ކުރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް ޖުމުހޫރީ ޕާޓީއަށް ސޮއި ކުރައްވައިފިއެވެ. އޭނާ ޖުމުހޫރީ ޕާޓީއަށް ސޮއި ކުރެއްވުމަށް ފޯމު މިއަދު ހަވާލު ކުރައްވާފައިވަނީ ޖުމުހޫރީ ޕާޓީގެ ލީޑަރު ގާސިމް އިބުރާހިމްއާއެވެ.
ހައިލަމް ކުރިމިނަލް ކޯޓުގެ އިސްގާޒީކަމުން އިސްތިއުފާ ދީފައިވަނީ 2019 ވަނަ އަހަރުއެވެ. އޭނާ މަގާމުން އިސްތިއުފާ ދިނުމުގެ ކުރިން ޖޭއެސްސީން ހައިލަމް ސަސްޕެންޑްކުރިއެވެ. އޭނާ ސަސްޕެންޑް ކުރީ 2019ވަނަ އަހަރުގެ ނަސްރުގެ ދުވަހުގެ ތަހުނިޔާ ވިދާޅުވެ، ވައިބަ ގްރޫޕަކަށް ފޮނުއްވި ކުރެހުމެއްގެ މައްސަލައިގަ އެވެ. އެ ކުރެހުމުން ފެންނަނީ، ރައީސް އިބްރާހިމް މުހައްމަދު ސޯލިހާއި ރައްޔިތުންގެ މަޖިލީހުުގެ ރައީސް އަދި ކުރީގެ ރައީސް މުހައްމަދު ނަޝީދުގެ ކަރުގައި ޗޭނު ޖަހައި ގަންހިންގުވާ މަންޒަރެވެ. ޖޭއެސްސީން ބުނެފައިވަނީ ފަނޑިޔާރުންގެ ގާނޫނާއި ފަނޑިޔާރުންގެ ސުލޫކީ މިންގަނޑާ ހައިލަމް ޚިލާފުވެވަޑައިގެންފައިވާ ކަމަށެވެ.
އަދި އެއަށްފަހު އޭނާ މަގާމުން ވަކި ކުރުމުގެ މައްސަލަ ރައްޔިތުންގެ މަޖިލީހަށް ހުށަހަޅާ އޭނާ މަގާމުން ވަކިކުރުމަށް މަޖިލިހުގެ ކޮމިޓީން ފާސްކޮށްފައިވެސް ވެއެވެ.
އެހެންނަމަވެސް އޭނާ މަގާމުން އިސްތިއުފާ ދެއްވާފައިވަނީ ސިޔާސީ ވަކި ބައެއްގެ މުށުތެރެއަށް ފަނޑިޔާރުގެ ގެންދާ ކަމަށް ވިދާޅުވެ، 2019ވަނަ އަހަރު ޑިސެމްބަރުމަހުގެ 2 ވަނަ ދުވަހުއެވެ.
މަގާމުން އިސްތިއުފާ ދެއްވުމަށްފަހު އޭނާ ފާހަގަވެގެން ގޮސްފައިވަނީ ސިޔާސީ ކަންކަމުގައި ވަރަށްބޮޑަށް ފާޑުވިދާޅުވަމުންދަވާ ބޭފުޅެއްގެ ގޮތުގައެވެ.
