އެމްޑީޕީ ބައިބައިވެ، އެޕާޓީން މިހާރު ވަކިވެފައިވާ، ނަޝީދުގެ ފިކުރެއްގެ ދިރުމަށް ނިސްބަތްވާ އިސް ފަރާތްތަކުން ކުރީގެ ރައީސް ވަހީދުއާއެކީ، މިރޭ ކުރިޔަށްދާ ޗަގޮސް ޖަލްސާގައި ބައިވެރި ވެއްޖެއެވެ.

މިރޭ ބާއްވަމުންދާ ޗާގޮސް ޖަލާސާގެ އެންމެ ކުރީ ސަފުގައި ކުރީގެ ރައީސް ޑރ. ވަހީދު އިންނެވެއިރު، ރައީސް ވަހީދާއި އެއް ސަފެއްގައި ތިއްބެވި ފިކުރެއްގެ ދިރުމުގެ އިސް ބޭފުޅުންގެ ތެރޭގައި ރައްޔިތުންގެ މަޖިލިހުގެ ހެންވޭރު ހުޅަނގު ދައިރާގެ މެމްބަރު ހަސަން ލަތީފުއާއި، އުނގޫފާރު ދާއިރާގެ މެމްބަރު މުހައްމަދު ވަހީދުއާއި، މެދުހެންވޭރު ދާއިރާގެ މެމްބަރު އަލީ އާޒިމްގެ އިތުރުން ރައްޔިތުންގެ މަޖިލިހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީވެސް ހިމެނިވަޑައިގަންވައެވެ.

މިރޭގެ ޖަލްސާގެ އެންމެ ކުރީގައި ރައީސް ވަހީދާއި ނަޝީދުގެ ފިކުރެއްގެ ދިރުން ސިޔާސީ ހަރަކާތުގެ ވެރީން އެއްގަލަކަށް އަރާފައިވާއިރު، މީގެ ކުރިން ނަޝީދު ވިދާޅުވެފައިވަނީ ދުވަހަކުވެސް ރައީސް ވަހީދުއާއެކީ ސިޔާސީ މަސައްކަތެއް ނުކުރައްވާނެ ކަމުގައެވެ. އަދި ނަޝީދުއާއި ނަޝީދުއަށް ތާއީދުކުރާ ފަރާތްތަކުން އަބަދުވެސް ތުހުމަތު ކޮށްފައިވަނީ ރައީސް ވަހީދު ވެރިކަމަށް ވަޑައިގެންނެވީ ބަޢާވާތަކުން ވެރިކަން ބަދަލު ކޮށްގެން ކަމުގައެވެ.

މިރޭގެ ޖަލްސާގައި ބައިވެރިވަޑައިގެންނެވި ފިކުރެއްގެ ދިރުމުގެ އިސް ބޭފުޅުންނަކީ ފާއިތުވެދިޔަ ތަނުގައި ރައީސް ވަހީދަށް ނިސްބަތްކޮށް އެންމެ ބޮޑަށް ފާޑުވިދާޅުވި ބޭފުޅުންކަންވެސް ފާހަގަ ކޮށްލެވެއެވެ.

އަދި މިރޭގެ ޖަލްސާގައި ފިކުރެއްގެ ދިރުމުގެ ފަރާތުން ވާހަކަ ދައްކަވަމުން އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވީ، ޗާގޮސް ކޯލިޝަންގެ ހުރިހާ ބައިވެރިންވެސް އެކުވެ ތިބީ މި ސަރުކާރު ބަދަލު ކުރުމަށް ބައިއަތު ހިފައިގެން ކަމުގައެވެ.