ކުރިޔަށް އޮތް ރިޔާސީ އިންތިޚާބުގައި އިދިކޮޅު ކެނޑިޑޭޓެއްގެ ގޮތުގައި ރައީސް ޔާމީނަށް ވާދަ ނުކުރެވިއްޖެ ހާލަތެއްގައިވެސް ރިޔާސީ އިންތިޚާބަށް އެޕާޓީން އެހެން ހައްލެއް ދައްކާނެކަމަށް މަޑުއްވަރި ދާއިރާގެ މެމްބަރުން އަދި ޕީއެންސީގެ ނާއިބު ރައީސް އާދަމް ޝަރީފު ވިދާޅުވި ނަމަވެސް، އިދިކޮޅު ޕީޕީއެމް/ޕީއެންސީން އާދަމް ޝަރީފަށް ފިޔަވަޅު ނާޅާ ކަމުގެ ކަންބޮޑުވުން ޕީޕީއެމްގެ އިސް ބައެއް ބޭފުޅުން ފާޅުކޮށްފިއެވެ.
އިދިކޮޅު ޕީޕީއެމް/ޕީއެންސީގެ ލީޑަރޝިޕްގައިވެސް ހިމެނިވަޑަގަންނަވާ އާދަމް ޝަރީފް ރައީސް ޔާމިނަށް ކުރިމަތި ނުލެއްވޭނަމަ ޕީޕީއެމްއިން ރިޔާސީ އިންތިޚާބަށް އެހެން ހައްލެއް ހޯދާނޭކަމަށް ވިދާޅުވެފައިވަނީ ދުވަހު ނޫހަކަށް ޕީޕީއެމްގެ ރިޔާސީ ޓިކެޓާއި ގުޅޭގޮތުން މިއަދު މައުލޫމާތު ދެއްވަމުންނެވެ.
ރައީސް ޔާމިން ތަކުރާރުކޮށް ވިދާޅުވެފައި އޮންނާނެ މި ރިޔާސީ އިންތިޚާބުގައި ޕީޕީއެމްގެ ކެނޑީޑޭޓަކު ހުންނާނެއޭ. އެހެންވީމާ އެމަނިކްފާނަށް އިންތިޚާބަށް ކުރިމަތި ނުލެއްވޭ ހާލަތުގައި އޭގެ ފަރުވާ ހޯއްދަވާ ދެއްވާނެކަން ޔަގީން. އެހިސާބުން ބޮޑު މަންޒަރު ފެންނާނެ.
ޔާމިނަށް ރިޔާސީ އިންތިޚާބުގައި ވާދަ ނުކުރެއްވޭ ހާލަތުގައި ޔާމީން ނޫން އެހެން ކެނޑިޑޭޓަކު ހުންނާނޭކަމަށް މޭރުން ކުރައްވަމުން އާދަމް ޝަރީފް ވިދާޅުވެފައި ވެއެވެ. އެހެންނަނަމަވެސް ޔާމީނަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުއްވޭ ގޮތް ވެއްޖެނަމަ ދެން ޕީޕީއެމްގެ ކެނޑިޑޭޓަކު ދައްކާނީ ޕާޓީގެ ޕްރައިމަރީއަކުންތޯ ނުވަތަ ނޫންތޯ އާދަމް ޝަރީފް ވިދާޅުވެފައެއް ނުވެއެވެ.
ރައީސް ޔާމިން ނޫން ހައްލެއް އިދިކޮޅު ޕީޕީއެމްއިން ދައްކާނޭކަމަށް އާދަމް ޝަރީފު ވިދާޅުވިއިރު، މިމޭރުމުން މިހާތަނަށް ވާހަކަ ދައްކަވާފައިވާ ޕީޕީއެމް/އެންސީގެ ހުރިހާ މެމްބަރުނާމެދުވެސް ލީޑަރޝިޕުން ވަނީ ފިޔަވަޅު އަޅާފައެވެ.
އޭގެތެރެއިން އެންމެ ފުރަތަމަ ފިޔަވަޅުއަޅާފައިވަނީ މާލޭ ސިޓީގެ މޭޔަރ މުއިއްޒުއަށް ރިޔާސީ ޓިކެޓް ހޯދައިދިނުމަށް މަސައްކަތް ކުރިކަމުގެ ތުހުމަތުގައި ޕީޕީއެމްއަށް ނިސްބަތްވާ މާލޭ ސިޓީ ކައުންސިލްގެ މެދު ހެންވޭރު ދާއިރާގެ މެމްބަރު އާދަމް ރަމީޒަށެވެ. އޭނާގެ ސުލޫކީ މައްސަލައެއް ޕީޕީއެމްއިން ބަލަން ފަށާފަ ވަނިކޮށް ރަމީޒްވަނީ އެޕާޓީން ވަކިވެފައެވެ.
ރަމީޒަށް ފިޔަވަޅު އަޅާފައި ވަނިކޮށް، ޕީޕީއެމްގެ ރިޔާސީ ކެނޑިޑޭޓުގެ ރިޔާސީ ޓިކެޓަށް އުނިކަން ލިބޭގޮތަށް ސޯޝަލް މީޑިއާގައި ވާހަކަ ދެއްކި ކަމުގެ ތުހުމަތުގައި ޕީޕީއެމްގެ ލީޑަރޝިޕުން ވަނީ ޕާޓީގެ 6 ސެނެޓަރެއްގެ މައްސަލަ ތަހުގީގު ކުރަން ފަށާފައެވެ. އޭގެތެރޭގައި ހިމެނެނީ ސެނެޓްގެ މެމްބަރު އިސްމާއިލް ސުހައިލްއާއި، އެޕާޓީގެ ކުރީގެ ސެކެޓްރީ ޖެނެރަލް މުހައްމަދު ޝަކީލްއާއި، ޕާޓީގެ ސެނެޓަރ އެއްކަމުގައިވާ ގާނޫނީ ވަކީލް މުހައްމަދު ސަލީލް (ރޭނީސް ސަލީމް) އާއި ސެނެޓަރ މުއާޒު ހަލީމްއާއި، ސެނެޓަރ ފާތިމަތު ރުކުޝާނާއާއި، އަދި ސެނެޓަރއެއް ކަމުގައިވާ ފާތިމަތު ފަޒްލާގެ މައްސަލައެވެ.
މިހުރިހާ ފަރާތްތަކާމެދުވެސް ފިޔަވަޅު އަޅާފައިވަނީ، ޔާމީން ނޫން އެހެން ހައްލެއްގެ ވާހަކަ ދެކުމުން ޕީޕީއެމްގެ ރިޔާސީ ޓިކެޓަށް އުނިކަން އަންނަކަމަށް ބުނެއެވެ.
ޕީޕީއެމްގެ ސެނެޓްގައި ހިމެނޭ ބައެއް ފަރާތްތަކުން "ޚަބަރު އޮންލައިން" އާއި ވާހަކަ ދައްކަވަމުން ވިދާޅުވި ގޮތުގައި، ރައީސް ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެއްވޭނަމަ އިދިކޮޅު ޕީޕީއެމްއިން އެހެން ހައްލެއް ހޯދާނެ ވާހަކަ އާދަމް ޝަރީފު ވިދާޅުވިއިރު، މިމައްސަލާފައި މިހާތަނަށް ފިޔަވަޅު އަޅާފައިވާ ފަރާތްތަކުންވެސް ދައްކަވާފައި ވަނީ ހަމައެއް ވާހަަކައެއް އެއް މޭރުމަކުން ކަމުގައެވެ.
މިގޮތުން އެ ހުރިހާ ފަރާތަކުންވެސް ފާހަގަ ކޮށްފައިވަނީ، ރައީސް ޔާމިނަށް ފުރުސަތު ގެއްލިއްޖެ ހާލަތެއްގައި އިދިކޮޅުން އެހެން ހައްލެއް ރިޔާސީ އިންތިޚާބަށް ހޯދާން ޖެހޭ ވާހަކަކަމަށްވެސް "ޚަބަރު އޮންލައިން" އާއި ވާހަކަ ދެއްކި ޕީޕީއެމްގެ ސެނެޓަރުން ވިދާޅުވެފައި ވެއެވެ.
ފާއިތުވެދިޔަ ތަނުގައި، ރައީސް ޔާމިނަށް ކުރިމަތި ނުލެވޭ ހާލަތުގައި އެހެން ފަރާތަކުން ޕީޕީއެމްގެ ޓިކެޓްގައި ވާދަ ކޮށްފާނޭކަމަށް މޭރުންކޮށް ވާހަކަ ދެއްކެވި ޕާޓީގެ އެހެން ހުރިހާ މެމްބަރުންނާ މެދުވެސް ފިޔަވަޅު އަޅާފައިވާއިރު، އާދަމް ޝަރީފުވެސް ހަމަ މިބީދައިން ވާހަކަ ދެއްކެވި ނަމަވެސް ޕާޓީން އެމައްސަލަ ބަލަން ހަމަޖައްސާފަވާކަމެއް އަދި އެނގިފައެއް ނުވެއެވެ.
އާދަމް ޝަރީފްއަކީ ޔާމިންގެ ރިޔާސީ ޓިކެޓަށް އުނިކަން އަންނަގޮތަށް ވާހަކަ ދައްކާ ފަރާތްތަކަށް ފިޔަވަޅު އެޅުމަށް އުފައްދާފައިވާ ކޮމިޓީގައި ހިމެނޭ މެމްބަރެއްވެސްމެއެވެ. މި ކޮމިޓީގައި ހިމެނެނީ އާދަމް ޝަރީފްގެ އިތުރުން، ޕީއެންސީގެ ރައީސް އަދި މިވަގުތު ޕީޕީއެމް ހިންގުމާ ހަވާލުވެ ހުންނެވި އަބުދުއްރަހީމްއާއި، ނައިފަރު ދާއިރާގެ މެމްބަރު އަހުމަދު ޝިޔާމްއެވެ.
ޕީޕީއެމްގެ ބައެއް އިސް ފަރާތްތަކުން ވިދާޅުވާ ގޮތުގައި ރައީސް ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެވޭނެކަމަށް ބަލާ، ރިޔާސީ ޓިކެޓަށް ނުސީދާކޮށް މިހާރު އެންމެ ބޮޑަށް މަސައްކަތް ކުރައްވަމުން ގެންދަވާ އެއްފަރާތަކީ އާދަމް ޝަރީފެވެ.
