ރައްޖޭގައި ކުރީގެ ދެ ރައީސުން ކަމުގައިވާ ރައީސް މައުމޫނާއި ރައީސް ނަޝީދުއާއި ދެބޭފުޅުންގެ ބަސް ވިކޭ ސިޔާސީ ޕާޓީއެއް ނެތޭހިސާބަށް ހާލަތު ދިއުމުން ރާއްޖޭގެ ސިޔާސީ މަސްރަހު އަލުން ބައްޓަންވަމުންދާ ގޮތާމެދު ވިސްނާ ފިކުރު ކުރާންޖެހޭ ކަމުގައި ހޯމް މިނިސްޓަރު އަދި އަދާލަތު ޕާޓީގެ ރައީސް ޝައިޚް އިމްރާން ވިދާޅުވެއްޖެއެވެ.

ޝައިޚް އިމްރާން ކުރެއްވި ޓުވީޓުގައި ވިދާޅުވީ "ރާއްޖޭގައި ތިއްބެވި ސިޔާސީގޮތުން އެންމެ ފުންނާބު އުސް ދެބޭފުޅުން"ގެ ބަސް ވިކޭ ޕާޓީއެއް ރާއްޖޭގައި ނެތޭ ހިސާބަށް ދިއުމަކީ މިއީ މިބަދަލާމެދު ދިރާސާ ކުރާމީހުން ވިސްނާ ފިކުރު ކުރާންޖެހޭ ކަމެއް ކަމުގައެވެ.

Raajjeyge fahuge thaareekhgai Siyasee gothun enme funnaabu us
Dhebeyfunge bas vikey siyaasee party eh raajeygai netheyhisaabah dhiyumakee Raajjeyge siyaasee masrahu bahtan vaa gothaamedhu fikuru koh dhirasaa kuraa meehun v visnanjehey kameh!

— Imran Abdulla (@ShimranAb) May 24, 2023

ރައީސް ނަޝިދުއާއި ރައީސް މައުމޫނުގެ ބަސްވިކޭ ޕާޓީއެއް މިހާރު ރާއްޖޭގެ ނެތްކަމަށް އިމްރާން ވިދާޅުވެފައިވާއިރު، އެމްޑީޕީގެ ރައީސް މުހައްމަދު ނަޝީދު ގެންދަވަނީ އެމްޑީޕީ ދޫކޮށް އާ ސިޔާސީ ޕާޓީއެއް އުފެއްވުމަށް މަސައްކަތް ކުރައްވަމުންނެވެ.

އަދި އިލެކްޝަންސް ކޮމިޝަނުން މިއަދުވަނީ ރައީސް މައުމޫން އުފެއްދެވި އެމްއާރުއެމް އުވާލުމަށް ނިންމާފައެވެ. އެޕާޓީ އުވާލަން އީސީން ނިންމާފައިވަނީ، 3،000 މެމްބަރުން ހަމަކުރުމަށް ދިން ދެވަނަ ފުރުސަތުގައިވެސް އެޕާޓީއަށް 3،000 މެމްބަރުން ހަމަނުވުމާއި ގުޅިގެންނެވެ.

އެމްއާރުއެމްގެ މެމްބަރުންގެ އަދަދު 3،000 އަށްވުރެ ދަށަށް ދިއުމާއެކު އެޕާޓީއަށް 3،000 މެމްބަރުން ހަމަކުރުމަށް އީސީން 2022 ވަނަ އަހަރުވެސް ނޯޓިސް ފޮނުވާފައި ވެއެވެ. އެފަހަރު ދިން 3 މަހުގެ މުއްދަތު ހަމަވުމުގެ ކުރިން، ފާއިތުވި އަހަރުގެ ޖޫން މަހުގެ ތެރޭގައި އެޕާޓީން ގާނޫނުގައި ބުނާ އަދަދަށް މެމްބަރުން ހަމަކޮށްފައި ވެއެވެ.

އެހެންނަމަވެސް އަނެއްކާވެސް ގާނޫނުގައި ބުނާ އަދަދަށްވުރެ ޕާޓީގެ މެމްބަރުންގެ އަދަދު ދަށަށް ދިއުމާއި ގުޅިގެން އީސީން މެމްބަރުން ހަމަކުރުމަށް އެމްއާރުއެމްއަށް ނޯޓިސް ފޮނުވާފައިވަނީ މިއަހަރުގެ ފެބުރުއަރީމަހުގެ 22 ވަނަ ދުވަހުއެވެ.

ޕާޓީތަކާބެހޭ ގާނޫނުގައި ބުނާގޮތުން އިލެކްޝަންސް ކޮމިޝަނުން ދޭ މުއްދަތުގައި ސިޔާސީ ޕާޓީއަކަށް ގާނޫނުގައި ބުނާ މުއްދަތަށް މެމްބަރުން ހަމަ ނުކުރެވިއްޖެނަމަ އެޕާޓީއެއް އުވާލުމަށް ނިންމުމުގެ ބާރު އީސީއަށް ލިބިގެން ވެއެވެ.

މިގޮތުން ދާދިފަހުން އިލެކްޝަންސް ކޮމިޝަނުންންވަނީ ގާނޫނުގައި ބުނާ އަދަދަށް މީހުން ހަމަނުކުރެވިގެން ދެޕާޓީއެއް އުވާވެސްލާފައެވެ. އެއީ ރައީސް މައުމޫން އެންމެ ފުރަތަމަ އުފެއްދެވި ޑީއާރުޕީއާއި ދާދިފަހުން އުފެއްދި ލިބަރަލް ޕާޓީއެވެ.

އިލެކްޝަން ކޮމިޝަންގެ ވެބްސައިޓުގައި ވާގޮތުން 21 ފެބުރުވަރީ 2023ގެ ނިޔަލަށް އެމްއާރުއެމްގައި ތިބި މެމްބަރުންގެ އަދަދަކީ 2،981 މެމްބަރުންނެވެ.

އިލެކްޝަންސް ކޮމިޝަނުން އެމްއާރުއެމް އުވާލަން ނިންމިއިރު ކުރިޔަށް އޮތް ރިޔާސީ އިންތިޚާބުގައި ކޯލިޝަން ހަދާނެ ޕާޓީތަކެއް ނިންމުމަށް ބައެއް ސިޔާސީ ޕާޓީތަކާއި އެޕާޓީން ދަނީ ވާހަކަވެސް ދައްކަމުންނެވެ.