ފ. ފިލިތެޔޮ ރިސޯޓް ކައިރީ ކަނޑުގައި ފައްތާފައި ހުއްޓާ މިދިޔަ ބުރާސްފަތި ދުވަހު ފެނުނު މަސްތުވާތަކެތި ހޯދުމަށް ފުލުހުން ފެށި އޮޕަރޭޝަން މިއަދު ނިންމާލިއިރު 45 ކިލޯ މަސްތުވާތަކެތި ފެނިފައިވާ ކަމަށް ފުލުހުން ވިދާޅުވެއްޖެއެވެ.
ފެނުނީ މަސްތުވާތަކެތީގެ ބާވަތެއް ކަމަށްވާ ހެރޮއިންނެވެ. ފުލުހުން މިރޭ މީޑިއާތަކަށް ފޮނުވި މެސެޖެއްގައި ވިދާޅުވީ މެއި 18 ވަނަ ދުވަހު ފިލިތެޔޮ ކައިރިން ކަނޑު އަޑިއަށް ފައްތާފައި ހުރި މަސްތުވާތަކެތި ފެނުމާއި ގުޅިގެން ފުލުހުން ގެންދިޔަ އޮޕަރޭޝަން މިހާރު ނިންމާލާފައިވާ ކަމަށެވެ.
ރާއްޖޭގެ ފަޅެއްގައި ރައްކާކޮށްފައި ހުރި ގިނަ އަދަދެއްގެ މަސްތުވާތަކެތި މިދިޔަ އަހަރު ވެސް ފުލުހުން އަތުލައިގަތެވެ. އެކަމަކު، އެ މައްސަލާގައި ވެސް ތުހުމަތު ކުރެވޭ ބަޔަކު ފުލުހުންނަށް ނުހޯދުނެވެ.
ބޮޑެތި އޮޕަރޭޝަންތަކުގައި ފުލުހުން ގިނަ އަދަދެއްގެ މަސްތުވާތަކެތި އަތުލައިގަތް ނަމަވެސް ހާއްސަކޮށް ބޮޑެތި އޮޕަރޭޝަންތަކުގައި ތުހުމަތު ކުރެވޭ މީހުންނަށް އަދަބު ނުލިބި ސަލާމަތްވާކަމުގެ ޝަކުވާ ބޮޑެވެ.
މިމައްސަލައިގައި އެއްވެސް މީހަކު އަދި ހައްޔަރެއް ނުކުރެއެވެ.
