ރައްޔިތުންގެ މަޖިލީހުގައި އޮތް ވެރިކަންކުރާ މައި ޕާޓީ އެމްޑީޕީގެ ސުޕަމެޖޯރިޓީ ގެއްލިއްޖެއެވެ.

އެމްޑީޕީގެ ސްލޮޓްގައި 68 މެންބަރަކު މަޖިލިހުގައި މިހާތަނަށް ތިއްބެވިއެވެ. އެއީ މި ފަހުގެ ތާރީހެއްގައި ގާނޫނުއަސާސީ އިސްލާހު ކުރެވޭ ވަރުގެ ސުޕަ މެޖޯރިޓީއެއް، އެއް ޕާޓީއަކަށް ލިބުނު ފުރަތަމަ ފަހަރު ވެސް މެއެވެ. ނަމަވެސް އެމްޑީޕީގެ ތެރޭގައި އޮތް ޚިޔާލް ތަފާތުވުންތަކާއިއެކު 12 މެމްބަރަކު ވަނީ އެމްޑީޕީން ވަކިވެފައެވެ. މިމެބްބަރުން ވަކިވުމާއިއެކު މަޖިލީހުގެ ސުޕަމެޖޯރިޓީ އެމްޑީޕީއަށް ވަނީ ގެއްލިފައެވެ.

މަޖިލިހުގެ 12 މެމްބަރަކު އެމްޑީޕީން މިދިޔަ ބުރާސްފަތި ދުވަހު ވަކިވެވަޑައިގަތުމުން އެ ޕާޓީގެ ޖުމުލަ މެންބަރުންގެ އަދަދު މިހާރު ވަނީ 55 އަކަށް މަދު ވެފައެވެ.

އެމްޑީޕީން ވަކިވެ ވަޑައިގެންނެވި މެމްބަރުން:

1- ގަލޮޅު އުތުރު ދާއިރާގެ މެންބަރު އީވާ
2- ހެންވޭރު ހުޅަނގު ދާއިރާގެ މެންބަރު ހަސަން ލަތީފް
3- ހުޅުދޫ ދާއިރާގެ މެންބަރު އިލްޔާސް ލަބީބް
4- އުނގޫފާރު ދާއިރާގެ މެންބަރު މުހައްމަދު ވަހީދު
5- މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ
6- މައްޗަންގޮޅި އުތުރު ދާއިރާގެ މެންބަރު މުހައްމަދު ރަޝީދު
7- ވިލުފުށީ ދާއިރާގެ މެންބަރު ހަސަން އަފީފް
8- މަޑަވެލީ ދާއިރާ މެންބަރު ހުސައިން ފިރުޝާން
9- ކުޅުދުއްފުށި އުތުރު ދާއިރާގެ މެންބަރު ޔާސިރު އަބްދުލް ލަތީފު
10- ގައްދޫ ދާއިރާގެ މެންބަރު އަހްމަދު ޒާހިރު
11- ތޮއްޑޫ ދާއިރާގެ މެންބަރު ހަސަން ޝިޔާން
12- މާފަންނު މެދު ދާއިރާގެ މެންބަރު އިބްރާހިމް ރަޝީދު

މަޖިލީހުގެ މިއަދުގެ ރިޔާސަތުގައި އިންނެވި ގަލޮޅު އުތުރު ދާއިރާގެ މެންބަރު އީވާ ވިދާޅުވީ، އެމްޑީޕީގެ ދަފްތަރުން 12 މެންބަރުން އުނި ކޮށްފައިވާ ކަން އިލެކްޝަންސް ކޮމިޝަން (އީސީ) އިން އަންގާފައިވާ ކަމަށާއި އެ މެންބަރުން ވެސް ޕާޓީން ވަކިވެފައިވާ ކަން މަޖިލީހުގެ އިދާރާ އަށް އަންގާފައިވާ ކަމަށެވެ. އެ ބަދަލާ އެކު، އެމްޑީޕީގެ ދަފްތަރުން އެ މެންބަރުންގެ ނަން އުނިވެ، އަމިއްލަ މެންބަރުންގެ ގޮތުގައި ހިމަނާފައިވާ ކަމަށް ވެސް އީވާ ވިދާޅުވިއެވެ.

މަޖިލިހުގައި މިހާރު ޕާޓީތަކުގެ މެމްބަރުން ބެހިފައިވާ ގޮތް:

އެމްޑީޕީ – 55
ޕީޕީއެމް – 5
ޕީއެންސީ – 3
އެމްއެންޕީ – 3
ޖޭޕީ – 2
އެމްޑީއޭ – 2
ވަކި ޕާޓީއަކަށް ނިސްބަތް ނުވާ މެންބަރުން – 17

އެމްޑީޕީން ވަކިވި މެންބަރުން އަންނަނީ "ދަ ޑިމޮކްރެޓްސް" ގެ ނަމުގައި އާ ސިޔާސީ ޕާޓީއެއް އުފެއްދުމުގެ މަސައްކަތް ކުރަމުންނެވެ. މަޖިލީހުގައި ހިމެނޭ އެމްޑީޕީގެ މެމްބަރުން ޕާޓީން ވަކި ވުމުން އުފެދިފައިވާ ޚިޔާލު ތަފާތުވުންތަކުގެ ތެރެއިން މަޖިލީހުގެ ނައިބް ރައީސް އީވާ މަޤާމުން ވަކި ކުރުމުގެ މަސައްކަތް އެމްޑީޕީގެ ޕީޖީ ގްރޫޕުން ވަނީ ފަށާފައެވެ. ނަމަވެސް މަޖިލީހުގެ ރައީސް މުހައްމަދު ނަޝީދު އިތުބާރު ނެތްކަމުގެ މައްސަލައެއް މަޖިލީހަށް ވައްދަން ބޭނުން ނުވާކަމަށް އެޕާޓީން މިދިޔަ ހަފްތާގައި ވަނީ ބުނެފައެވެ.