ފުލުހުންގެ ބެލުމުގެ ދަށުގައި ހުއްޓާ ނިޔާވި ގދ.ހޯޑެއްދޫ ސްވެން ޢަބްދުﷲ ރަޝީދު ނިޔާވުމުގައި ފުލުހުންގެ އެއްވެސް އިހުމާލެއް ނެތް ކަމަށް ތަހުގީގުން ހާމަވެފައިވާ ކަމަށް ހޯމް މިނިސްޓަރު އިމްރާން ވިދާޅުވެއްޖެއެވެ.
މަޖިލީހުގެ ޖަލްސާގައި މަޑަވެލި ދާއިރާގެ މެމްބަރު ހުސެއިން ފިރުޝާން ވަނީ މިތަހުގީގު ކުރިއަށްދާ ގޮތާއި ގުޅޭގޮތުން ވަޒީރާއި ސުވާލު ކުރައްވާފައެވެ. ހޯމް މިނިސްޓަރ އިމްރާން ޢަބްދުﷲ ވިދާޅުވީ، މަރުހޫމް ޢަބްދުﷲ ރަޝީދުގެ މަރުގެ މައްސަލާގައި އެކަން ހިނގާދިޔަ ގޮތް ތަހުގީގު ކުރެއްވުމަށްޓަކައި ޕޯސްޓް މޯޓަމް ހެދުނުކަމަށެވެ. އެކަން ކުރުމަށް ދިމާވި ދަތިތަކާއި ހުރި ގޮންޖެހުންތައްވެސް މެމްބަރަށް ސާފުވާނެކަމަށް މިނިސްޓަރ ވިދާޅުވިއެވެ.
އަޅުގަނޑު ހިތުން އެކަމުގައި ޔަގީން ކުރަން ބޭނުންވީ ފުލުހުންގެ ސީދާ ޢަމަލެއް އޮވެގެންތޯ ނޫނީ ފުލުހުން އެކަމުގައި އިހުމާލެއް އޮވެގެންތޯ ޢަބްދުﷲ ރަޝީދު މަރުވުމަށް މެދުވެރިވީ. އެކަމާއި މެދުގައި އަޅުގަނޑުމެނަށް ފުލުހުންގެ ސީދާ އަނިޔާއެއް އޮވެގެން ނުވަތަ ގަސްތުގައި އިހުމާލެއް އޮވެގެން އެކަން ކުރިކަމަށް، އޭނަ މަރުވުމަށް ދިމާވިކަމަށް ސާބިތުވާނެ އެއްވެސް ހެއްކެތް އަޅުގަނޑުމެންނަށް ލިބޭކަށް ނެތް.
– މިނިސްޓަރ އިމްރާން ވިދާޅުވިއެވެ.
މި މަރުގައި ފުލުހުންގެ އިހުމާލެއް އޮތް ކަމަށް ބެލެވޭތީ ނޭޝަނަލް އިންޓެގްރިޓީ ކޮމިޝަން (އެންއައިސީ) އާއި ހިއުމަން ރައިޓްސް ކޮމިޝަން (އެޗްއާރުސީއެމް) އިން މައްސަލަ ތަހުގީގު ކުރި އެވެ. އަދި, އާއިލާގެ ނުރުހުމުގައި ޕޯސްމޯޓަމް ވެސް ހަދާފައިވެ އެވެ.
މިނިސްޓަރ ވިދާޅުވީ ތުހުމަތެއްކޮށް، ނުވަތަ ވާހަކައެއް ދެކެވުމުން އެކަމުގައި އިތުރަށް ކުރެނެ ކަމެއް ނެތްކަމަށެވެ. ފުލުހުންގެ ތަހުގީގުން އެކަން ސާބިތު ނުވާހާ ހިނދަކު ނުވަތަ އެކަން ފެންނަން ނެތްކަމުގައި ވާނަމަ އެކަމުގައި އިތުރަށް ކުރެވޭނެ ކަމެއް ނޯންނާނެކަމަށް ވަޒީރު ވިދާޅުވިއެވެ.
ގދ.ހޯޑެއްދޫ ސްވެން ޢަބްދުﷲ ރަޝީދު ނިޔާވެފައިވަނީ ފުލުހުންގެ ބެލުމުގެ ދަށުގައި ހުއްޓާ އޭނާގެ މެއަށް ތަދެއް އަރައި ސީޒަރގެ ޢަލާމާތްތަކެއް ފެނުމާއި ގުޅިގެން އޭނާ ގދ.މަޑަވެލި ސިއްޙީ މަރުކަޒަށް ގެންދިޔަ މަގުމަތީގައިކަމަށް ފުލުހުންވަނީ ވިދާޅުވެފައެވެ. އަދި އޭނާ ސިއްޙީ މަރުކަޒަށް ގެންދިޔައިރުވެސް ނިޔާވެފައިވާކަމަށް މަޑަވެލި ސިއްޙީ މަރުކަޒުން އޭނާ ބެއްލެވި ޑޮކްޓަރުންނާއި ޙަވާލާދީ ފުލުހުން ވަނީ ވިދާޅުވެފައެވެ.
މިމައްސަލާގައި އަދިވެސް އެއާއިލާއނިް ދަނީ ބޮޑެތި ކަންބޮޑުވުންތަކެއް ފާޅު ކުރަމުންނެވެ. އަދި މިހާތަނަށް މިކަމުގެ މައުލޫމާތު އާއިލާއާއި ހިއްސާ ނުކުރާކަމަށްބުނެ އާއިލާއިން ދަނީ ކަންބޮޑުވުން ފާޅު ކުރަމުންނެވެ.
