2021 އަހަރުގެ އޮކްޓޯބަރު މަހުގެ 19ވަނަ ދުވަހު މަރާލާފައިވާ، އައިޖީއެމްއެޗުގެ ނަރުސް، މޭރީ ގްރޭސްއާއެކު އައިޖިއެމް ހޮސްޕިޓަލުގައި މަސައްކަތް ކުރި އޭނާގެ އެކުވެރިޔަކު ކުރިމިނަލް ކޯޓުގައި މިއަދު ކުރިޔަށް ގެންދެވުނު މޭރީގެ މަރުގެ މައްސަލާގެ ޝަރީއަތުގައި ހެކިބަސް ދީފިއެވެ.
މޭރީ މަރާލި މައްސަލާގައި އޭނާގެ ފިރިމީހާ މާވިންގެ މައްޗަށް ދައުވާކުރާއިރު، އައިޖީއެމްއެޗްގައި އޭރު މަސައްކަތް ކުރަމުންދިޔަ ނަރުހެއްކަމަށްވާ ހަލީމަތު ލަމްހާގެ މައްޗަށްވެސް ދައުލަތުން ދައުވާ ކުރެއެވެ. އޭނާއަކީ މާވިންގެ ލޯބިވެރިޔާއެވެ.
މާވިންގެ މައްޗަށް ދައުލަތުން އުފުލާފައިވަނީ ގަސްތުގައި މީހަކު މެރުމުގެ ކުށުގެ ދައުވާއެވެ. އަދި ލަމްހާގެ މައްޗަށް އިތުރު 3 ދައުވާއެއް އުފުލާފައިވެއެވެ. އެއީ އެނގިހުރެ މީހަކު މެރުމުގައި ބައިވެރިވުމާއި، އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދައުވާއާއި، ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ދައުވާއެވެ.
ކުރިމިނަލް ކޯޓުގައި މިއަދު ބޭއްވުނު ޝަރީއަތުގައި ވަނީ، އައިޖީއެމް ހިސްޕިޓަލުގައި މަސައްކަތް ކުރަމުންދިޔަ ދިވެހި ނަރުހެއްގެ ހެކިބަސް ނަގާފައެވެ. އޭނާއަކީ މޭރީގެ އެކުވެރިއެއްވެސް މެއެވެ.
ހެކިވެރިޔާ ހެކިބަސް ދެމުން މިއަދުގެ ޝަރީއަތުގެ މަޖިލިހުގައި ބުނެފައިވަނީ ލަމްހާއާ މާވިންއާ ދެމެދު ގުޅުން އޮންނަން މޭރީއަށް ހާމަވީ މޭރީ މާވިންގެ ފޯނު ބެލުމުންކަމަށް އޭނާ ގާތު މޭރީ ބުނެފައިވާކަމުގައެވެ. އިތުރަށް ހެކިވެރިޔާ ބުނެފައިވަނީ މޭރީއާއި މާވިންއާމެދު އޮތް ގުޅުން ފަހުން ރަގަޅުވި ކަމަށާއި، އެއީ މޭރީއާއި ދެކޮޅަށް ލަމްހާ ފުލުހަށް ހުށެހެޅި މައްސަލައަކާއި ގުޅިގެން ފުލުހަކު މޭރީއާއި ބައްދަލު ކުރި ފަހުން ކަމުގައެވެ.
ހެކިވެރިޔާ ބުނެފައިވަނީ މޭރީ މަރުވި ދުވަހު އޭނާގެ ހަށިގަޑު މެންދުރުފަހު ހޮސްޕިޓަލަށް ގެންދިޔައީވެސް މާވިން ކަމަށާއި، މޭރީގެ މަރާއި ގުޅޭގޮތުން މާވިންއާއި ސުވާލު ކުރުމުން އޭނާ ދަންޖެހުނީކަމަ ބުނެފައިވާ ކަމުގައެވެ. ހެކިވެރިޔާ ބުނި ގޮތުގައި މޭރީ މަރުވި ދުވަހުވެސް އޭނާ މޭރީއާއެކު ހޮސްޕިޓަލުގައި މަސައްކަތް ކޮށްފައި ވެއެވެ.
ހެކިވެރިޔާ ބުނެފައިވަނީ މޭރީ ދަންޖެހުނުކަމަށް މާވިން ބުނިނަމަވެސް މޭރީ ދަންޖެހިފައި ހުރިކަމުގެ އެެއްވެސް ނިޝާނެއް އޭނާގެ ހަށިގަޑުން ފެންނާން ނެތް ކަމުގައެވެ.
މިމައްްސަލާގައި މިއަދު ހެކިބަސް ނެގި އިތުރު ދެމީހުންނަކީ މޭރީގެ ހަށިގަޑު ހޮސްޕިޓަލަށް ގެންދިއުމުން ފަރުވާ ދިން ޑޮކްޓަރާއި، ލަމްހާ ދިރިއުޅުނު ކޮޓަރި ފާސްކުރަން ދިޔަ ފުލުހެވެ. މިމައްސަލާއިގެ އިތުރު އަޑުއެހުމެއް މާދަމާވެސް ބޭއްވުމަށް ވަނީ ހަމަޖެހިފައެވެ.
މޭރީގެ މަރުގެ ދައުވާ ސާބިތުކުރަން މާވިންއާއި ލަމްހާއާ ދެކޮޅަށް ވަނީ 74 ޝަފައީ ހެކިންނާއި 36 ކިތާބީ ހެކި ހުށަހަޅާފައެވެ.
