މޯލްޑިވްސް ނޭޝަނަލް ޕާޓީ (އެމްއެންޕީ)ގެ ރިޔާސީ ޓިކެޓް ހަވާލުކުރުމާއި ކެމްޕޭން ލޯންޗު ކުރުން މިރޭ އޮންނާނެ ކަމަށް އެ ޕާޓީން ބުނެފިއެވެ.
އެމްއެންޕީން ބުނީ މި ޖަލްސާ އޮންނާނީ މިރޭ 8:30 ގައި އާޓިފިޝަލް ބީޗުގައި ކަމަށެވެ. އެމްއެންޕީގެ ރިޔާސީ އިންތިހާބުގެ ޕްރައިމަރީގައި ކުރިމަތިލެއްވީ އެ ޕާޓީގެ ރައީސް އަދި ރައްޔިތުންގެ މަޖިލިހުގެ ދަނގެތި ދާއިރާގެ މެމްބަރު މުހައްމަދު ނާޒިމް އެކަންޏެވެ. އެހެންކަމުން އިންތިހާބަކާ ނުލައި ނާޒިމަށް ވަނީ ރިޔާސީ ޓިކެޓް ލިބިވަޑައިގެންފައެވެ.
އެމްއެންޕީގެ އަސާސީ ގަވައިދުގައިވާ ގޮތުން ރިޔާސީ އިންތިހާބުގެ ޕްރައިމަރީ އަށް އެންމެ ބޭފުޅަކު ކުރިމަތިލައްވައިފި ނަމަ އިންތިހާބެއް ބާއްވާކަށް ނުޖެހޭނެއެވެ. އަދި ރިޔާސީ ކެންޑިޑޭޓު ދޭން ފެނޭތޯ ނުވަތަ ނޫންތޯ ބެލުމަށް އާންމު މެމްބަރުންގެ މެދުގައި ވޯޓެއް ވެސް ނަގާކަށް ނުޖެހޭނެއެވެ.
MNPގެ ރިޔާސީޓިކެޓް ހަވާލުކުރުމާއި ކެމްޕެއިން ފެށުމުގެ ރަސްމިއްޔާތައް މިރޭ 8:30 އަށް އާޓިފިޝަލް ބީޗަށް ހެޔޮއެދިވަޑައިގަންނަވާ އެންމެހާ ބޭފުޅުން ވަޑައިގެން ދެއްވުން އެދެން! pic.twitter.com/J6nJZyhpoO
— Abdulla Riyaz MP (@riyazabdulla) May 26, 2023
ނާޒިމް ވިދާޅުވީ، މިއަހަރުގެ ރިޔާސީ އިންތިހާބުގައި ވާދަކުރައްވާނެ ކަމަށް އިއުލާން ކުރައްވާފައިވާ ފަރާތްތަކާ އަޅާ ބަލާއިރު އޭނާ އަކީ ރައްޔިތުންނަށް ވަރަށް ރަނގަޅު ޗޮއިސްއެއް ކަމަށެވެ. އަދި އެ ޗޮއިސް ރައްޔިތުން އިހުތިޔާރުކޮށްފި ނަމަ ސާބިތުކަމާއެކު ރައްޔިތުން އެދޭ ކަންކަން ހާސިކުރުމުގައި ދެމި ހުންނަވާނެ ކަމަށްވެސް ނާޒިމް ވިދާޅުވިއެވެ.
އެމްއެންޕީގެ ރިޔާސީ ޓިކެޓް ހަވާލު ކުރުމާއި، ކެމްޕެއިން ލޯންޗު ކުރާއިރު، މިހާތަނަށް އިންތިޚާބުގައި ވާދަކުރުމަށް ނިންމައި ޕާޓީތަކުގެ ޓިކެޓް ހަވާލުކޮށްފައިވަނީ އެމްޑީޕީގެ ޓިކެޓް ރައީސް ޞާލިހަށާއި، ޕީޕީއެމްގެ ޓިކެޓް ރައީސް ޔާމީނަށެވެ. ނަމަވެސް ރައީސް ޔާމީނަށް އިންތިޚާބުގައި ވާދަކުރެވޭނެ ކަމާއިމެދު އަދި ސާފު ޖަވާބެއް ނުލިބެއެވެ. ޖުމްހޫރޫ ޕާޓީގެ ރިޔާސީ ޓިކެޓް ހަވާލު ކުރުން އޮތީ އަންނަ މަހުގެ ތެރޭގައެވެ.
