ރައްޔިތުންގެ މަޖިލީހުގެ ރައީސް ދިރިިއުޅުއްވަމުން ގެންދަނާ މުރައިދޫގެ އިން ނުނިކުންނަވާވެސް މަޖިލިސް ހިންގޭނެ ގޮތެއް ހަދައިި ދޭންޖެހޭ ކަމުގައި ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ވިދާޅުވެއްޖެއެވެ.
އޭނާ މިހެން ވިދާޅުވީ މިހާރު ދިރިއުޅުއްވާ މުރައިދޫގެއާ ހިތްޕުޅާނުވާ ކަމަށާއި، ނޯޓިސްގެ މުއްދަތު ހަމަވުމުން އެގެއިން ނުކުންނަވާނެ ކަމަށް، ރައީސް ނަޝީދު ވިދާޅުވެ ދެއްކެވި ވާހަތަކާއި ގުޅިގެންނެވެ. ރައްޔިތުންގެ މަޖިލީހުގެ ރިޔާސަތުގައި އިންވަން އުޒުރުވެރިވެވަޑައިގަންނަވާއިރު ރައްޔިތުންގެ މަޖިލީހުގެ ރައީސަށް ލިބިވަލައްވާ އިނާޔަތްތައް ނެންގެވުމަކީ އެންމެ ރަނގަޅު ގޮތްތޯ ނޫސްވެރިޔަކު އެމަނިކުފާނުގެ އަރިހުން އެހުމުން، ރައީސް ނަޝީދު ދެއްވި ޖަވާބުގައި ވިދާޅުވީ، ނޯޓިސްގެ މުއްދަތުހަމަވުމުން އިރާދަކުރެއްވިއްޔާ މުރައިދޫ ގެއިން ނުކުންނަވާނެ ކަމަށާއި އެގޭގައި ހުންނެވުމަކީ "ކުރާހިތްވާ ކަމެއް ނޫން" ކަމަށެވެ.
ރައީސް ނަޝީދުގެ ވާހަކަތަކާއި ގުޅިގެން ރޮޒޭނާ ވިދާޅުވީ ރައީސް ނަޝީދު މުރައިދޫގޭގައި އުޅުއްވުމަކީ މައްސަލައަކަށް ވެގެން ބަޔަކު ނޫޅޭކަމަށެވެ. މައްސަލައަކަށް ވެގެން އުޅެނީ ރައީސް ނަޝީދު މަޖިލިސް ހިންގަވަން ޖާގަ ނުދީ މަޖިލިސް ހުއްޓުވާފައި އޮތް އޮތުންކަމަށެވެ.
މިއުޅެނީ މުރައިދޫ ގެއިން ނިކުމެވަޑައި ނުގަންނަވައިގެނެއް ނޫން. ތިތާ އިންނަވާ! އެކަމަކު 54 މީހުން އިތުބާރު ނެތޭ ބުނީމާ މަޖިލިސް ރައީސްގެ މަޤާމުން އިސްތިއުފާ ދެއްވާ! ނުވަތަ ވޯޓު ނަގަން ފުރުސަތު ދެއްވާ! މަނިކުފާނާހުރެ މަޖިލިސް ނުހިންގިގެން މިއުޅެނީ! މުރައިދޫގެ ނުހިންގިގެނެއް ނޫން މިއުޅެނީ.
– ރޮޒޭނާ ވިދާޅުވިއެވެ.
ދައުލަތުން ފޯރުކޮށްދޭ ރަސްމީގެކޮޅުގެ ގޮތުގައި ރައްޔިތުން މަޖިލީހުގެ ރައީސް މުހައްމަދު ނަޝީދަށް މުރައިދޫގެ އަދި އުއްތަމަ ފަނޑިޔާރު މުއުތަސިމް އަދުނާނަށް ރެހެންދި އެޕާޓްމަންޓް ކޮމްޕެލްކްސް އިން އެޕާޓްމަންޓެއް ވަގުތީ ގޮތުން ހަމަޖެއްސުމަށް ނިންމައި އެގޮތަށް ހަމަޖެއްސެވީ 2021 ވަނަ އަހަރުގައެވެ.
ތިން ބާރުގެ ވެރިންގެ ތެރެއިން މަޖިލީހުގެ ރައީސްއަށާއި އުއްތަމަ ފަނޑިޔާރަށް ރަސްމީ ގެކޮޅު ހަމަޖައްސާ ގޮތަށް ގާނޫނަށް ބަދަލު ގެނައީ ނަޝީދު އަވަހާރަކޮށްލުމަށް ޓެރަރިސްޓް ހަމަލާއެއް ދިނުމާ ގުޅިގެންނެވެ. ރައީސް ނަޝީދު އޭގެ ކުރިން ދިރިއުޅުއްވަމުން ގެންދެވީ އެމަނިކުފާނުގެ ގ. ކެނެރީގޭގައެވެ.
