މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ބަލި ކުރުމަކީ ފަސޭހަ ކަމަކަށް ނުވާނެކަން އިދިކޮޅު ފަރާތްތަކަށްވެސް އިއްތިފާގު ވެވޭ ކަމުގައި އެމްޑީޕީގެ ކުރީގެ ޗެއާޕަސަން މޫސާ މަނިކު ވިދާޅުވެއްޖެއެވެ.

އިދިކޮޅު ފަރާތްތަކުން ޗާގޯސް މައްސާލައި އުފައްދާފައިވާ ކޯލިޝަނުން ގުޅިގެން ރޭ ކާނިވާ ސަރަހައްދުގައި ބޭއްވި ޖަލްސާގައި ވަނީ މިސަރުކާރު ބަދަލު ކުރުމަށް އެކަތިގަނޑަކަށް ތިބިކަމުގެ މެސެޖުތަކެއް ދެއްވާފައެވެ. މިގޮތުން މިސަރުކާރު ބަދަލު ކުރުމަށް އެންމެބޮޑަށް ވާހަކަ ދެއްކީ އެމްޑީޕީގެ ރައީސް ނަޝީދަށް ތާއީދުކުރާ ދަ ޑީމޮކްރެޓްސްގެ އުނގޫފާރު ދާއިރާގެ މެމްބަރު ވައްޑެއެވެ.

ރޭގެ ޖަލްސާގައި ވައްޑެ ވިދާޅުވީ ސިޔާސީ ތަފާތު ވިސްނުން ހުރި ނަމަވެސް ސަރުކާރާ ދެކޮޅު ފަރާތްތަކުން އެއްކަމަކަށް އެއްބަސް ވެވިއްޖެކަމަށާއި އެ ފަރާތްތަކުން ސެމްޓެމްބަރު 9 ގައި އޮން ރިޔާސީ އިންތިހާބުގައި މި ވެރިކަން ބަދަލުކުރާނެކަމަށެކަމަށެވެ. ވައްޑެ ވިދާޅުވީ ރައީސް އިބްރާހިމް ރާއްޖޭގެ ކަނޑުގެ ސަރަހައްދުން ބޮޑު ބައެއް ދޫކޮށްލާފައިވާކަމަށާއި އެމަނިކުފާނުވަނީ ގައުމަށް ހިޔާނާތްތެރިވެ ޣައްދާރުވެފައިކަމަށެވެ.

މިވާހަތަކާއި ގުޅިގެން މޫސަ ވިދާޅުވީ ވެރިކަން ބަދަލު ކުރަން އެންމެން އެއްގަލަކަށް އަރިކަމަށް ބުނާއިރު، އެއިން އެއްވެސް ބޭފުޅަކަށް ވާދަކުރާނެ ކެނޑިޑޭޓަކު ދެއްކިފައި ނުވާކަމަށެވެ. ނަމަވެސް އެންމެވެސް އިއްތިފާގުވާ ކަމަކީ ރައީސް އިބްރާހިމް މުހައްމަދު ޞާލިހުގެ ވެރިކަން ބަދަލު ކުރުމަކީ ފަސޭހަ ކަމަކަށް ނުވާނެކެވެ.

ފެޅައު ކޯލިޝަނުގެ އެކަކަށްވެސް ނުކެރޭ ބުނާކަށް ވެރިކަން ބަދަލުކުރަން އެންމެން ގުޅިގެން ގެންނާނީ ކޮން ޕާޓީއެއްގެ ކޮން ކެންޑިޑޭޓެއްކަމެއް. އެންމެންވެސް އިއްތިފާގުވޭ ރައީސް ސޯލިހު ބަލިކުރަން ފަސޭހަ ނުވާނެކަން އިބޫ 2023 ބޮޑުކޮށް ނަގާނެ.

– މޫސަ ވިދާޅުވިއެވެ.

ރޭގެ ޖަލްސާގައި އިދިކޮޅު ފަރާތްތަކުން އެކަތިގަނޑަކަށް ވެގެން މިހާރުގެ ސަރުކާރު ބަލި ކޮށްލާނެ ކަމަށް މޯލްޑިވްސް ނޭޝަނަލް ޕާޓީ (އެމްއެންޕީ)ގެ ރައީސް އަދި ދަނގިތެި ދާއިރާގެ މެމްބަރު ކާނަލް މުހައްމަދު ނާޒިމްވެސް ވަނީ ވިދާޅުވެފައެެވެ.

ރާއްޖޭގެ ކަނޑުގެ ސަރަހައްދު ވިއްކާލުމާއި ދެކޮޅަށް ވާހަކަ ދައްކަވަމުން ނާޒިމް ވިދާޅުވީ، ގެއްލިގެން ދިޔައީ ރާއްޖޭގެ ސިޔާދަތުގެ ތެރޭގައިވާ ބޮޑު ތަނެއް ކަމަށާއި އެހެންކަމުން މިއީ މަޑުން ތިބެވޭނެ ވަގުތެއް ނޫން ކަމަށެވެ. އެކަމާއި ގުޅިގެން މަގުމަތީގައި ވެސް އަޑޫ އުފުލަން ޖެހިއްޖެނަމަ، އެކަން ކޮށްގެން ވެސް ކާމިޔާބު ހޯދާނެ ކަމަށް ނާޒިމް ވިދާޅުވިއެވެ.

ނާޒިމް ވިދާޅުވީ، ރާއްޖެ މިނިވަންވިތާ 50 އަހަރު ވެގެން ދިޔައިރު، ރާއްޖޭގެ ކަނޑުގެ ސަރަހައްދެއް އޭރު ވެރިކަމުގައި ތިބި އެއްވެސް ބޭފުޅަކު ދޫކޮށް ނުލައްވާ ކަމަށާއި ނަމަވެސް މިއަދުގެ ސަރުކާރުން ފޮނުވާލި ސިޓީއަކުން ބޮޑު ގެއްލުމެއް ރާއްޖޭގެ މަސްވެރިންނަށާއި ދިވެހިންނަށް ލިބިގެން ގޮސްފައިވާ ކަމަށެވެ.

މިކަންކަން މިހެން އޮތުމުން ހައްލެއް ހޯދުމަށް ފުންކޮށް ވިސްނަން ޖެހޭ ކަމަށާއި މިސަރުކާރު ބަލިކޮށްލަން ޖެހޭ ކަމަށް ނާޒިމް ވަނީ ތަކުރާރުކޮށް ވިދާޅުވެފައެވެ.