މޯލްޑިވްސް ނޭޝަނަލް ޕާޓީ ވުޖޫދުވި ގޮތަށް ބަލައި ދަ ޑިމޮކްރެޓްސް އުފެއްދުމަށް ހުއްދަ ދިނުމުގެ ކުރިން ހުށަހަޅާފައިވާ ފޯމުތަކުގެ ސައްޚަކަން ރަނގަޅަށް ކަށަވަރު ކުރަންޖެހޭކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ވިދާޅުވެއްޖެއެވެ.
ރޮޒެއިނާ މިހެން ވިދާޅުވީ ދަ ޑިމޮކްރެޓްސް ޕާޓީ އުފެއްދުމުގެ ހުއްދަ ނުދިނުމަށް އީސީއިން ނިންމި ނިންމުމާއި ގުޅޭގޮތުން މަޖިލީހުގެ ވިލިމާލެ ދާއިރާގެ މެންބަރު އަދި އެމްއެންޕީގެ ނާއިބު ރައީސް އަހުމަދު އުޝާމް ކުރެއްވި ޓްވީޓަކަށް ރައްދުދެއްވަމުންނެވެ. އުޝާމް ވިދާޅުވެފައި ވަނީ ތިން މަސް ދުވަހަކީ ފޯމުތަކުގެ ސައްހަކަން ކަށަވަރުކުރަން އިލެކްޝަން ކޮމިޝަނަށް އަށް ލިބޭ އެންމެ ދިގު މުއްދަތު ކަމަށެވެ.
އުޝާމްގެ ވާހަަކަތަކާއި ގުޅިގެން ރޮޒޭނާ ވިދާޅުވީ އެމްއެންޕީ ވުޖޫދުކުރީ އެމްޑީޕީގެ މަޖިލިސް މެމްބަރުންނާއި އާންމު އެތައް މެމްބަރުންނަށްވެސް ނޭގި ފޯމު ފުރައިގެން ހުށަހަޅައިގެން ކަމަށެވެ. މިކަންކަމަށް ބަލައި މިފަހަރު އިލެކްޝަނުން ދަ ޑިމޮކްރެޓްސް އަށް ހުއްދަ ދިނުމުގެ ކުރިން ފޯމުތަކުގެ ސައްޚަކަން ކަށަވަރު ކުރަންޖެހޭކަމަށް ރޮޒޭނާ ވިދާޅުވިއެވެ.
އެމްއެންޕީ ވުޖޫދަށް ގެނައިރު ކަންކަން ވީގޮތް އެއީ ފޯމުތައް ސައްޚަތޯ ރަނގަޅަށް ބަލަންޖެހޭ ކަމުގެ އެންމެބޮޑު ހެކި. އެމްޑީޕީގެ މަޖިލިސް މެމްބަރުން ތިބީ އެމްއެންޕީއަށް ވައްދާފަ އެބޭފުޅުންނަށް ނޭގި. އެފަހަރުވެސް އިލެކްޝަންސް ކޮމިޝަނުން އޭގެ ޒިންމާ ނަގަންޖެހުނީ ރަނގަޅަށް ނުބެލީމަ. މިފަހަރު އަނެއްކާ ކިތައް މެމްބަރުންގެ ވަގު ފޯމުބާ.
– ރޮޒޭނާ ތުހުމަތުތަކާއިއެކު ވިދާޅުވިއެވެ.
ރޮޒޭނާ މިހެން ވިދާޅުވީ އެމްއެންޕީ އުފެދިގެން އައިއިރު އެޕާޓީގެ ރަޖިސްޓްރީގައި ރައްޔިތުންގެ މަޖިލީހުގެ ވައިކަރަދޫ ދާއިރާގެ އެމްޑީޕީ މެމްބަރު ހުސައިން ޒިޔާދަށް ނޭނގި މޯލްޑިވްސް ނޭޝަނަލް ޕާޓީ (އެމްއެންޕީ)ގައި ރަޖިސްޓްރީ ކޮށްފައިވަތާ 6 މަސްވެފައިވާކަން މިދިޔަ އަހަރު އެނގިފައިވާތީއެވެ.
ޒިޔާދަށް އޭނާ ޕާޓީ ބަދަލުކޮށްފައިވާކަން އެނގުނީ އެމްޑީޕީގެ ޤައުމީ މަޖިލީހުގެ ބައްދަލުވުމުގައި އެމްޑީޕީގެ ދަފްތަރުގައި ހިމެނޭ އެހެން ޕާޓީތަކުގެ މެމްބަރުން ޕާޓީން ވަކިކުރުމަށް ކުރެވުނު މަޝްވަރާތަކުގައި ރަޖިސްޓްރީ ޗެކްކުރުމަށް އިލެކްޝަނަށް މެސެޖު ކުރުމުންނެވެ.
