އެމްޑީޕީގެ ރައީސް މުހައްމަދު ނަޝީދު އަލަށް އުފެއްދުމަށް މަސައްކަތް ކުރައްވަމުން ގެންދަވާ "ދަ ޑިމޮކްރެޓްސް" ޕާޓީ އުފެއްދުމުގައި، ކުރީގެ ނާއިބު ރައީސް އަހުމަދު އަދީބު އުފައްދާފައިވާ އެމްޓީޑީގެ ނަމާއި ކުލަ ނަކަލް ކޮށްފައިވާ ކަމަށް ތުހުމަތުކޮށް، އާ ޕާޓީއެއް ވުޖޫދު ކުރާއިރު އަމިއްލަ ޚިޔާލާތާއި ފިކުރު ބޭނުން ކުރުމަށް އެމްޓީޑީން އިލްތިމާސް ކޮށްފިއެވެ.
އެމްޓީޑީން ކުރި ޓުވީޓެއްގައި ވިދާޅުވެފައިވަނީ އެޕާޓީގެ ނަމާއި ފިކުރު އަދި ކުލަ އިޚްތިޔާރު ކުރައްވާފައިވަނީ ތާރޑްވޭ ޑިމޮކްރެޓްސް ޕާޓީގެ ލީޑަރު، ކުރީގެ ނާއިބު ރައީސް އަހުމަދު އަދީބު ދޫނިދޫ ޖަލުގައި އޮންނަވައިގެން ކަމުގައެވެ.
މިގޮތުން "ތާޑްވޭ" އަދި "ޑިމޮކްރޭޓްސް" މި ނަންތައް އަދީބި އިޚްތިޔާރު ކޮށްފައިވަނީ މެދުމިނުގެ ޑިމޮކްރަޓިކް ފަލްސަފާތައް އޭނާ ފުރިހަމަޔަށް ގަބޫލު ކުރައްވާތީކަމުގައިވެސް މި ޓުވީޓުގައި ވިދާޅުވެފައި ވެއެވެ.
އޭގެ އިތުރުން އެމްޓީޑީގެ ކުލަ ކަމުގައިވާ މަޑު ނޫކުލަ، ޕާޓީގެ ކުލައިގެ ގޮތުގައި އިޚްތިޔާރު ކޮށްފައިވަނީ 3 އަހަރު ޖަލުގައި އޮންނަވައިގެން އަދީބަށް އުއްމީދެއްގެ ގޮތުގައި ހަމައެކަނި ފެނުމުގެ ފުރުސަތު ލިބިގެން ދިޔައީ އުޑުމަތިން ފެންނާން ހުރި މަޑު ނޫކުލަ ކަމުގައި ވާތީ ކަމަށްވެސް ވިދާޅުވެފައި ވެއެވެ.
އެހެންނަމަވެސް އެޕާޓީގެ ނަމާއި، ކުލައިން އަލަށް އުފައްދާ ސިޔާސީ ޕާޓީތަކަށް އުއްމީދާއި ހިތްވަރު ލިބުމަކީ އެޕާޓީން އުފާކުރާކަމެއްކަމަށް ވިދާޅުވަމުން، އެމްޓީޑީގެ ޓުވީޓުގައި ވިދާޅުވެފައިވަނީ އާޕާޓީތައް އުފެއްދުމަށް ކުރެވޭ މަސައްކަތުގައި އެޕާޓީތައް އުފައްދާ ފަރާތްތަކުން އެ ފަރާތްތަކުގެ އަމިއްލަ ޚިޔާލާތުގެ މައްޗަށް ބިނާވާ ނަންތަކާއި ކުލަތަށް ބޭނުން ކުރުމަށް އިހުތިރާމާއެކު ދަންނަވާ ކަމުގައެވެ.
އެމްޑީޕީގެ ރައީސް މުހައްމަދު ނަޝީދު އިސްވެ ހުންނަވާ އުފައްދަވާ ޕާޓީގެ ނަމެއްގެ ގޮތުގައި އިޚްތިޔާރު ކޮށްފައިވާ "ޑިމޮކްރެޓްސް" މިނަމަކީ އަދީބުގެ "ތާޑްވޭ ޑިމިކްރޭޓްސް" ޕާޓީގެ ނަމުގައިވެސް ބޭނުންކޮށްފައިވާ ނަމެކެވެ. އަދި ނަޝީދުގެ ޕާޓީ އުފެއްދުމަށް މަސައްކަތް ކުރާ ފަރާތްތަކުން އެޕާޓީގެ ކުލައިގެ ގޮތުގައި އިސްތިހާރު ކުރަމުން ދަނީވެސް އަދީބުގެ އެމްޓީޑީގެ މަޑު ކުލައާއި ވަރަށް އެއްގޮތް ކުލައެއްކަންވެސް ފާހަގަ ކޮށްލެވެއެވެ.
އެހެންނަމަވެސް ސިޔާސީ ޕާޓީތަކާބެހޭ ގާނޫނުގެ 14ވަނަ މާއްދާގައި ބުނަނީ ރަޖިސްޓްރީކުރެވިފައިވާ ޕާޓީއެއް ރަމްޒުކޮށްދޭ އެއްވެސް އެއްޗެއް، ފަހުން ރަޖިސްޓްރީ ކުރެވޭ ޕާޓީއަކަށް ރަޖިސްޓްރީކޮށްދީގެން ނުވާނެ ކަމުގައެވެ.
