އުވާލާފައިވާ ދިވެހި ރައްޔިތުންގެ ޕާޓީ، ޑީއާރުޕީގެ ދަރަނި، ރައީސް މައުމޫން އަބްދުލްގައްޔޫމް ދައްކަވަން ޖެހިވަޑައިނުގަންނަވާނެ ކަމަށް ސިވިލް ކޯޓުން ހުކުމްކޮށްފިއެވެ.

ސިވިލް ކޯޓުން މީގެ ކުރިން 2010 ވަނަ އަހަރު ވަނީ އެމްޓީސީސީ އަށް ޑީއާރްޕީން 1،113،587.96ރ. ދައްކަން ޖެހޭ ކަމަށް ހުކުމްކޮށްފައެވެ. މި ފައިސާ ހުކުމާ އެއްގޮތަށް ނުދެއްކުމުން ޑީއާރްޕީގެ ބޭންކް އެކައުންޓްތަކުގައި ފައިސާ ހުރިތޯ ބަލައިގެން ވެސް ހޯދުނީ އެންމެ 2،609.33ރ. އެވެ.

ބާކީ 1،108،829.63ރ. ހޯދަން، ކޯޓުގެ ހުކުމް ތަންފީޒުކޮށްދިނުމަށް އެދި އެމްޓީސީސީން ދައުވާ ކުރުމުން، ސިޔާސީ ޕާޓީތަކުގެ ގަވައިދުގައި ބުނާ ގޮތަށް، ޕާޓީގެ ދަރަންޏަށް ޒިންމާވާނީ ޕާޓީ އުފެދުނު އިރު ހުރި ޕާޓީގެ އެންމެ އިސް ފަރާތް ކަމަށް ބުނާ މާއްދާއާ ހަވާލާދީ ކުރީގެ ރައީސް މައުމޫން އަބްދުލްގައްޔޫމް މައްސަލައިގެ ތެރެއަށް ވެއްދިއެވެ.

ހުކުމުން އެނގޭ ގޮތުގައި ޑީއާރުޕީގެ ބޭންކް އެކައުންޓުގައި އެންމެ 3000 ރުފިޔާވެސް މިހާރު ނެތެވެ. މި މައްސަލައާ ގުޅިގެން ޑީއާރުޕީގެ ފައިސާ ދެއްކުމަށް ސިޔާސީ ޕާޓީގެ ގަވާއިދާ ހަވާލާދީ ރައީސް މައުމޫނަށް އަންގާފައިވަނީ އެ ދަރަނި އުފެދުނުއިރު ޕާޓީގެ އެންމެ އިސް ފަރާތުގެ ގޮތުގައި ރައީސް މައުމޫން ހުންނެވުމުންނެވެ. އެހެންނަމަވެސް ސީދާ ރައީސް މައުމޫން އެ ފައިސާ ދައްކަވަން ޖެހޭ ކަމަށް އަމުރެއް ނެތުމުން، ރައީސް މައުމޫންގެ ފަރާތުން އެ ފައިސާ ދައްކަން އިންކާރު ކުރެއްވިކަން ކޯޓުގެ ހުކުމުން އެނގެއެވެ.

މި މައްސަލައިގައި ސިވިލް ކޯޓުގެ ގާޒީ ރިޒްމީނާ އިދްރީސް އިއްވި ހުކުމުގައި ބުނެފައިވަނީ، އެމްޓީސީސީއަށް ދައްކަން ޖެހޭ ފައިސާ ރައީސް މައުމޫން ދެއްކުމަށް އަމުރު ކުރާނެ ތަނެއް ނެތް ކަމަށެވެ.