އިދިކޮޅު ޕީޕީއެމްގެ ފަރާތުން ރައީސް ޔާމިންއަށް ކުރިޔަށް އޮތް ރިޔާސީ އިންތިޚާބުގައި ވާދަ ކުނުކުރެވި، އިދިކޮޅު ޕީޕީއެމްގެ ފަރާތުން ރިޔާސީ އިންތިޚާބުގައި ވާދަކުރާނޭ ފަރާތެއް ސާފުނުވެ ލަސްވާތީ އެޕާޓީގެ ސެނެޓްގެ ބައެއް ބޭފުޅުން ކަންބޮޑުވުން ފާޅުކުރައްވަން ފައްޓަވައިފިއެވެ.

ޕީޕީއެމްގެ ލީޑަރޝިޕުން އެޕާޓީން ރިޔާސީ ކެނޑިޑޭޓަކީ ރައީސް ޔާމިންކަމަށް ވިދާޅުވަމުން ގެންދެވިނަމަވެސް، ޔާމިން ގެންދަވަނީ 11 އަަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އަދި އޭގެ އިތުރަށްވެސް ޔާމީންގެ މައްޗަށް ދަައުލަތުން ކުރާ އެހެން ދާއުވާއެއްގެ ޝަރީއަތްވެސް ކުރިމިނަލް ކޯޓުގައި ދަނީ ކުރިޔަށެވެ.

އެހެންނަމަވެސް، މި ހުރިހާ ޝަރީއަތްތަކާއެކުވެސް، ޔާމިންއަށް ކުރިޔަށް އޮތް ރިޔާސީ އިންތިޚާބުގައި ވާދަކުރެއްވޭނެކަމަށް، އެމަނިކުފާނުގެ ގަނޫނީ ވަކީލުން ގެންދަވަނީ ވިދާޅުވަމުންނެވެ. އަދި ރޭ ޕީޕީއެމްއިންވަނީ އެޕާޓީގެ ރިޔާސީ ކެމްޕޭންގެ ކެމްޕޭން މެނޭޖަރުންވެސް އައްޔަން ކޮށްފައެވެ.

އެހެންނަމަވެސް ރައީސް ޔާމިނަށް ކުރިމަތި ލުމުގެ ފުރުސަތު ލިބިގެން ނުދާނެކަމަށް ދެކި، ޕީޕީއެމްގެ ސެނެޓްގެ ބައެއް މެމްބަރުން މިހާރުވަނީ ސޯޝަލް މީޑިއާގައިވެސް ޝުޢޫރު ފާޅުކުރަން ފަށާފައެވެ.

މިގޮތުން ޕީޕީއެމްގެ ކުރީގެ ސެކެޓްރީޖެނެރަލް މުހައްމަދު ޝަކީލް މިއަދު ކުރެއްވި ޓުވީޓެއްގައި ވިދާޅުވެފައިވަނީ މިސަރުކާރުން ރައީސް ޔާމިން މިނިވަން ކޮށްފާނެކަމަށް ބަލާ "ހަމަ މިހެން ތިބެންވީތޯ" ސުވާލުކޮށް ކޮށްފައެވެ.

ސޯލިހުފަދަ މަކަރުވެރި ހީލަތްތެރި އަނިޔާވެރިއެއް އޭނާގެ އަނިޔާވެރިކަން ދޫކޮށް ރައީސް ޔާމީން މިނިވަން ކުރާނެކަމަށް ނުވަތަ ރިޔާސީ ރޭހުގައި ރައީސް ޔާމީންއަށް ވާދަކުރުމުގެ ފުރުސަތު ދޭނެކަމަށް ގަބޫލުކޮށްގެން ސަރުކާރުން ޝަރުއީކޯޓުތަށް މެދުވެރިކޮށް ކުޅޭ ޗަރުކޭސް ބަލަން ހަމަ ތިބެންވީތޯ؟

— Mohamed Shakeel 🇲🇻 (@schakyyl) June 1, 2023

މިސަރުކާރުން ރައީސް ޔާމިން މިނިވަން ނުކުރާނެކަމަށް މޭރުން ކުރަމުން ޝަކީލް ވަނީ "ޝަރުއީ ކޯޓުތައް މެދުވެރިކޮށް ކުޅޭ ޗަރުކޭސް" ބަލަން ނުތިބެވޭނެކަމަށް އިޝާރާތްކޮށް ޓުވީޓު ކޮށްފައެވެ. އޭނާގެ ޓުވީޓަށް ތާއީދުކޮށް ޕީޕީއެމްގެ ސެނެޓްގައި ހިމެނޭ އެހެން ބޭފުޅުންވެސް ކޮމެންޓް ކޮށްފައި ވެއެވެ.

މިމައްސަލާގައި އިދިކޮޅު ޕީޕީއެމްގެ ސެނެޓްގެ ވަޓްއަޕް ގުރޫޕުގައިވެސް ބައެއް ބޭފުޅުންވަނީ ބަހުސް ކޮށްފައެވެ. އެގޮތުން ބައެއް ފަރާތްތަކުން ފާހަގަ ކޮށްފައިވަނީ ރައީސް ޔާމިން މިނިވަންވާނެކަމުގެ ފުރިހަމަ ޔަގީންކަން ގާނޫނީ ޓީމުން ދޭކަމަށް ވިދާޅުވެފައެވެ. އޭގެ ރައްދުގައި އެހެން ބައެއް ފަރާތްތަކުން ވަނީ ފާއިތުވި މާރޗްމަސް ނިމުމުގެ ކުރިންވެސް ރައީސް ޔާމިން މިނިވަންވާނެކަމަށް ވަކީލުންގެ ޓީމުން ވިދާޅުވި ކަމަށާއި އެދުވަސް އަދިވެސް ނާދޭތޯ ސުވާލު ކުރައްވާފައެވެ.

ލޯޔަރުން ވިދާޅުވި 2023ގެ މާރޗްމަސް އަދި ނުނިމޭތޯ؟

ރައީސް ޔާމިން މިނިވަންވާނެކަމުގެ ޔަގީންކަން ގާނޫނީ ޓީމުން ދޭކަމަށް ވިދާޅުވެ ސެނެޓް ވަޓްސައަޕް ގުރޫޕުގައި ބައެއް ފަރާތްތަކުން ދެއްކެވި ވާހަކަތަކަށް ރައްދު ދެމުން ޕީޕީއެމްގެ ސެނެޓަރއެއް ކަމުގައިވާ ރޭނީސް ސަލިމް ވިދާޅުވެފައި ވެއެވެ.

ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެވިއްޖެނަމަ އެޕާޓީގެ ފަރާތުން ޕްރައިމަރީއެއް ބާއްވާނެކަމަށް ބަލާ ޕާޓީގެ އިސް ބައެއް ފަރާތްތަކުން ޕްރައިމަރީގައި ވާދަކުރުމުގެ ޝައުގުވެރިކަމުގައި މަސައްކަތްވެސް ކޮށްފައިވެއެވެ.

އެހެންނަމަވެސް މާލޭ ސިޓީގެ މޭޔަރ މުއިއްޒުއަށް ރިޔާސީ ޓިކެޓް ހޯދައިދިނުމަށް މަސައްކަތް ކުރިކަމުގެ ތުހުމަތުގައި ޕީޕީއެމްއަށް ނިސްބަތްވާ މާލޭ ސިޓީ ކައުންސިލްގެ މެދު ހެންވޭރު ދާއިރާގެ މެމްބަރު އާދަމް ރަމީޒުގެ ސުލޫކީ މައްސަލައެއް ޕީޕީއެމްއިން ބަލަން ފަށާފައިވާކަމަށް އަޑުފެތުރިފައި ވަނިކޮށް ރަމީޒްވަނީ އެޕާޓީން ވަކިވެފައެވެ. އަދި ޕްރައިމަރީގައި ވާދަކުރެއްވުމުގެ ޝައުގުވެރިކަން ކުރިން ގެންގުޅުއްވި ބައެއް ފަރާތްތަކުން މިހާރުވަނީ އެ ޝައުގުވެރިކަން ދޫވެސް ކޮށްލައްވާފައެވެ. އޭގެ ތެރޭގައި ޕީޕީއެމްގެ ނާއިބު ރައީސްކަމުގެ މަގާމްގައި ހުންނެވި އައްސާން މައުމޫނު ހިމެނިވަޑައިގަންނަވައެވެ.

ބައެއް ފަރާތްތަކުން ތުހުމަތު ކުރާގޮތުގައި ރައީސް ޔާމިންގެ ވިސްނުންފުޅަކީ އެމަނިކްފާނަށް ވާދަ ނުކުރެއްވިއްޖެނަމަ އެޕާޓީން ކެނޑިޑޭޓަކު ކުރިޔަށްއޮތް ރިޔާސީ އިންތިޚާބަށް ނުނެރުމެވެ.