ރާއްޖޭގެ ކަނޑު ހޯދުމަށް ކުރާންވީ މަސައްކަތަކީ ފޯޅަވަހި ހޯދުން ކަމުގައި، ޕީޕީއެމް ހިންގުމާ ހަވާލުވެ ހުންނެވި ޕީއެންސީގެ ރައީސް އަބުދުއްރަހީމް ވިދާޅުވެއްޖެއެވެ.
މިރޭ ޗާގޮސް ކޯލިޝަނުން ބޭއްވި ޖަލްސާގައި ވާހަކަ ދައްކަވަމުން އުބުދުއްރަހީމް ވިދާޅުވީ ރާއްޖޭގެ އިން ފެށިފައި އޮތީ އެއްކޮޅުން މަލިކާއި ހަމައިން ކަމަށާއި، އަނެއް ކޮޅުން ޗާގޮސްހާ ހަމައިން ކަމުގައެވެ. އެގޮތުން ފޯޅަވައްސަކީ ދިވެހިރާއްޖޭގެ ގޯތީގެ ބައެއްގެ ގޮތުގައި ސިފަ ކުރައްވަމުން އަބުދުއްރަހީމް ވިދާޅުވީ ފޯޅަވައްސަކީ ދިވެހިންގެ ބައެއްކަން އެނގޭ ވަރަށްގިނަ ހެކިތައް ހުރި ކަމުގައެވެ.
އޭގެ ތެރެއިން އެންމެ ފާޅުކަންބޮޑު އެއް ހެއްކެއްގެ ގޮތުގައި، ކިތާބީ ހެއްކެއްގެ ގޮތުގައި މިބުނަނީ ނުވަވަނަ ހަސަން ރަސްގެފާނު ލިޔުއްވި ސިޓީއެއްގެ ވާހަކަ. އެ ސިޓީގެ ތަފްސީލަށް ދާކަށް ނެތިން. އެހެންނަމަވެސް މިތާގަ އަޅުގަޑު ފާހަގަ ކޮށްލާން ބޭނުންވާ ކަމަކީ މި ހަސަން ރަސްގެފާނަކީ ވަރަށް ޒުވާން ބޭފުޅެއް. އުމުރުން އެންމެ 19 އަހަރުގެ ޒުވާނެއް. ދިވެހި ރަސްކަމާއި، ޕޯޗުގީޒުގެ އަންހެން ކުއްޖެއްގެ ހައްގުގަ މާތްވެގެންވާ އިސްލާމްދީން ދޫކުރެއްވި ބޭފުޅެއް. އެކަމަކު މި ދެންނެވިހެން ދިވެހި ރަސްކަމާއި، ޕޯޗުގީޒުގެ އަންހެން ކުއްޖެއްގެ ހައްގުގަ އިސްލާމްދީން ދޫކޮށްލެއްވި ރަދުންވެސް ދިވެހިރާއްޖޭގެ ބިމުން ބައެއް ދޫ ނުކޮށްލައްވާ.
ޗާގޮސްއަކީ ރާއްޖޭގެ ބައެއްކަމަށް ތާރީޚު ހެކިދޭކަމަށް ވިދާޅުވަމުން އަދުރޭ ވިދާޅުވިއެވެ.
އަބުދުއްރަހީމް ވިދާޅުވީ ޗާގޮސް ކޯލިޝަންގެ ހުރިހާ ބައިވެރިންވެސް ތިބީ ސިޔާސީ ހުރިހާ ޚިޔާލު ތަފާތުވުމެއް އެއްކައިރިކޮށް، އެކީގައި މަސައްކަތް ކޮށް ސަރުކާރު ބަދަލު ކުރުމަށް އަޒުމް ކަނޑައަޅައިގެން ކަމުގައެވެ.
އިތުރަށް ވާހަކަ ދައްކަވަމުން އަބުދުއްރަހީމް ވިދާޅުވީ ފޯޅަވަހީގެ މައްސަލާގައި މިހާތަނަށް ކުރި މަސައްކަތަކީ ވަރަށް ކާމިޔާބު މަސައްކަތެއް ކަމަށާއި، އެމަސައްކަތް އެހާބޮޑަށް ކާމިޔާބުވީ ޗާގޮސް ކޯލިޝަންގެ ހުރިހާ ބައިވެރިން ގައުމީ މަސްލަހަތު އިސްކުރުމުގެ ސަބަބުން ކަމުގައެވެ.
އަބުދުއްރަހީމް ވިދާޅުވީ މިއީ ފެށުމެއް ކަމަށާއި، މިހާރު ފެށުނު މަސައްކަތް ނިންމާނީ މިވެރިކަން ބަދަލު ކޮށްގެން ކަމަށާއި، ކަނޑުން ގެއްލުނު ބައި ހޯދެން އޮތީ މި ސަރުކާރު ބަދަލު ކޮށްގެން ކަމުގައެވެ. އޭނާވަނީ ސިޔާސީ ތަފާތު ފިކުރުގެ ހުރިހާ ބޭފުޅުންނަށް އެއްބަހެއް ކިޔޭ 2 ކަމެއް ފެނިއްޖެ ކަމުގައެވެ. އެ ދެކަމުގެ ގޮތުގައި އޭނާ ފަހަގަ ކުރެއްވީ ކަނޑުން ގެއްލިގެން ދިޔަބައި އަނބުރާ އިއާދަކުރުމުގެ އިތުރުން މިވެރިކަން ބަދަލު ކުރުމެވެ.
އަބުދުއްރަހީމް ވިދާޅުވީ ކުރިޔަށް އޮތް ރިޔާސީ އިންތިޚާބު ކާމިޔާބުކޮށް، ރާއްޖެއަށް އަމާންކަމާއި ރޯޝަނީކަން އެކޯލިޝަނުން ގެނެސްދޭނެ ކަމުގައެވެ. އެހެންނަމަވެސް ރިޔާސީ އިންތިޚާބު ކާމިޔާބު ކުރާނީ ކޯލިޝަންގައި ހިމެނޭ ކޮން ބޭފުޅެއްކަމެއް އަބުދުއްރަހިމް ފާހަގަ ކޮށްފައެއް ނުވެއެވެ.
