ކުރިޔަށް އޮތް ރިޔާސީ އިންތިޚާބުގައި އިދިކޮޅު ކެނޑިޑޭޓެއްގެ ގޮތުގައި ރައީސް ޔާމީނަށް ވާދަ ނުކުރެވިއްޖެ ހާލަތެއްގައިވެސް އިންތިޚާބުގައި ވާދަކުރާނޭ އެޕާޓީގެ ކެނޑިޑޭޓަކު ހުންނާނޭ ކަމުގައި ޕީއެންސީގެ ނާއިބު ރައީސް އާދަމް ޝަރީފު ވިދާޅުވެއްޖެއެވެ.
އެމްއެމްޕީއާރުސީގެ ޚިޔާނާތުގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ އިދިކޮޅު ކެނޑިޑޭޓު، ރައީސް ޔާމިނަށް ކުރިމަތި ނުލެވިއްޖެ ހާލަތެއްގައި ޔާމީން ނޫން ކެނޑިޑޭޓަކު ޕީޕީއެމްއިން ދައްކާނެކަމަށް މޭރުންކޮށް އާދަމް ޝަރީފު ވާހަކަ ދައްކަވާފައިވަނީ ދުވަހު ނޫހަކަށް މިއަދު މައުލޫމާތު ދެއްވަމުންނެވެ.
ރައީސް ޔާމިން ތަކުރާރުކޮށް ވިދާޅުވެފައި އޮންނާނެ މި ރިޔާސީ އިންތިޚާބުގައި ޕީޕީއެމްގެ ކެނޑީޑޭޓަކު ހުންނާނެއޭ. އެހެންވީމާ އެމަނިކްފާނަށް އިންތިޚާބަށް ކުރިމަތި ނުލެއްވޭ ހާލަތުގައި އޭގެ ފަރުވާ ހޯއްދަވާ ދެއްވާނެކަން ޔަގީން. އެހިސާބުން ބޮޑު މަންޒަރު ފެންނާނެ.
ޔާމިނަށް ރިޔާސީ އިންތިޚާބުގައި ވާދަ ނުކުރެއްވޭ ހާލަތުގައި ރައީސް ޔާމީން ނޫން އެހެން ކެނޑިޑޭޓަކު ހުންނާނޭކަމަށް މޭރުން ކުރައްވަމުން އާދަމް ޝަރީފް ވިދާޅުވިއެވެ. އެހެންނަނަމަވެސް ޔާމީނަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުއްވޭ ގޮތް ވެއްޖެނަމަ ދެން ޕީޕީއެމްގެ ކެނޑިޑޭޓަކު ދައްކާނީ ޕާޓީގެ ޕްރައިމަރީއަކުންތޯ ނުވަތަ ނޫންތޯ އާދަމް ޝަރީފް ވިދާޅުވެފައެއް ނުވެއެވެ.
ޕީޕީއެންއިން ޔާމިން ނޫން އެހެން ކެނޑިޑޭޓަކު ހުރެދާނެކަމަށް އާދަމް ޝަރީފް ވިދާޅުވެފައި ވާއިރު، ޔާމީނަށް ކުރިމަތި ނުލެވޭ ހާލަތުގައި އެހެން ކެނޑިޑޭޓަކު ހުންނަންޖެހޭނެ ކަމަށް ޚިޔާލު ފާޅުކުރި އެޕާޓީގެ މެމްބަރުންނާމެދު ޕީޕީއެމްގެ ލީޑަރޝިޕުން މިހާތަނަށްވަނީ ފިޔަވަޅު އަޅާފައެވެ.
އޭގެތެރެއިން އެންމެ ފުރަތަމަ ފިޔަވަޅުއަޅާފައިވަނީ މާލޭ ސިޓީގެ މޭޔަރ މުއިއްޒުއަށް ރިޔާސީ ޓިކެޓް ހޯދައިދިނުމަށް މަސައްކަތް ކުރިކަމުގެ ތުހުމަތުގައި ޕީޕީއެމްއަށް ނިސްބަތްވާ މާލޭ ސިޓީ ކައުންސިލްގެ މެދު ހެންވޭރު ދާއިރާގެ މެމްބަރު އާދަމް ރަމީޒަށެވެ. އޭނާގެ ސުލޫކީ މައްސަލައެއް ޕީޕީއެމްއިން ބަލަން ފަށާފަ ވަނިކޮށް ރަމީޒްވަނީ އެޕާޓީން ވަކިވެފައެވެ.
ރަމީޒަށް ފިޔަވަޅު އަޅާފައި ވަނިކޮށް، ޕީޕީއެމްގެ ރިޔާސީ ކެނޑިޑޭޓުގެ ރިޔާސީ ޓިކެޓަށް އުނިކަން ލިބޭގޮތަށް ސޯޝަލް މީޑިއާގައި ވާހަކަ ދެއްކި ކަމުގެ ތުހުމަތުގައި ޕީޕީއެމްގެ ލީޑަރޝިޕިން ވަނީ ޕާޓީގެ 6 ސެނެޓަރެއްގެ މައްސަލަ ތަހުގީގު ކުރަން ފަށާފައެވެ. އޭގެތެރޭގައި ހިމެނެނީ ސެނެޓްގެ މެމްބަރު އިސްމާއިލް ސުހައިލްއާއި، އެޕާޓީގެ ކުރީގެ ސެކެޓްރީ ޖެނެރަލް މުހައްމަދު ޝަކީލްއާއި، ޕާޓީގެ ސެނެޓަރ އެއްކަމުގައިވާ ގާނޫނީ ވަކީލް މުހައްމަދު ސަލީލް (ރޭނީސް ސަލީމް) އާއި ސެނެޓަރ މުއާޒު ހަލީމްއާއި، ސެނެޓަރ ފާތިމަތު ރުކުޝާނާއާއި، އަދި ސެނެޓަރއެއް ކަމުގައިވާ ފާތިމަތު ފަޒްލާގެ މައްސަލައެވެ.
ފާއިތުވެދިޔަ ތަނުގައި، ރައީސް ޔާމިނަށް ކުރިމަތި ނުލެވޭ ހާލަތުގައި އެހެން ފަރާތަކުން ޕީޕީއެމްގެ ޓިކެގައި ވާދަ ކޮށްފާނޭކަމަށް މޭރުންކޮށް ވާހަކަ ދެއްކެވި ޕާޓީގެ ހުރިހާ މެމްބަރުންނާ މެދުވެސް ފިޔަވަޅު އަޅާފައިވާއިރު، އާދަމް ޝަރީފުވެސް ހަމަ މިބީދައިން ވާހަކަ ދެއްކެވި ނަމަވެސް ޕާޓީން އެމައްސަލަ ބަލަން ހަމަޖައްސާފަވާކަމެއް އަދި އެނގިފައެއް ނުވެއެވެ.
އާދަމް ޝަރީފްއަކީ ޔާމިންގެ ރިޔާސީ ޓިކެޓަށް އުނިކަން އަންނަގޮތަށް ވާހަކަ ދައްކާ ފަރާތްތަކަށް ފިޔަވަޅު އެޅުމަށް އުފައްދާފައިވާ ކޮމޓީގައި ހިމެނޭ މެމްބަރެއްވެސްމެއެވެ. މި ކޮމިޓީގައި ހިމެނެނީ އާދަމް ޝަރީފްގެ އިތުރުން، ޕީއެންސީގެ ރައީސް އަދި މިވަގުތު ޕީޕީއެމް ހިންގުމާ ހަވާލުވެ ހުންނެވި އަބުދުއްރަހީމްއާއި، ނައިފަރު ދާއިރާގެ މެމްބަރު އަހުމަދު ޝިޔާމްއެވެ.
ޕީޕީއެމްގެ ބައެއް އިސް ފަރާތްތަކުން ވިދާޅުވާ ގޮތުގައި ރައީސް ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެވޭނެކަމަށް ބަލާ، ރިޔާސީ ޓިކެޓަށް ނުސީދާކޮށް މިހާރު އެންމެ ބޮޑަށް މަސައްކަތް ކުރައްވަމުން ގެންދަވާ އެއްފަރާތަކީ އާދަމް ޝަރީފެވެ.
2 Responses
ޕީޕީއެމްގެ ވަކި ބަޔަކަށްތޯ ޔާމީނަށް ކުރިމަތި ނުލެވޭ ވާހަކަ ދެއްކުމުގެ ހައިސިއްޔަތު ލިބިގެންވަނީ. ވަކި ބަޔަކު ދެއްކީމާ އެއީ މައްސަލައަކަށް ނުވަނީތޯ؟
އެޑަމަށް އެބަ އިނގޭ ބޮޑު މަންޒަރު އޮންނާނެގޮތް! ޔާމީނަށް ކުރިމަތި ނުލެވޭނެކަން! އެމަންޒަރުގައި އެޑަމް ނޫނީ ސައީދުކަން ތިބޭނީ! ޝިޔާމާއި އަދުރޭމެންވާނީ ހަމަ ފެއިލްކަން! އެޢީ ކުފޫހަވާ ބައެއް ނޫންކަން! މުއިޒަށް އަދި އަމުދުން ޗާންސެއް ނެތްކަން!