ކިތަންމެ ވަރަކަށް ހަޅެއްލަވައި އަޑުގަދަ ކުރެއްވިޔަސް، ކުރިއަށް އޮތް ރިޔާސީ އިންތިޚާބު ކާމިޔާބު ކުރައްވާނީ ރައީސް އިބްރާހިމް މުހައްމަދު ޞާލިހުކަމަށް ހޯމް މިނިސްޓަރ އިމްރާން ވިދާޅުވެއްޖެއެވެ.
އިމްރާން މިހެން ވިދާޅުވިއިރު މަޖިލީހުގައި މިއަދު އޭނާ ވަށާލައި އިހުތިޖާޖުކޮށް އަޑުގަދަކުރަން ފެށުމުން، ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމާއި މާވަށު ދާއިރާގެ މެމްބަރު މުހައްމަދު ސައީދާއި ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފުގެ ނަން އިއްވައި ރައްޔިތުންގެ މަޖިލީހުގެ ތަޅުމުން ނެރެފައެވެ.
ނައިފަރު ދާއިރާގެ މެމްބަރު ޕީޕީއެމް މެމްބަރު އަހުމަދު ޝިޔާމް އިސްވެ ގެންދެވީ އިދިކޮޅު ލީޑަރު އަދި ކުރީގެ ރައީސް ޔާމީނަށް އަނިޔާކުރަމުންދާ ކަމަށާއި އެ މަނިކުފާނު ވަގުތުން ދޫކޮށްލުމަށް ގޮވައިލައްވަމުންނެވެ.
މިކަމާއި ގުޅިގެން އިމްރާން މަޖިލީހުގެ ޖަލްސާގައި ޖަވާބު ދާރީވުމަށްފަހު ކުރެއްވި ޓުވީޓުގައި ވިދާޅުވީ ކިތަންމެ ވަރަކަށް މަޖިލީހުގައި ހަޅެއްލަވާ ހެދި ކަމުގައި ވީނަމަވެސް ރިޔާސީ އިންތިޚާބު ކާމިޔާބު ކުރާނީ ރައީސް ޞާލިހުކަމަށެވެ.
މިބޭފުޅުން ކިތަންމެ ހަޅޭހަޅެއްފުޅު ލެއްވިޔަސް އިރާދަކުރެއްވިއްޔާ އިންތިޚާބު ކާމިޔާބު ކުރައްވާނީ ރައީސް އިބްރާހިމް މުހައްމަދު ޞާލިހު.
– އިމްރާން ވިދާޅުވިއެވެ.
މިއަހަރު ބާއްވާ ރިޔާސީ އިންތިޚާބުގައިވެސް އަދާލަތު ޕާޓިން، އެމްޑީޕީގެ ރިޔާސީ ކެނޑިޑޭޓް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ތާޢީދުކުރަން ނިންމާ ވަނީ ކޯލިޝަން ހަދާފައެވެ. ރިޔާސީ އިންތިޚާބުގައި އަދާލަތު ޕާޓީން ރައީސް ޞާލިޙާއެކު ތިބުމަށް ނިންމާ ނެރުއްވި ޤަރާރުގައި ވަނީ މިވަގުތުގެ ޙާލަތުގައި، މާތްވެގެންވާ އިސްލާމް ދީނާއި ދިވެހި ޤައުމާއި ދިވެހި ރައްޔިތުންގެ އެންމެ މަތީ މަސްލަހަތު އޮތް ގޮތަކީ ވެސް އަދި އެ މަސްލަޙަތު ޙިމާޔަތްކުރުމަށްޓަކައި އެންމެ ފަހިކޮށް ޢަދާލަތު ޕާޓީ އަށް މަސައްކަތްކުރެވެން އޮތީވެސް 2023 ވަނަ އަހަރުގެ ރިޔާސީ އިންތިޚާބުގައި އެމް.ޑީ.ޕީގެ ރިޔާސީ ކެނޑިޑޭޓު، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙު އިންތިޚާބު ކޮށްގެން ކަމަށް ޢަދާލަތު ޕާޓީގެ މަޝްވަރާ މަޖިލީހަށް ފެންނަކަމަށެވެ.
2 Responses
އިލްމުވެރިންނޭ ކިޔާގެން އުޅޭމީސްމީހުން.ތިބަހުރަވައިން ވާހަކަ ދެއްކީމަ ހިވަނީ ވަކަރުގެ ބުރޭންޑެއްހެން ތީއަބުއި ގޮތެއް އޯކޭ
އިރާދަފުޅާ ނުލައި ބުނަން ހެޔޮނުވާނެ..!