އިދިކޮޅު ޕީޕީއެމްގެ ރިޔާސީ ކެނޑިޑޭޓް، ކުރީގެ ރައީސް ޔާމިންގެ ރިޔާސީ ޓިކެޓަށް އުނިކަން ލިބޭގޮތަށް ވާހަކަ ދެއްކިކަމުގެ ތުހުމަތުގައި އިދިކޮޅު ޕީޕީއެމްގެ 6 ސެނެޓަރެއްގެ މައްސަލަ ތަހުގީގު ކުރަން ފަށައިފިއެވެ.
"ޚަބަރު އޮންލައިން" އަށް މައުލޫމާތު ލިބިފައިވާ ގޮތުގައި ޕީޕީއެމްގެ ރިޔާސީ ކެނޑިޑޭޓުގެ ރިޔާސީ ޓިކެޓަށް އުނިކަން ލިބޭގޮތަށް ސޯޝަލް މީޑިއާގައި ވާހަކަ ދެއްކި ކަމުގެ ތުހުމަތުގައި ތަހުގީގު ކުރަން ފަށާފައިވަނީ އެޕާޓީގެ ސެނެޓްގެ މެމްބަރު އިސްމާއިލް ސުހައިލްއާއި، އެޕާޓީގެ ކުރީގެ ސެކެޓްރީ ޖެނެރަލް މުހައްމަދު ޝަކީލްއާއި، ޕާޓީގެ ސެނެޓަރ އެއްކަމުގައިވާ ގާނޫނީ ވަކީލް މުހައްމަދު ސަލީލް (ރޭނީސް ސަލީމް) އާއި ސެނެޓަރ މުއާޒު ހަލީމްއާއި، ސެނެޓަރ ފާތިމަތު ރުކުޝާނާއާއި، އަދި ސެނެޓަރއެއް ކަމުގައިވާ ފާތިމަތު ފަޒްލާގެ މައްސަލައެވެ.
"ޚަބަރު އޮންލައިން" އާއި މައުލޫމާތު ހިއްސާ ކުރި ފަރާތުން ވިދާޅުވި ގޮތުގައި މިމައްސަލަ ލީޑަރޝިޕަށް ހުށަހަޅާފައިވަނީ ރައްޔިތުންގެ މަޖިލިހުގެ މަޑުއްވަރި ދާއިރާގެ މެމްބަރު އާދަމް ޝަރީފްއެވެ. އަދި ލީޑަރޝިޕް އިން ވަނީ މިމައްސަލަތައް ބެލުމަށް ޚާއްސަ ކޮމިޓީއެއް މިހާރު އެކުލަވާލާފައެެވެ.
އެކޮމިޓީގައި ހިމެނިވަޑައިގަންނަވަނީ މަޑުވަރި ދާއިރާގެ މެމްބަރު އާދަމް ޝަރީފްއާއި، ނައިފަރު ދާއިރާގެ މެމްބަރު އަހުމަދު ޝިޔާމްގެ އިތުރުން ޕީޕީއެމް ހިންގެވުމާއި މިވަގުތު ހަވާލުވެ ހުންނެވި އަބުދުއްރަހީމްއެވެ.
މިގޮތުން 5 ސެނެޓަރުން ރޭވަނީ މި ކޮމިޓީއަށް ހާޒިރުކޮށް ބަޔާން ނަގާފައިކަމަށްވެސް ވަނީ މައުލޫމާތު ލިބިފައެވެ. 6 ސެނެޓަރުންގެ ތެރޭގައި ހިމެނޭ މުއާޒް ހަލީމް ދިރިއުޅުއްވަނީ މެލޭޝިއާގައި ކަމަށްވުމުން ތަހުގީގު ކޮމިޓީއަށް އަދިވަނީ އޭނާގެ ބަޔާން ނެގޭ ގޮތް ނުވެފައެވެ. މިމައްސަލަ ތަހުގީގު ކުރުމަށް އުފައްދާފައިވާ ތަހުގީގު ކޮމިޓީން މައްސަލަ ބެލުމަށްފަހު މައްސަލަ ދެންދާނީ ޕީޕީއެމްގެ ސުލޫކީ ކޮމިޓިއަށްކަމަށްވެސް "ޚަބަރު އޮންލައިން"އަށް ވަނީ މައުލޫމާތު ލިބިފައެވެ.
އިދިކޮޅު ޕީޕީއެމްގެ ފަރާތުން ރައީސް ޔާމިންއަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެވި، އިދިކޮޅު ޕީޕީއެމްގެ ފަރާތުން ރިޔާސީ އިންތިޚާބުގައި ވާދަކުރާނޭ ފަރާތެއް ސާފުނުވެ ލަސްވާތީ އެޕާޓީގެ ސެނެޓްގެ ބައެއް ބޭފުޅުން އިއްޔެވަނީ ކަންބޮޑުވުން ފާޅުކޮށްފައެވެ.
ޕީޕީއެމްގެ ލީޑަރޝިޕުން އެޕާޓީން ރިޔާސީ ކެނޑިޑޭޓަކީ ރައީސް ޔާމިންކަމަށް ވިދާޅުވަމުން ގެންދެވިނަމަވެސް، ޔާމިން ގެންދަވަނީ 11 އަަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އަދި އޭގެ އިތުރަށްވެސް ޔާމީންގެ މައްޗަށް ދަައުލަތުން ކުރާ އެހެން ދާއުވާއެއްގެ ޝަރީއަތްވެސް ކުރިމިނަލް ކޯޓުގައި ދަނީ ކުރިޔަށެވެ.
އެހެންނަމަވެސް، މި ހުރިހާ ޝަރީއަތްތަކާއެކުވެސް، ޔާމިންއަށް ކުރިޔަށް އޮތް ރިޔާސީ އިންތިޚާބުގައި ވާދަ ކުރެއްވޭނެކަމަށް، އެމަނިކުފާނުގެ ގަނޫނީ ވަކީލުން ގެންދަވަނީ ވިދާޅުވަމުންނެވެ. އަދި ޕީޕީއެމްއިން މިހާރުވަނީ އެޕާޓީގެ ރިޔާސީ ކެމްޕޭންގެ ކެމްޕޭން މެނޭޖަރުންވެސް އައްޔަން ކޮށްފައެވެ.
އެހެންނަމަވެސް ރައީސް ޔާމިނަށް ކުރިމަތި ލުމުގެ ފުރުސަތު ލިބިގެން ނުދާނެކަމަށް ދެކި، ޕީޕީއެމްގެ ސެނެޓްގެ ބައެއް މެމްބަރުން މިހާރުވަނީ ސޯޝަލް މީޑިއާގައިވެސް ޝުޢޫރު ފާޅުކުރަން ފަށާފައެވެ.
މިގޮތުން ޕީޕީއެމްގެ ކުރީގެ ސެކެޓްރީޖެނެރަލް މުހައްމަދު ޝަކީލް އިއްޔެ ކުރެއްވި ޓުވީޓެއްގައި ވިދާޅުވެފައިވަނީ މިސަރުކާރުން ރައީސް ޔާމިން މިނިވަން ކޮށްފާނެކަމަށް ބަލާ "ހަމަ މިހެން ތިބެންވީތޯ" ސުވާލުކޮށް ކޮށްފައެވެ.
ސޯލިހުފަދަ މަކަރުވެރި ހީލަތްތެރި އަނިޔާވެރިއެއް އޭނާގެ އަނިޔާވެރިކަން ދޫކޮށް ރައީސް ޔާމީން މިނިވަން ކުރާނެކަމަށް ނުވަތަ ރިޔާސީ ރޭހުގައި ރައީސް ޔާމީންއަށް ވާދަކުރުމުގެ ފުރުސަތު ދޭނެކަމަށް ގަބޫލުކޮށްގެން ސަރުކާރުން ޝަރުއީކޯޓުތަށް މެދުވެރިކޮށް ކުޅޭ ޗަރުކޭސް ބަލަން ހަމަ ތިބެންވީތޯ؟
ޝަކީލް އިއްޔެ ކުރެއްވި ޓޫވީޓުގައި އޭނާ ވިދާޅުވެފައި ވެއެވެ.
އެހެންނަމަވެސް މައްސަލަ ތަހުގީގު ކުރަން ފެށުމާއެކު ޝަކީލްވަނީ އޭނާގެ ޓުވީޓު މިހާރު ޑިލީޓް ކޮށްފައެވެ.
މިސަރުކާރުން ރައީސް ޔާމިން މިނިވަން ނުކުރާނެކަމަށް މޭރުން ކުރަމުން ޝަކީލް ކުރެއްވި ޓުވީޓުގައި އޭނާވަނީ "ޝަރުއީ ކޯޓުތައް މެދުވެރިކޮށް ކުޅޭ ޗަރުކޭސް" ބަލަން ނުތިބެވޭނެކަމަށް އިޝާރާތްކޮށް ޝުޢޫރު ފާޅުކޮށްފައެވެ. އޭނާގެ ޓުވީޓަށް ތާއީދުކޮށް ޕީޕީއެމްގެ ސެނެޓްގައި ހިމެނޭ އެހެން ދެ ބޭފުޅަކު ކޮމެންޓްވެސް ކޮށްފައި ވެއެވެ. އެ ދެ ސެނެޓަރުންގެ މައްސަލަވެސް ތަހުގީގު ކޮމިޓީން ބަލަމުންދާ މައްސަލަތަކުގެ ތެރޭގައި ހިމެނެއެވެ.
މިމައްސަލާގައި އިދިކޮޅު ޕީޕީއެމްގެ ސެނެޓްގެ ވަޓްސްއަޕް ގުރޫޕުގައިވެސް ބައެއް ބޭފުޅުންވަނީ ބަހުސް ކޮށްފައެވެ. އެގޮތުން ބައެއް ފަރާތްތަކުން ފާހަގަ ކޮށްފައިވަނީ ރައީސް ޔާމިން މިނިވަންވާނެކަމުގެ ފުރިހަމަ ޔަގީންކަން ގާނޫނީ ޓީމުން ދޭކަމަށް ވިދާޅުވެފައެވެ. އޭގެ ރައްދުގައި އެހެން ބައެއް ފަރާތްތަކުން ވަނީ ފާއިތުވި މާރޗްމަސް ނިމުމުގެ ކުރިންވެސް ރައީސް ޔާމިން މިނިވަންވާނެކަމަށް ވަކީލުންގެ ޓީމުން ވިދާޅުވި ކަމަށާއި އެދުވަސް އަދިވެސް ނާދޭތޯ ސުވާލު ކުރައްވާފައެވެ.
ލޯޔަރުން ވިދާޅުވި 2023ގެ މާރޗްމަސް އަދި ނުނިމޭތޯ؟
ރައީސް ޔާމިން މިނިވަންވާނެކަމުގެ ޔަގީންކަން ގާނޫނީ ޓީމުން ދޭކަމަށް ވިދާޅުވެ ސެނެޓް ވަޓްސައަޕް ގުރޫޕުގައި ބައެއް ފަރާތްތަކުން ދެއްކެވި ވާހަކަތަކަށް ރައްދު ދެމުން ޕީޕީއެމްގެ ސެނެޓަރއެއް ކަމުގައިވާ ރޭނީސް ސަލިމް ވިދާޅުވެފައި ވެއެވެ. ރޭނީސް ސަލީމްގެ މި މެސެޖާއި ގުޅިގެން ތަހުގީގު ޓީމުން ބަލަމުންދާ މަސައްލަތަކުގެ ތެރޭގައި އޭނާގެ މައްސަލަވެސް ހިމެނެއެވެ.
ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެވިއްޖެނަމަ އެޕާޓީގެ ފަރާތުން ޕްރައިމަރީއެއް ބާއްވާނެކަމަށް ބަލާ ޕާޓީގެ އިސް ބައެއް ފަރާތްތަކުން ޕްރައިމަރީގައި ވާދަކުރުމުގެ ޝައުގުވެރިކަމުގައި މަސައްކަތްވެސް ކޮށްފައިވެއެވެ.
އެހެންނަމަވެސް މާލޭ ސިޓީގެ މޭޔަރ މުއިއްޒުއަށް ރިޔާސީ ޓިކެޓް ހޯދައިދިނުމަށް މަސައްކަތް ކުރިކަމުގެ ތުހުމަތުގައި ޕީޕީއެމްއަށް ނިސްބަތްވާ މާލޭ ސިޓީ ކައުންސިލްގެ މެދު ހެންވޭރު ދާއިރާގެ މެމްބަރު އާދަމް ރަމީޒުގެ ސުލޫކީ މައްސަލައެއް ޕީޕީއެމްއިން ބަލަން ފަށާފައިވާކަމަށް އަޑުފެތުރިފައި ވަނިކޮށް ރަމީޒްވަނީ އެޕާޓީން ވަކިވެފައެވެ. އަދި ޕްރައިމަރީގައި ވާދަކުރެއްވުމުގެ ޝައުގުވެރިކަން ކުރިން ގެންގުޅުއްވި ބައެއް ފަރާތްތަކުން މިހާރުވަނީ އެ ޝައުގުވެރިކަން ދޫވެސް ކޮށްލައްވާފައެވެ. އޭގެ ތެރޭގައި ޕީޕީއެމްގެ ނާއިބު ރައީސްކަމުގެ މަގާމްގައި ހުންނެވި އައްސާން މައުމޫނު ހިމެނިވަޑައިގަންނަވައެވެ.
ބައެއް ފަރާތްތަކުން ތުހުމަތު ކުރާގޮތުގައި ރައީސް ޔާމިންގެ ވިސްނުންފުޅަކީ އެމަނިކްފާނަށް ވާދަ ނުކުރެއްވިއްޖެނަމަ އެޕާޓީން ކެނޑިޑޭޓަކު ކުރިޔަށްއޮތް ރިޔާސީ އިންތިޚާބަށް ނުނެރުމެވެ.
