ހިފާފައިވާ ހުޅަނގު އައްސޭރީގެ އުތުރުގައި އޮންނަ ފަލަސްތީނުގެ ނާބުލުސްގައި ހުންނަ ބަލަޓާ ރެފިއުޖީ ކޭމްޕުގައި އިސްރާއިލް ހިންގި އަސްކަރީ އޮޕަރޭޝަނެގައި ފަލަސްތީނުގެ 3 މީހަކު ޝަހީދު ކޮށްލައިފިއެވެ.
ފަލަސްތީނުގެ ހެލްތު މިނިސްޓްރީން ބުނެފައިވާ ގޮތުގައި ޔަހޫދީ ސިފައިން ޝަހީދު ކޮށްލާފައިވަނީ އުމުރުން 30 އަހަރުގެ ފާތިހު އަބޫ ރިޒްކްއާއި، 32 އަހަރުގެ މުހައްމަދު އަބޫ ޒައިތޫންއާއި އުމުރުން 24 އަހަރުގެ އަބުދުﷲ އަބޫ ހަމްދާން އެވެ.
ފަލަސްތީނުގެ ހެލްތު މިނިސްޓްރީން ބުނެފައިވަނީ، އިސްރާއިލުގެ އަސްކަރިއްޔާއިން ދިން ހަމަލާތަކުގައި އިތުރު 7 މީހަކު ޒަޚަމް ވެފައިވާއިރު، އޭގެ ތެރެއިން 4 މީހެއްގެ ގަޔަށް އަސްލު ވަޒަން އަރާފައިވާކަމުގައެވެ. އެހެން މީހުންނަށް އަނިޔާވެފައިވަނީ ކަރުނަ ގޭހުގެ އަސަރު ކޮށްގެންނެވެ.
އިސްރާއިލުން ޝަހީދުކޮށްލު 3 މީހުންގެ ޖަނާޒާގައި މިއަދު ފަލަސްތީނުގެ އެތައް ސަތޭކަ ބަޔަކު ބައިވެރިވެފައި ވެއެވެ.
އިސްރާއިލުން މިއަދު ހިންގި އޮޕަރޭޝަން، ފަލަސްތީނު އޮތޯރިޓީ (ޕީއޭ)ގެ ތަރުޖަމާން ސިފަ ކޮށްފައިވަނީ ހިންގި ގަތުލުއާންމެއްގެ ގޮތުގައެވެ.
ފަލަސްތީނުގެ ނާބުލުސްގައި އިސްރާއީލު ސިފައިން ރޭ މެންދަމު 1 އިން ދަންވަރު 5 ޖަހަންދެން ކުރިޔަށް ގެންދިޔަ މި އޮޕަރޭޝަންގައި އިސްރާއީލުގެ އެތައް ސަތޭކަ ސިފައިންނާއި ސްޕެޝަލް ފޯސްއިން ބައިވެރި ވެފައި ވެއެވެ.
މި އޮޕަރޭޝަންގައި އިސްރާއީލު ސިފައިންވަނީ މި ރެފިއުޖީ ކޭމްޕަށް ވަންނަ ދިމާ ބުލްޑޯޒަރުތައް ބޭނުންކޮށްގެން ބްލޮކްކޮށް، އަދި ބައެއް ގެތައް ތަޅާލާ ބިމާއި ހަމަކޮށްފައެވެ. އަދި ބައެއް ޔުނިޓްތަކަށް ގެއްލުން ދީ، ހޭން ގްރެނޭޑްވެސް ބޭނުން ކޮށްފައިވާކަމަށް ރެފިއުޖީ ކޭމްޕްގައި ދިރިއުޅޭ މީހުން ބުނެފައި ވެއެވެ.
