މާލޭގެ ތިން ސަރަހައްދެއްގައި ބޮމުގެ ހަމަލާދީގެން މަޖިލީހުގެ ރައީސް މުހައްމަދު ނަޝީދު މަރާލަން އުޅުނުކަން ސަރުކާރަށް އެނގޭނެ ކަމުގައި ރައީސް ނަޝީދު ވިދާޅުވެއްޖެއެވެ.
ނަޝީދަށް އަމާޒުކޮށް މެއި 6، 2021 ގައި ބޮމުގެ ވަރުގަދަ ހަމަލާއެއް ދިނީ ކެނެރީގޭ ކައިރިންނެވެ. ނަޝީދު ކާރުކޮޅަށް އަރާވަޑައިގަންނަވަނިކޮށް މި ހަމަލާ ދިނީ ސައިކަލެއްގައި އައިޑީއެއް ހަރުކޮށްގެންނެވެ. މި ހަމަލާގައި ނަޝީދަށް ސީރިއަސް ޒަހަމްތަކެއް ލިބިވަޑައިގެން އޭޑީކޭ ހޮސްޕިޓަލާއި ޖަރުމަނާއި އިނގިރޭސި ވިލާތުގައި ފަރުވާ ހޯއްދެވިއެވެ. މިއީ ރާއްޖޭގައި މިހާތަނަށް ދިން އެންމެ ނުރައްކާތެރި ބޮމުގެ ހަމަލާއެވެ.
ރައްޔިތުންގެ މަޖިލީހުގައި މިއަދު ކުރިއަށް ދިޔަ ދަނޑުވެރިންގެ ސަބްސިޑީ އަލުން އިޔާދަކޮށްދިނުމަށް ގޮވާލާ ގަރާރުގެ ބަހުސްގައި ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވަނީ މޭރީބްރައުން އާއި ޔާގޫތުގެ ކައިރީގައި ރައީސް ނަޝީދަށް އަމާޒުކޮށް ބޮމުގެ ހަމަލާއެއް ދޭން އުޅުނު ކަމުގެ މައުލޫމާތު ލިބުމުން އެކަންކަމަށް ސަރުކާރުން އަޅާލާފައިނުވާ ކަމަށް ވިދާޅުވެފައެވެ.
މިވާހަތަކާއި ގުޅިގެން މެންބަރު އިބްރާހީމް ރަޝީދު (ބޮންޑޭ) ވަނީ ބޮމުގެ އިތުރު ހަމަލާތަކެއް ދޭން އުޅުނު ކަމުގެ މައުލޫމާތު ކުރިން ނުލިބޭ ކަމަށް ވިދާޅުވެފައެވެ.
ބޮންޑޭގެ ވާހަތަކުގެ ތަފްސީލް ދެއްވަމުން ރައީސް ނަޝީދު ވިދާޅުވީ މެރީ ބްރައުން ކައިރީގައި އާއި ޔާގޫތުގެ ކައިރީގައި އާއި ކެނެރީގޭ ކައިރީގައި ބޮމެއް ބާއްވައި އެމަނިކުފާނު އަވަހާރަކޮށްލަން އުޅުނު ކަމުގެ މައުލޫމާތު ސަރުކާރަށް ސާފުކޮށް އެނގިފައިވާ ކަން މަޖިލިހުގައި ކުރި ތަހުގީގުތަކުންނާއި އިތުރު ތަހުގީގުތަކުން ހާމަވެފައިވާ ކަމަށެވެ.
މޭރީ ބްރައުން ރެސްޓޯރެންޓް ކައިރީގައި ބޮމެއް ބަހައްޓާ އަޅުގަނޑު މަރާލަން އުޅުނު ކަމާއި އަދި ޔާގޫނުތުގޭ ދޮށުގައި ބޮމެއް ބަހައްޓާ އަޅުގަނޑު މަރާލަން އުޅުނު ކަމުގެ މައުލޫމާތު އަދި ކެނެރީގޭ ދޮށުގައި ބޮމެއް ބަހައްޓާ އެކަން ކުރަން އުޅޭކަމުގެ މައުލޫމާތު ސަރުކާރަށް އޮތީ ސާފުކޮށް އެނގިފަ. އެކަން މިތަނުގައި ހުރި ތަހުގީގު ތަކުންނާއި އަދި އިތުރު ތަހުގީގު ތަކުން ވާނީ އެނގިފަ.
– ރައީސް ނަޝީދު ވިދާޅުވިއެވެ.
ނަޝީދަށް ހަމަލާދިން މައްސަަލައިގައި މިހާތަނަށް ނުވަ މީހެއްގެ މައްޗަށް މި ވަނީ ދައުވާ އުފުލައިފައެވެ. އޭގެ ތެރެއިން ވ. ތިނަދޫ ހިޔާ އަދުހަމް އަހުމަދު ރަޝީދުގެ މައްޗަށް ކުށް ސާބިތުވެ، 23 އަހަރަށް ޖަލަށް ލާން ވަނީ ހުކުމްކޮށްފައެވެ. އަދުހަމް ވަނީ ބޮމުގެ ހަމަލާ ދިން ކަމަށް ޝަރީއަތުގައި އެއްބަސްވެފައެވެ.
މިމައްސަލާގައި ރައީސް ނަޝީދުގެ ބޮޑެތި ކަންބޮޑުވުންތަކެއް ހުރިއިރު، މިމައްސަލާގައި ސަރުކާރުން އެންމެ އެކަށީގެންވާ މަސައްކަތްތަކެއް ނުކުރާކަމަށް ރައީސް ނަޝީދު ދަނީ ވިދާޅުވަމުންނެވެ.
