ދައުލަތުގެ ތިންބާރުގެ ތެރެއިން އެއްބާރުގެ މަސައްކަތް ހުއްޓުވާފައި ނުބާއްވައި ޤައުމަށް މުސީބާތަކަށް ނުވެ، މަޖިލިސް ރައީސް މުހައްމަދު ނަޝީދު މަޤާމުން އިސްތިއުފާ ދެއްވުމަށް މަރަދޫ ދާއިރާގެ މެމްބަރު އިބްރާހިމް ޝަރީފް ގޮވާލައިފިއެވެ.

މަޖިލީހުގެ ރައީސްކަމުގެ މަޤާމުން ނަޝީދު އިސްތިއުފާ ދެއްވުމަށް ޝަރީފް ގޮވާލީ މަޖިލީހުގެ އަމީން އާންމަށް އެޑްރެސް ކުރައްވައި މަޖިލީހުގެ ރައީސް މުހައްމަދު ނަޝީދު ފޮނުއްވި ސިޓީފުޅުގައި، އެމަނިކުފާނު ނިސްބަތްވެވަޑައިގަންނަވާ ޕާޓީ، މޯލްޑިވިއަން ޑިމޮކްރަޓިކް ޕާޓީގެ ގިނަ މެމްބަރުންތަކެއް ސޮއިކުރައްވާ އެމަނިކުފާނުގެ މައްޗަށް އިތުބާރު ނެތްކަމުގެ މައްސަލައެއް ހުށަހަޅުއްވާފައިވާތީ އެމައްސަލައަށް ވަކިގޮތެއް ނިމުމާ ހަމައަށް މަޖިލީހުގެ ޖަލްސާތަކުގެ ރިޔާސަތު ބެލެހެއްޓެވުމަށް އުޒުރުވެރިވެ ވަޑައިގަންނަވާ ކަމަށް ވިދާޅުވުމާއި ގުޅިގެންނެވެ.

މިކަމާއި ގުޅިގެން ޝަރީފް ވިދާޅުވީ މަޖިލީހުގެ މަސައްކަތްތަކަކީ ވަކި މީހަކު ބޭނުންވީމާ ހުއްޓާލާފައި ބޭއްވޭނެ ކަމެއް ނޫންކަމަށެވެ. މަޖިލީހުގެ ނައިބް ރައީސް އީވާގެ މައްސަލަ ކުރިއަށްގެންދާނެ ހިތްވަރު ނެތްކަމުގައިވާނަމަ، ރީތި ގޮތަކީ މަޤާމުން އިސްތިއުފާ ދެއްވުން ކަމަށް ޝަރީފް ވިދާޅުވިއެވެ.

ރައްޔިތުންގެ މަޖިލީހުގެ ރައީސް ކަމަކީ ބޭނުންފުޅު ވީމާ މަސްއޫލިއްޔަތު އަދާ ކުރައްވަން އުޒުރުވެރިވެވޭ ގޮތަށް އޮތްކަމެއްނޫން. މަޖިލީހުގެ ނައިބް ރައީސް އީވާގެ ވޯޓު ނަގަން އުޒުރުވެރިވާނަމަ މެޖޯރިޓީގެ އިތުބާރު ނެތް ހާލަތުގައި މަޤާމުގަ ބަގުޑި ބައްދައިގެން ނުހުންނަވާ އިސްތިއުފާ ދެއްވާ. ޤައުމަށް ބޮޑު މުސީބާތަކަށްނުވެ.

– ޝަރީފް ވިދާޅުވިއެވެ.

މަޖިލީހުގެ ނައިބް ރައީސް އީވާގެ އިތުބާރު ނެތް ކަމަށް މަޖިލީހަށް ހުށަހަޅުއްވާފައިވާ މައްސަލައިގެ 14 ދުވަހުގެ ނޯޓިސް މިއަދަށްވަނީ ހަމަވެފައެވެ. ނަމަވެސް މިއަދު މަޖިލީހުގެ ޖަލްސާއެއް ބާއްވާފައި ނުވެއެވެ. އެހެންކަމުން މާދަމާ މަޖިލީހުގެ ޖަލްސާއެއް ބާއްވަން ޖެހޭއިރު މިޖަލްސާގެ ރިޔާސަތު ބަލަހައްޓަވަން ޖެހިވަޑައިގަންނަވާނީ މަޖިލީހުގެ ރައީސަށެވެ.

ރައްޔިތުންގެ މަޖިލީހުގެ ގަވާއިދުގެ 44 ވަނަ މާއްދާގައި ބުނެފައިވަނީ މަޖިލީހުގެ ރައީސް އާއި މަޖިލީހުގެ ނައިބު ރައީސް ރިޔާސަތު ބެލެހެއްޓުން އުޒުރުވެރިވެއްޖެ ހާލަތެއްގައި، ރިޔާސަތު ބަލަހައްޓާނެ މެމްބަރުން ގާނޫނު އަސާސީގެ 82 ވަނަ މާއްދާގެ ށ. ގައިވާ ގޮތުގެ މަތިން މަޖިލީހުގެ ރައީސް ކަނޑައަޅަންވާނެ ކަމަށެވެ.

ގާނޫނު އަސާސީގެ 82 ވަނަ މާއްދާގެ ށ. ގައި ބުނަނީ "ރައްޔިތުންގެ މަޖިލީހުގެ ޖަލްސާތަކުގެ ރިޔާސަތު ބަލަހައްޓާނީ އެ މަޖިލީހުގެ ރައީސް" ކަމަށާއި "މަޖިލީހުގެ ރައީސް ހާޒިރު ނުވާ ނަމަ ރިޔާސަތު ބަލަހައްޓާނީ ނައިބު ރައީސް" ކަމަށާއި "ރައީސް އާއި ނައިބު ރައީސް ހާޒިރު ނުވާނަމަ މަޖިލީހުގެ ގަވާއިދުގައިވާ ގޮތުގެމަތިން އެ ޖަލްސާގެ ރިޔާސަތު ބަލަހައްޓާނޭ މީހަކު ކަނޑައަޅާނީ" ކަމަށެވެ.