މިސަރުކާރަކީ ރައްޔިތުންނަށް ހުވަފެން ދައްކާ ބައެއް ނޫންކަމަށާއި، މިސަރުކާރަކީ ވައުދުވެ އެވަޢުދުތައް ފުއްދާ ބައެއް ކަމުގައި މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

އަސްލަމް މިހެން ވިދާޅުވީ ފ.މަގޫދޫ ފެނާއި ނަރުދަމާގެ މަޝްރޫޢާއި، ފެނަކަ އޮފީސް އާއިމާރާތް އިފްތިތާހު ކުރުމަށް އެރަށުގައި ބޭއްވި ޖަލްސާގައި ވާހަކަ ދައްކަވަމުންނެވެ. އަސްލަމް ވިދާޅުވީ މިސަރުކާރުން ތަރައްޤީގެ މަޝްރޫއު ހިންގެވި މިންވަރާއި ގާތަށްވެސް އެހެން ސަރުކާރަކަށް މަސައްކަތް ކުރެވިފައި ނުވާކަމަށެވެ. މިސަރުކާރުން ކުރަމުން ދިޔަ މަސައްކަތަށް ކޯވިޑާއި އެކު ގޮންޖެހުންތައް ކުރިމަތި ވިޔަސް، ހުއްޓުމެނެތި މިހާތަނަށް ކުރި މަސައްކަތުން ރާއްޖެއަށް ބޮޑު ބަދަލެއް ގެނެވިފައިވާކަމަށެވެ.

އަސްލަމް ވިދާޅުވީ އޭނާ މަސައްކަތް ކުރެއްވި ހައުސިން އަދި ޕްލޭނިންގެ ދާއިރާއިން މިވީ ހަތަރު އަހަރުގެ ތެރޭގައި ދައުލަތުގެ ބަޖެޓުން އެކި ރަށްތަކުގައި މަޝްރޫޢުތައް ހިންގެވުމަށް 4.5 ބިލިޔަން ރުފިޔާ ޚަރަދު ކުރެވިފައިވާކަމަށެވެ. މިއީ އަހަރަކަށް ބަލާއިރު ބިލިޔަނެއްހާ ރުފިޔާގެ ހޭދަވުމެއްކަމަށެވެ.

އަސްލަމް ވިދާޅުވީ ސަރުކާރުން ކުރަމުންދާ މަަސައްކަތްތަކާއި މަޝްރޫޢުތައް މާބޮޑަށް މަޝްހޫރުކޮށް އެވާހަކަ ދެއްކުމަކީ ސަރުކާރުން ކުރާ ކަމެއް ނޫންކަމަށެވެ. ސަރުކާރުން އަމަލުކުރާ ގޮތަކީ މަސައްކަތެއް ނިންމައި އެތަން ހުޅުވުންކަމަށެވެ. އަދި ކުރިއަށްއޮތް 3 މަހަކީ ރައީސަށް ރިބަންފަށް ކަނޑަން ޖެހޭ ދުވަސްވަރެއްކަމަށް އަސްލަމް ވިދާޅުވިއެވެ.

އަޅުގަނޑުމެންނަކީ ބިންގާ އަޅަން ރަށްރަށަށް ދާ ބައެއްނޫން. އަޅުގަނޑުމެން، އާދެ ރައީސް ވަޑައިގަންނަވާނީ އެކަމެއް ނިންމައި ރައްޔިތުންނަށް އޭގެ ފައިދާ ލިބެން ފެއްޓުމުން އެކަން ފާހަގަ ކުރަން. ކުރިއަށް އޮތީ ރައީސަށް ވަރަށް ބިޒީ ދުވަސްކޮޅެއް ދުވާލަކު ތިން ރަށް ދެރަށަށް ވަޑައިގެން ރިބަންފަށް ކަނޑަންޖެހޭނެ.

– އަސްލަމް ވިދާޅުވިއެވެ.

އަސްލަމް ވިދާޅުވީ ނިމިދިޔަ ސަރުކާރުތަކުން ރާއްޖެ ތަރައްޤީ ކުރުމުގައި ގެންގުޅުނު އެންމެ ބޮޑު ސިޔާސަތަކީ މަރުކަޒީ ސިޔާސަތެއް ކަމަށެވެ. ނަމަވެސް މިސަރުކާރުން އެކަން ބަދަލުކޮށް، ލާމަރުކަޒީ ނިޒާމުގެ ތެރެއިން ކަންކަން ކުރެވޭނެ ނިޒާމަކަށް ބަދަލުކޮށް މުޅި ރާއްޖެ ގުޅާލައި، ތަރައްޤީ މުޅި ރާއްޖެއަށް ބައްސަބާލެއްވިކަމަށެވެ.

މިއަދު މިތަރައްޤީގެ ބޭނުން ރާއްޖޭގެ ހުރިހާ ރަށަކުން ކުރާތަން ފެންނަ ކަމަށާއި، ތަރައްޤީގައި މިއަދު މިސަރުކާރުން ހޯދަމުންދާ ކާމިޔާބީއަކީ އޭގެ ނަތީޖާވެސް ފޮނިވާނެ ކަމެއްކަމަށް އަސްލަމް ވިދާޅުވިއެވެ.