ހުވަދު އަތޮޅުގައި އާރްޓީއެލް ފެރީގެ ޚިދުމަތް ޖުލައި މަހުގެ ފުރަތަމަ ހަފްތާގައި ފަށާނެ ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ރައްޔިތުންގެ މަޖިލީޙުގެ މިއަދުގެ ޖަލްސާގައި ގެމަނަފުށީ ދާއިރާގެ މެންބަރު އަހުމަދު ސައީދު ކުރެއްވި ސުވާލަކަށް ޖަވާބު ދެއްވަމުން މިނިސްޓަރ އަސްލަމް ވިދާޅުވީ، ގއ އަދި ގދ އަތޮޅުގައި އާރްޓީއެލް ޚިދުމަތްތައް އަންނަ ޖުލައި މަހުގެ ކުރީކޮޅު ފަށަން މަސައްކަތް ކުރަށްވަމުން ގެންދަވާ ކަމަށެވެ.
މިނިސްޓަރ ވިދާޅުވީ ދާދި ދަހުން މިނިސްޓްރީގެ ޓީމެއް ހުވަދު އަތޮޅަށް ގޮސް ބަލަން ޖެހޭ ކަންކަން ބަލާފައިވާ ކަމަށާ އެގޮތުން ޚިދުމަތާމެދު އާއްމުންގެ ޚިޔާލު ހުރި ނެތް ގޮތް ސާފުކޮށްފައިވާ ކަމަށެވެ.
އަސްލަމް ވިދާޅުވީ، ހުވަދު އަތޮޅުގައި އާރްޓީއެލްގެ ޚިދުމަތް ފަށަން ނިންމާފައި ވަނީ 6 އުޅަނދާއި އެކުގައި ކަމަށާ ޖުލައި މަސް ނިމުމުގެ ކުރިން އެއަދަދު އަށަކަށް އިތުރުވާނެ ކަމަށެވެ.
ފެރީގެ ނިޒާމުން މުޅި ރާއްޖެ އެއް ވިއުގައަކުން ގުޅާލުމަކީ ރައީސް އިބްރާޙީމް މުހައްމަދު ޞާލިހްގެ ވައުދުފުޅެކެވެ.
