މިއަހަރުގެ މެދުތެރޭގައި ދަންޖެހިގެން މަރުވެފައި ހުއްޓާފެނުނު ބޮލީވުޑުގެ ޒުވާންތަރި ސުޝާންތު ސިންގް ރާޖުޕުތުގެ ނަން މިވަނީ މިއަހަރު އިންޑިއާގެ އެންމެ ގިނަ ބަޔަކު އިންޓަރނެޓް މެދުވެރިކޮށް ހޯދާ ބަލާފައިވާ ނަމުގެ ގޮތުގައި ހިމެނިފައެވެ.
ޔާހޫއިން އާންމުކޮށްފައިވާ 2020 ވަނަ އަހަރުގެ ރިވިއު ލިސްޓުގައި އެންމެ ގިނަ ބަޔަކު ހޯދާފައިވާ ފިރިހެން ނަމެއްގެ ގޮތުގައި ސުޝާންތު ސިންގު ރާޖުޕުތު ވެފައިވާއިރު އެންމެ ގިނަ ބަޔަކު ހޯދި އަންހެން ސެލެބްރެޓީއެއްގެ ގޮތުގައި ލިސްޓުގައި ވަނީ ސުޝަންތު މަރުވިއިރު އޭނަގެ ލޯބިވެރިޔަކަށް ހުރި ރިއާ ޗަކްރޮބަތީގެ ނަމެވެ.
މި ލިސްޓުގެ އެންމެ ކުރީގައި ސުޝާންތު ސިންގު ރާޖުޕުތުގެ ނަން އޮތް ނަމަވެސް 2019ވަނަ އަހަރުވެސް މި ލިސްޓުގައި ރަސްކަން ކޮއްފައިވާ އަމީތާބު ބަޗަން، އަކްޝޭ ކުމާރު އަދި ސަލްމާން ޚާންފަދަ މަޝްހޫރު ނަންތަށްވެސް ލިސްޓުގައި ހިމެނިފައިވެއެވެ. މި ތަރިންގެ އިތުރުން މިއަހަރުގެ ތެރޭގައި ދުނިޔެ ދޫކޮއްފައިވާ އިރުފާން ޚާން އަދި ރިޝީ ކަޕޫރުވެސް ވަނީ މިލިސްޓުގައި ހިމެނިފައެވެ.
ޔާހޫއިން ހާމަކޮށްފައިވާ ގޮތުގައި މި ލިސްޓަށް ބަލާއިރު އެންމެ ބޮޑަށް ފާހަގަކުރެވިފައިވަނީ ގިނަ ބަޔަކު ކިޔާ، ބަލާ، އަދި އޮޅުންފިލުވާފައިވާނީ ސުޝާންތުގެ އަމިއްލަ ދިރިއުޅުމުގެ ކަންތަށްތަކާ ބެހޭ މައުލޫމާތުކަމަށެވެ.
ޔާހޫގެ ރިވިއު ލިސްޓުގައި އަންހެން ސެލެބްރިޓީއެއްގެ ގޮތުގައި ރިއާ ޗަކްރޮބަތީގެ ނަން އެއްވަނަ ގައި އޮތްނަމަވެސް އެލިސްޓުން މަޝްހޫރު އެހެން ބޮލީވުޑުގެ ތަރިންވެސް ވަނީ ހިމެނިފައެވެ. ކަންގަނާ ރަނާވަތު، ދީޕިކާ ޕަޑުކޯން ،ސަނީ ލިއޯނީ ،ޕުރިޔަންކާ ޗޯޕްރާ ، ކެތުރީނާ ކައިފްގެ އިތުރުން މަޝްހޫރު ލަވަކިޔުންތެރިޔާ ނޭހާ ކައްކަރުވެސް ވަނީ މިލިސްޓުން ޖާގަހޯދާފައެވެ.
ޔާހޫގެ މި ލިސްޓަކީ ކޮންމެ ދުވަހަކުވެސް މީހުން ހޯދާ، ކިޔާ، ރިކޮމެންޓްކޮށް އަދި ހިއްސާކުރާ ތަކެތީގެ މައްޗަށް ބިނާކޮށް ހަދާ ލިސްޓެކެވެ. ޔާހޫއިން ކޮންމެ އަހަރަކުވެސް މި ލިސްޓު ތައްޔާރުކޮށް ޝާއިރުކުރެއެވެ. ޔާހޫއިން ދެކޭ ގޮތުގައި މީހުންބޭނުންވާ ރަހަތަށް އެގިފައި އޮތުމަކީ އެ ޕްލެޓްފޯމަށްވެސް ގިނަ ކުރިއެރުންތަކެއް ގެނުވާކަމެކެވެ.
