ހެލްތު މިނިސްޓރަ އަހުމަދު ނަސީމްގެ ދަރިކަނބަލުން އަޔާ ނަސީމް ރައީސް މުހައްމަދު ނަޝީދު އިސްކޮށް ހުންވައިގެން އުފައްދަވާ "ދަ ޑިމޮކްރެޓްސް" އާއި ގުޅިއްޖެއެވެ.
ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އިސްވެ ހިންގަވާ "ފިކުރެއްގެ ދިރުން" ގައި ޙަރަކާތްތެރިވެވަޑައިގަންނަވާ މެންބަރުން އިސްވެ ތިއްބަވައިގެން "ދަ ޑިމޮކްރެޓްސް"ގެ ނަމުގައި އުފައްދަވަން މަސައްކަތް ކުރައްވާ ޕާޓީ އުފެއްދުމުގެ ހުއްދަ އިލެކްޝަންސް ކޮމިޝަނުން ދީފައިވަނީ މިމަހުގެ 24 ވަނަ ދުވަހުއެވެ.
ޕާޓީ އުފެއްދުމުގެ ހުއްދަ ދިނުމާއިއެކު ގިނަ ބަޔަކު ދަނީ އެޕާޓީއާއި ގުޅެމުންނެވެ. އެޕާޓީއަށް ސޮއި ކުރަމުންދާ މީހުންގެ ތެރޭގައި ގިނައީ ވެރިކަން ކުރާ މައި ޕާޓީއަށް ނިސްބަތްވާ ބޭފުޅުންނެވެ.
މިނިސްޓަރ ނަސީމްގެ ދަރިކަނބަލުން އަޔާ ނަސީމުގެ ފޯމާ ހަވާލުވެވަޑައިގަތީ އައު ޕާޓީ އުފެއްދެވުމުގެ ހުއްދައަށް އެދިވަޑައިގެންނެވި އެމްޑީޕީގެ ކުރީގެ ޗެއާޕާސަން ހެންވޭރު ހުޅަނގު ދާއިރާގެ މެންބަރު ޙަސަން ލަތީފާއި ހުޅުދޫ ދާއިރާގެ މެންބަރު އިލްޔާސް ލަބީބެވެ. މިނިސްޓަރު ނަސީމުގެ ދަރިކަނބަލުންގެ އިތުރަށް ރާއްޖޭގެ ފަތުރުވެރިކަމަށް ވަރަށް ބޮޑެތި ޚިދުމަތްތަކެއް ކޮށްދެއްވާފައިވާ ނަސީމުގެ ކޮއްކޯފޮޅު ސަލީމާ ރައްޒާޤުވެސްވަނީ "ދަ ޑިމޮކްރެޓްސް"އަށް ތާއީދުކުރައްވާކަން ހާމަކުރައްވައި އަޔާއަށް ހިއްވަރުދެއްވައި ޓުވީޓުކުރައްވާފައެވެ.
ސަރުކާރުގެ އިސްބޭފުޅުންނާއި ގުޅުން އޮތް ބޭފުޅުން ދަ ޑިމޮކްރެޓްސް އަށް ސޮއި ކުރަމުންދާއިރު، ސަރުކާރުގެ ބައެއް މަޤާމުތަކުގައި ތިއްބެވި ބައެއް ބޭފުޅުންވެސް ދަނީ ދަ ޑިމޮކްރެޓްސް އަށް ސޮއި ކުރަމުންނެވެ.
ޕާޓީ އުފެއްދުމުގައި އިސްކޮށް ހަރަކާތްތެރިވާ ބޭފުޅުންގެ އަމާޒަކީ މިހަފްތާގެ ތެރޭގައި ޕާޓީ އުފެއްދުމަށް އިލެކްޝަންސް ކޮމިޝަނަށް ހުށަހެޅުމެވެ. ސިޔާސީ ޕާޓީތަކުގެ ޤާނޫނު ބަޔާންކުރާ ގޮތުން ޕާޓީ ރަޖިސްޓްރީކުރުމަށް 3000 މެންބަރުންގެ ސޮއި ހޯދައި އިލެކްޝަންސް ކޮމިޝަނަށް ހުށައަޅަންޖެހެއެވެ.
ސިޔާސީ ޕާޓީތަކުގެ ދަފްތަރުގައި މިހާރުވެސް 11 ސިޔާސީ ޕާޓީއެއް އެބައޮތެވެ. ސިޔާސީ ޕާޓީތަކުގެ ޤާނޫނުގައި ބުނާގޮތުން ކޮންމެ ޕާޓިއެއްގައިވެސް މަދުވެގެން 3000 މީހުން ހަމަވާންޖެހެއެވެ.
ކޮމެންޓު ފޮނުވާ