އަފްއާނިސްތާން ސަރުކާރާއި ތާލިބާނުން، ސުލްހައިގެ އެއްބަސްވުމެއްގެ ސޮއިކުރުމަށް ތައްޔާރު ވަމުންދާކަމަށް، ސުލްހައިގެ ވާހަކަތަކުގައި ބައިވެރިވަމުންދާ ދެފަރާތުގެ އިސް އޮފިޝަލުން ވިދާޅުވެއްޖެއެވެ.
މީޑިއާތަކުން ރިޕޯޓު ކޮށްފައިވާ ގޮތުގައި، އަފްއާނިސްތާން ސަރުކާރާ ތާލިބާނުން އެއްބަސްވެފައިވަނީ، ސުލްހައިގެ ވާހަކަތަކުގައި ކުރިޔަށްހުރި މުހިންމު ކަންކަމާއި މަޝްވަރާކޮށް، އަދި އަމަލީގޮތުން ތަންފީޒު ކުރަންޖެހޭ މުހިންމު ކަންކަމަށް އަމަލީސިފަ ގެންނާނެ ގޮތްތަކާ ގުޅޭގޮތުންނެވެ.
މިގޮތުން، މިއެއްބަސްވުމުގައި ދެފަރާތުން ސޮއިކުރުމާއެކު މިއެއްބަސްވުން ވެގެންދާނީ، ފާއިތުވި 19 އަހަރު ދުވަހުގެ ތެރޭގައި އަފްއާނިސްތާން ސަރުކާރާ ތާލިބާނުންނާ ދެމެދު ލިޔެކިޔުމުން ސޮއިކުރެވޭ މިފަދަ ފުރަތަމަ އެއްބަސްވުން ކަމުގައެވެ.
އަންގާރަ ދުވަހު ދެފަރާތުން އެއްބަސްވެފައި މިވާ ކަންކަމަކީ، މުހިންމު ކަންކަމުގެ ގޮތުގައި ދެފަރާތުންވެސް ފާހަގަ ކުރާ މައިގަޑު ސަބަބުތަކަކީ، މި އެއްބަސްވުމުގެ ނަތީޖާއެއްގެ ގޮތުން، ހަގުރާމަ ހުއްޓާލުމާއި ގުޅޭ މަޝްވަރާތައް ފެށުމަށް މަގުފަހި ކޮށްދޭތީއެވެ.
"ކުރިޔަށް ހުރި ވާހަކަތައް ކުރިޔަށް ގެންދިއުމަށް ބޭނުންވާ މިސްރާބު މިހާރު މިވަނީ ވަރަށް ބޮޑަށް ސާފުވެގެން ގޮސްފަ. ދެން ކުރަން ޖެހިފަ އޮތް ކަމަކީ، ކުރިޔަށް ހުރި ވާހަކަތަކުގެ އެޖެންޑާ ކަޑައެޅުން،" އަފްއާނިސްތާން ސަރުކާރުގެ ފަރާތުން މަޝްވަރާތަކުގައި އިސްކޮށް އުޅޭ ނަދާރ ނެދުރީ ރޮއިޓާސްއަށް މައުލޫމާތު ދެމުން ވިދާޅުވެފައި ވެއެވެ.
ތާލިބާންގެ ތަރުޖަމާންވެސް ވަނީ މިމޭރުމުން ޓުވީޓު ކުރައްވާފައެވެ.
އެމެރިކާއިން އަފްއާނިސްތާނަށް ކަޑައަޅާފައި ހުންނަވާ ޚާއްސަ މަންދޫބު، ޒަލްމޭ ޚަލީޒާދު ވިދާޅުވެފައި ވަނީ، ދެފަރާތުންވެސް، "ސިޔާސީ ރޯޑް މެޕެއް އެކުލަވާލުމަށާއި އަދި ހަގުރާމަ ހުއްޓާލުމާ ގުޅޭ މަޝްވަރާތައް ކުރިޔަށް ގެންދާނެ ގޮތުގެ އުސޫލުތަލާއި ގަވާއިދުތައް އެކުލެވޭ ތިން ސޮފްހާގެ އެއްބަސްވުމެއް މިހާރު އެކުލަވާލެވި ނިމިފައި" ވާކަމަށެވެ.
އަފްއާނިސްތާން ސަރުކާރާ ތާލިބާނުންނަށް އެއްބަސްވުމަކަށް އާދެވިފައި މިވަނީ، 3 މަސްދުވަސް ވަންދެން، ދޯހާގައި މިދެފަރާތުން ކުރިޔަށް ގެންދިޔަ ސުލްހައިގެ ވާހަކަތަކަށް ފަހުގައެވެ. މި ވާހަކަތައް ކުރިޔަށް ގެންދިއުމުގައި އެހީތެރިކަން ފޯރުކޮށްދީފައި ވަނީ އެމެރިކާއިންނެެވެ.
ތާލިބާނުންނާއި އަފްއާނިސްތާނުން ސުލްހައިގެ އެއްބަސްވުމެއްގައި ސޮއިކުރުމަށް ހަމަޖެހިފައިވީ ނަމަވެސް، އަފްއާނިސްތާނުގައި ދެފަރާތުން އަދިވެސް ދަނީ ހަގުރާމައިގެ ހަމަލާތައް ބަދަލު ކުރަމުންނެވެ.
ދުނިޔޭގެ ގައުމުތަކުންނާއި އަދި ހުޅަގުގެ ބާރުތަކުން، ވާހަކަތައް ކުރިޔަށް ދާދުވަސްވަރު ހަގުރާމަ ހުއްޓާލުމަށް ތާލިބާނުންނަށް ގޮވާލާފައިވި ނަމަވެސް، ދެފަރާތުން އެއްބަސްވާ ކަންކަމުގެ މައްޗަށް އެއްބަސްވުމަކަށް ނާދެވެނީން ހަގުރާމަ ހުއްޓާލުމަށް ތާލިބާނުން ވަނީ ދެކޮޅު ހަދާފައެވެ.
ޔޫއެންއިން އަފްއާނިސްތާނަށް ކަޑައަޅާފައި ހުންނަވާ މަންދޫބު، ދެބޯރާ ލިއޮންސް ވަނީ ދެފަރާތުގެ މަޝްވަރާތަކަށް ލިބިގެން ދިޔަ ކުރިއެރުމަށް މަރުހަބާ ވިދާޅުވެފައެވެ. އަދި ޓުވިޓާގައި ވިދާޅުވެފައި ވަނީ، "މިއީން އުމީދީ ކުރިއެރުމެއް" ކަމުގައެވެ. އަދި ވިދާޅުވެފައިވަނީ، "މި ކުރިއެރުން ވެގެންދާނީ، އަފްއާނިސްތާނުގެ ރައްޔިތުން ބޭނުންވާ ސުލްހަ ގެނައުމުގެ ހަގީގީ ބިންގާ" ކަމުގައެވެ.
ފާއިތުވެދިޔަ މަހު، ދެފަރާތުގެ ދެމެދުގައި އެކުލަވާލެވުނު އެއްބަސްވުމާއި ތާލިބާނުން ވަނީ އެންމެ ފަހުވަގުތުން ދެކޮޅު ހަދާފައެވެ. މި އެއްބަސްވުމުގައި ސޮއިކުރުމަށް ތާލިބާނުން ދެކޮޅުހެދީ، އެއްބަސްވުމުގެ ދެލި ކޮޕީގައި، މަޝްވަރާތަކުގައި އަފްއާނިސްތާންގެ ސަރުކާރުންގެ ފަރާތުން ބައިވެރިވަނީ އެގައުމުގެ މިހާރުގެ ސަރުކާރު ތަމްސީލުކުރާ މަންދޫބުންކަމުގައި ލިޔުމާއި ގުޅިގެންނެވެ.
ދެފަރާތުގެ ދެމެދުގައި ވެވޭ އެއްވެސް އެބަސްވުމެއްގައި މިހާރުގެ ސަރުކާރުގެ ނަން ލިޔެވިފައި އޮންނާކަށް ތާލިބާނުން ބޭނުމެއް ނުވެއެވެ. ސަބަބަކީ، އަފްއާނިސްތާނުގެ މިޙާރުގެ ރައީސް އަޝްރަފް ޢަނީގެ ސަރުކާރު އަދިވެސް ތާލިބާނުން ގަބޫލު ކޮށްފައި ނުވާތީއެވެ.
