިމެނެއެވެ.
"މަހާ ޖައްރާފުގެ ފަޅުވެރިން ދިވެހިންނަށް ބަދަލުކުރުމުގެ ގޮތުން 2018 ވަނަ އަހަރުން ފެށިގެން މިކުންފުނިން ވާނީ ބޯޓުގައި ތިބި ބިދޭސީ ފަޅުވެރިންގެ އިލްމާއި ތަޖުރިބާގެ އެންމެ ފުރިހަމަ ބޭނުން ހިފާ އެބޭފުޅުންގެ ގާތުން ދިވެހި ފަޅުވެރިންނަށް ބޭނުންވާ ތަމްރީން ދީފަ. އަދި މަހާ ޖައްރާފްގައި މިވަގުތު މަސައްކަތް ކުރާ ދިވެހި މުވައްޒަފުންނަކީ މަސައްކަތައް ޤާބިލް މުވައްޒަފުންކަމުގެ ޔަޤީންކަން އަރުވަން" އެމްޓީސީސީގެ ބަޔާނުގައި ވެއެވެ.
އެމްޓީސީސީގެ މިނިންމުމުގެ ސަބަބުން ބިދޭސީ ފަޅުވެރިންގެ މުސާރައިގެ ގޮތުގައި ދިވެހި ރާއްޖޭއިން ބޭރުވާ ފައިސާ ރާއްޖޭގައި ހިފެހެއްޓި، ދިވެހިންނަށް އިތުރު ވަޒީފާގެ ފުރުސަތުތަކެއް ފަހިވެ މިކަމުގެ ހެޔޮ އަސަރު ރާއްޖޭގެ އިޤްތިސާދަށް ކުރާނެކަމަށް އެކުންފުނިން ވިދާޅުވެ އެވެ.
ދިގުމިނުގައި 92.95 މީޓަރު އަދި ފުޅާ މިނުގައި 16.25 މީޓަރު ހުންނަ އައި. އެޗް.ސީގެ އީޒީ ޑްރެޖް ސީރީޒްގެ ހޮޕަރ ސަކްޝަން ޑްރެޖަރ މަހާ ޖައްރާފަކީ 50 މީޓަރު އަޑިން ވެލި ނެގުމުގެ ޤާބިލްކަން ލިބިފައިވާ އުޅަނދެކެވެ.
