ސަރުކާރުން މަޖިލީހުގެ ރައީސް މުހައްމަދު ނަޝީދާއިމެދު ހިތްހަމަ ނުޖެހެނީ މަޖިލީހުގެ ކުރީގެ ރައީސް މަސީހު އަމަލު ކުރެއްވިގޮތަށް މަޖިލީހުގެ މެމްބަރުން މަޖިލީހުން ގަދަކަމުން ނުނެރުއްވާތީކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވެއްޖެއެވެ.
އޭނާ މިހެން ވިދާޅުވީ ރައްޔިތުންގެ މަޖިލީހުގެ މަސައްކަތްތައް ހުއްޓި ޤާނޫނީ ހުސްކަމެއްގެ ތެރެއަށް ދިއުމާއި ގުޅިގެން ސަރުކާރުން ބޮޑެތި ކަންބޮޑުވުން ފާޅު ކުރަމުންދާ ދަނޑިވަޅުގައި ކުރެއްވި ޓުވީޓުގައެވެ. ވައްޑެ ވިދާޅުވީ ރައީސް ނަޝީދާއި، މަސީހުއާއި އެއްވަރު ކުރަން އުޅުނަސް އެކަމެއް ނުވާނެކަމަށެވެ. މަސީހު އަަމަލު ކުރެއްވި ގޮތަށް މެމްބަރުން ގަދަކަމުން މަޖިލީހުން ނެރެ ހެދުމަކީ ރައީސް ނަޝީދު ތާއީދު ކުރައްވާ ކަމެއް ނޫންކަމަށް ވައްޑެ ވިދާޅުވިއެވެ.
މަސީހުއާ ރައީސް ނަޝީދު އެއްގޮތްކަމަށް ދައްކުވަން ސަރުކާރުން ކިތަންމެ އުޅުނަސް ރައްޔިތުންނަށް ވީގޮތާ ވަމުންދާގޮތާ ނިކަން ސާފު. މަސީހު ސިފައިން ވައްދައިގެން ސަރުކާރާ ދެކޮޅު އެންމެން ނެރުނީ. ރައީސް ނަޝީދު އިދިކޮޅު މެމްބަރުންނަށް އެހެން ނުހައްދަވާތީ ސަރުކާރުން ނުރުހުނީ.
– ވައްޑެ ވިދާޅުވިއެވެ.
ވައްޑެ މިހެން ވިދާޅުވެފައިވާއިރު، މަސީހުގެ ރައީސް ކަމުގައި މަޖިލީހުގައި އޭރު ކުރަމުންދިޔަ ކަންކަން ކޮށްފައިވަނީ މަޖިލީހުގެ ގަވާއިދަށް ބަދަލު ގެނެސް ނުފޫޒުގެ ބޭނުން ކޮށްގެންކަމަށް ގިނަ ބަޔަކު ދެކެއެވެ. ނަމަވެސް މިހާރުގެ ރައީސް މަސައްކަތް ކުރައްވަނީ ގަވާއިދުގައި ވަކި ގޮތަކަށް އޮތް ނަމަވެސް އެއާއި ދިމާ އިދިކޮޅަށް ކަމަށް ގިނަ ބަޔަކު ބުނެއެވެ.
މަސީހުގެ ޒަޢާމަތުގައި މަޖިލީހުގެ 12 މެމްބަރެއްގެ ގޮޑި ގެއްލުވާލައި މަޖިލީހަށް ވަނުން މަނާކޮށް، ސިފައިން ވައްދައިގެން މަޖިލިސް ކޮންޓްރޯލް ކުރުމަށް ވަރަށް ބޮޑަށް މަސައްކަތް ކޮށްފައިވެއެވެ.
