މިފްކޯއިން މަސްކިރަން އަލަށްގެނައި ޖަޒީރާ 103 ނަމަކަށް ކިޔާ ބޯޓު މަސްކިރަން ފެށިދުވަހު ހަލާކުވެގެން އެބޯޓަށް މަސްކިރުމުގެ އޮޕަރޭޝަން ހުއްޓާލިގޮތަށް އަދިވެސް އެބޯޓުން މަސްކިރަން ނުފަށެއެވެ.
ފާއިތުވި އެޕްރިލްމަހު ރާއްޖެއައި ޖަޒީރާ 103 މަސްކިރާ ބޯޓަކީ ދެ ފަރާތުން މަސް ކިރޭ ގޮތަށް ދެ ކްރޭން ހަރުކޮށްފައިވާ، ދުވާލަކު 120 މެޓްރިކު ޓަަނުގެ މަސް ގަނެ ފިނިކުރެވޭނެ، އަދި 420 މެޓްރިކް ޓަނުގެ މަސް ރައްކާ ކުރެވޭ ބޯޓެއްކަމަށް މިފްކޯއިން ބުނެފައި ވެއެވެ.
މިމަހުގެ 18ވަނަ ދުވަހު، މިބޯޓުން އަލަށް ރާއްޖޭގައި މަސްކިރަން ފަށާފައިވަނީ ދައުލަތުގެ ވަޒީރުން ގޮސް ގދ. ފަރެސްމާތޮޑާގައި ބޭއްވުނު ހާއްޞަ ބޮޑު ރަސްމިއްޔަތަކާއިއެކުއެވެ.
މި ބޯޓަކީ ގދ އަތޮޅަށް ހާއްޞަކޮށްގެން ގެނެސްފައިވާ ބޯޓެކެވެ. މައުލޫމާތު ލިބިފައިވާ ގޮތުގައި، އަލަށް މަސްކިރަން ފެށުމާއެކު ޖެހުނު މައްސަލަތައް ހައްލު ކުރުމަށް، ބޯޓްވަނީ މަރާމާތުކުރަން ކޫއްޑޫއަށް ގެންގޮސްފައެވެ.
18 މޭއި 2023 ވީ ބުރާސްފަތި ދުވަހު ގދ.ފަރެއްމާތޮޑާގައި އޮތް ރަސްމިއްޔާތުގައި ވާހަކަދައްކަވަމުން ފިޝަރީޒް މިނިސްޓަރާއި، ފިނޭންސް މިނިސްޓަރާއި އަދި މިފްކޯގެ ސީއީއޯވެސް ވަނީ މިފްކޯއަށް އަލަށް ގެނައި މިބޯޓުގެ އޮޕަރޭޝަންތައް ފެށުމުން މަސްކިރުމުގައި ގާއިމްވެގެންދާނެ ލުއިފަސޭހަކަމުގެ ވާހަތަކާއި އަދި ބޯޓަކީ އެންމެ ޒަމާނީ ވަސީލަތައް ގާއިމްކުރެވިފައިވާ ބޯޓެއްކަމަށްވެސް ވިދާޅުވެފައެވެ.
މި ރަސްމިއްޔާތުގައި ވާހަކަ ދައްކަވަމުން، މި ބޯޓުން ދުވާލަކަށް 120 ޓަނުގެ މަސްބޯޓަށް ކިރޭނެކަމަށް މިފްކޯގެ ސީއީއޯ ވިދާޅުވި ނަމަވެސް، މައުލޫމާތު ލިބިފައިވާ ގޮތުގައި، ބޯޓުގެ އޮޕަރޭޝަން އިފްތިތާހުކޮށް، މަސްކިރަން ފެށުމަށްފަހު، 60 ޓަނުގެ މަސްނުކިރެނީސް ބޯޓުގެ ފިނިކުރުމުގެ ނިޒާމުގައި ހުރި ހޮޅިތަށް ފަޅައިގެންގޮސް މަސްކިރުންވަނީ ހުއްޓުމަކަށް އައިސްފައެވެ.
އަދި މިބޯޓަކީ ދޯނިފަހަރު ކައިރިކޮށްގެން މަސްކިރޭނެ ގޮތަށް ފަރުމާ ކުރެވޮފައިވާ ބޯޓެއްނޫން ކަމުގެ ޝަކުވާވެސް ބައެއް މަސްވެރިން ކޮށްފައި ވެއެވެ. މިގޮތުން، ބޯޓުގެ ދެފަރާތުގެ އަރިމަތިން ބޭރަށް ނެރެފައިވާ ބައެއްގެ ސަބަބުބް ބޯޓަށް މަސްކިރަން ކައިރިކުރާ ދޯނިތަކަށް ގެއްލުންވުމުގެ ފުރުސަތު ބޮޑުކަމަށް ބައެއް މަސްވެރިން ބުނެފައި ވެއެވެ.
މިބޯޓުގެ އިތުރުން، މިފްކޯއަށް ގެންނަން ހަމަޖެހިފައިވާ އަނެއް ތިންބޯޓުވެސް މިހާރު ވަނީ ރަޖިސްޓްރީކޮށް ނިންމައި، ތައިލޭންޑުގައި ޑޮކުކޮށްފައެވެ. އަދި މަސްކިރުމުގެ އޮޕަރޭޝަނަށް ފަސޭހަކުރުމަށްޓަކައި ގެންނަންޖެހޭ ބައެއް ބަދަލުތައް ބޯޓުތަކަށް ގެނައުމުގެ މަސައްކަތް ކުރަމުންދާކަމަށް މިފްކޯއިން ކުރިން ބުނެފައި ވެއެވެ. މިއިން ކޮންމެ ބޯޓެއްގައި ދުވާލަކު 60 ޓަނު މަސް ގަނެވޭނެ ކެޕޭސިޓީ ހުންނާނެކަމަަށް މިފްކޯއިން ބުނެއެވެ.
މިފްކޯއިން ބޮޑު ޚަރަދެއް ކޮށްގެން ރާއްޖެ ގެނައި މަސްކިރާ ބޯޓަށް މަސްކިރަން ފެށުމާއެކު ބޯޓުގައި މައްސަލަ ޖެހި މަރާމާތައް ދާން ޖެހުމާއި ގުޅިގެން، ބޯޓުގެ ފެންވަރާއި އަދި ބޯޓު ގެނައުމަށް ކޮށްފައިވާ މުއާމަލާތުތަކާއި ގުޅޭގޮތުން ގިނަބަޔަކު ދަނީ ސުވާލު އުފައްދަމުންނެވެ.
