ކުރިޔަށް އޮތް ރިޔާސީ އިންތިޚާބަށް އެންމެ ދެތިން މަހަަށް ގާތްވެފައިވާއިރު ގިނަބަޔަށް އަދިވެސް ކަށަވަރު ވެފައި ނުވާ އެއްކަމެއް އެބައޮތެވެ. އެއީ ރައީސް ސާލިހުއާއި ކުރިޔަށް އޮތް ރިޔާސީ އިންތިޚާބުގައި ވާދަކުރާނޭ އިދިކޮޅު ރިޔާސީ ކެނޑިޑޭޓަކު އަދިވެސް ފެންނާން ނެތުމެވެ.

މިހާތަނަށް އައިއިރު ކުރިޔަށް އޮތް ރިޔާސީ އިންތިޚާބުގައި ވާދަކުރާނޭކަން ޖުމްލަ 5 ކެނޑިޑޭޓަކު މިހާތަނަށް އިއުލާންކޮށް، އޭގެ ތެރެއިން ބައެއް ފަރާތްތަކުން ކެމްޕޭން ފައްޓެވި ނަމަވެސް އޭގެ ތެރޭގައި ހިމެނޭ ހުރިހާ ކެނިޑިޑޭޓުންނަކީވެސް ކުރިޔަށް އޮތް ރިޔާސީ އިންތިޚާބު ކާމިޔާބު ކުރެއްވޭވަރުގެ ސިޔާސީ ހަކަތަ ހުރި ކެނޑިޑޭޓުންގެ ގޮތުގައި ގިނަބަޔަކު ދެކެމުންނެއް ނުދެއެވެ.

އޭގެ ތެރޭގައި ހިމެނެނީ، އެންމެ ފަހުން އުފެއްދި އެމްއެންޕީގެ ރިޔާސީ ކެނޑިޑޭޓު ކާނަލް ނާޒިމްއާއި، ޖުމުހޫރީ ޕާޓީގެ ފަރާތުން ރިޔާސީ އިންތިޚާބުގައި ވާދަކުރައްވާނޭކަން އިއުލާން ކޮށްފައިވާ އެޕާޓީގެ ރިޔާސީ ކެނޑިޑޭޓު ގާސިމް އިބުރާހިމްއާއި، މިނިވަން ކެނޑިޑޭޓުންގެ ގޮތުގައި ވާދަކުރައްވާނޭކަން އިއުލާން ކޮށްފައިވާ ދެބޭފުޅުން ކަމުގައިވާ ކުރީގެ ބަންޑާރަނައިބު ޑރ. މުހައްމަދު މުނައްވަރުގެ އިތުރުން ކުރީގެ ހޯމް މިނިސްޓަރު އުމަރު ނަސީރެވެ.

މިހުރިހާ ބޭފުޅުންނާއި، އޭގެ އިތުރުން ރައީސް ސާލިހުވެސް ރިޔާސީ އިންތިޚާބުގައި ވާދަކުރައްވާނޭކަން އިއުލާންކޮށް، ހުރިހާ ކެނޑިޑޭޓުންވެސް އެކި ސިފަސިފައިގެ ތާއީދު ހޯއްދެވުމަށް އެކި މަސައްކަތް ކުރައްވަމުން ގެންދެވިނަމަވެސް، ރައީސް ސާލިހަށް ހަގީގީ ގޮންޖެހުމެއް ކުރިމަތި ކުރެއްވޭނެ ފަރާތެއްގެ ގޮތުގައި އަދިވެސް ގިނަ ބަޔަކު ސިފަކުރަމުން ދަނީ އިދިކޮޅު ޕީޕީއެމްއިން ނެރޭނެ ރިޔާސީ ކެނޑިޑޭޓަކަށެވެ.

އެހެންނަމަވެސް، އެ ޕާޓީގެ ރިޔާސީ ޓިކެޓް ހަވާލުކޮށްފައިވާ، ޕާޓީގެ ރިޔާސީ ކެނޑިޑޭޓް އަދިވެސް އޮންނެވީ ޖަލުގައެވެ. ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. މި ހުކުމާއެކުވެސް އިދިކޮޅު ޕީޕީއެމްގެ ލީޑަރޝިޕްގައި ހިމެނޭ ބައެއް ފަރާތްތަކުން އަދިވެސް ގެންދަވަނީ ރައީސް ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަކުރެއްވޭނެކަމަށް ވިދާޅުވެ ހުވަފެންތައް ދައްކަވަމުންނެވެ.

އެހެންނަމަވެސް، އިދިކޮޅު ޕީޕީއެމްގެ ރިޔާސީ ޓިކެޓަށް ޕާޓީގެ އެތެރޭގަ އޮތް ވާދަވެރިކަމާއި، އަދި ރައީސް ޔާމިނަށް ވާދަ ނުކުރެވިއްޖެ ހާލަތެއްގައި ޕާޓީގެ ކެނޑިޑޭޓަކު އިންތިޚާބަށް ނެރުމަށް ޕާޓީގެ ސެނެޓާއި އަދި އެކްޓިވިސްޓުންގެ މެދުގައިވެސް އޮތް ޕްރެޝަރުގެ ނަތީޖާއެއްގެ ގޮތުން، އިދިކޮޅު ޕީޕީއެމްގެ ރިޔާސީ ޓިކެޓުގައި ރިޔާސީ އިންތިޚާބަށް، ރައީސް ޔާމިން ނޫން އެހެން ބޭފުޅަކު އެޕާޓީގެ ފަރާތުން ނިކުންނެވުމަކީ އެންމެ އެކަށީގެންވާ ގޮތްކަމުގައި ގަބޫލުރަން މިއަދު މިވަނީ މަޖުބޫރު ވެފައެވެ.

ރައީސް ސާލިހާ ދެކޮޅަށް، އެންމެން ރުހޭ އެއް ކެނޑިޑޭޓަކު ނެތް!

ކުރިޔަށް އޮތް ރިޔާސީ އިންތިޚާބުގައި ރައީސް ސާލިހު ބަލި ކުރުމަށް، ސަރުކާރާ ޚިޔާލު ތަފާތު ގިނަ ޕާޓީތަކުން ބޭނުންވިނަމަވެސް އެ ޕާޓީތަކަށް ސިޔާސީ/ގައުމީ އެއްވެސް މައްސަލައެއްގައި އެއްގަލަކަށް އެރިފައެއް ނުވެއެވެ.

އޭގެ އެންމެ ބޮޑު ހެއްކަކަށް ފެންނާން އޮތީ ޗާގޮސް މައްސަލައެވެ. ޗާގޮސްގެ މައްސަލައަކީ އެމައްސަލާގައި، އިދިކޮޅު ހުރިހާ ފަރާތްތަކުންވެސް ސަރުކާރަށް ސިޔާސީގޮތުން ފާޑު ކިޔަމުން އައި މައްސަލައަކަށްވި ނަމަވެސް، މިއަދާއި ހަމައަށްވެސް ފެންނާން އޮތް މަންޒަރަކީ ޗާގޮސްގެ މައްސަލާގައި ހުރިހާ ޕާޓީތަކަށް "ހިތާއި ރޫޙުން" އެއްގަލަށް ނޭރުނު މަންޒަރެވެ.

މިގޮތުން މިމައްސަލާގައި އެންމެ ފަހުން އުފެއްދި ޗާގޮސް ކޯލިޝަނުން އެމްއާރުއެމް ވަކިވިއިރު، އެ އިއްތިހާދުން ބާއްވަން ހަމަޖައްސާފައިވާ ބޮޑު އެއްވުމަށް ޖުމުހޫރީ ޕާޓީގެ ލީޑަރު ގާސިމް އިބުރާހިމް ތާއީދެއް ނުކުރައްވައެވެ.

ހަމައެއާއެކު ކުރިން ގިނަ ބަޔަކަށް ހީކުރެވިފަ އޮތީ އެމްޑީޕީއާއި ޚިޔާލު ތަފާތުވެ، އެޕާޓީން މިހާރު ވަކިވެފައިވާ ފިކުރެއްގެ ދިރުން ސިޔާސީ ހަރަކާތާ ޖޭޕީ ގުޅިގެން އުފައްދާ ކޯލިޝަންގެ ކެނޑިޑޭޓުގެ ގޮތުގައި ގާސިމް އިބުރާހިމްއަކީ، ކުރިޔަށް އޮތް ރިޔާސީ އިންތިޚާބުގައި ރައީސް ސާލިހަށް ކުރިމަތިވާނެ ބޮޑު ގޮންޖެހުމަކަށް ވެގެންދާނޭ ކަމުގައެވެ.

އަދި އެއާއެކު، ރައީސް ޔާމިނަށް ރިޔާސީ އިންތިޚާބުގައި ވާދަ ނުކުރެއްވޭ ހާލަތުގައި، އިދިކޮޅު ޕީޕީއެމްގެ ކެނޑިޑޭޓަކު ރިޔާސީ އިންތިޚާބުގައި ވާދަކުރުމުގެ ބަދަލުގައި އެޕާޓީންވެސް ޖޭޕީގެ ރިޔާސީ ކެނޑިޑޭޓަށް ތާއީދުކޮށް، ގާސިމް އިބުރާހިމްއަކީ ރައީސް ސާލިހާއި ވާދަކުރައްވާނޭ އިދިކޮޅު ކެނޑިޑޭޓުގެ ގޮތުގައި ކުޑަ ދުވަސްކޮޅަކަށް ނަމަވެސް ސިފަ ކުރެވިގެން ދިޔައެވެ.

އެހެންނަމަވެސް، ފިކުރެއްގެ ދިރުން ސިޔާސީ ޕާޓީއެއްގެ ގޮތުގައި އިއުލާންކޮށް، އަދި އެޕާޓީންވެސް ރިޔާސީ ކެނޑިޑޭޓަކު ވާދަކުރާނޭކަން އިއުލާން ކުރުމާއި ހަމައިން، އެހަރަކާތާއި ޖޭޕީއާ އެކުވެގެން އުފެއްދި ކޯލިޝަން ވެގެންދިޔައީ ވަރަށްވެސް އުމުރު ކުރު ކޯލިޝަނެއް ކަމުގައެވެ. ހަމަ އެއާއެކު، ކުރިން ހީކުރެވުނު ވަރުގެ ކާމިޔާބީއެއްވެސް ރިޔާސީ އިންތިޚާބުގައި ގާސިމް އިބުރާހިމަށް ނުނެރެވޭނެކަމަށް ގިނަބަޔަކަށް ވަނީ ގަބޫލު ކުރެވިގެން ގޮސްފައެވެ.

އަދި އެ ހީކުރުންތަކާއެކު، އިދިކޮޅު ޕީޕީއެމްގެ އެތެރޭގައި އެޕާޓީގެ ރިޔާސީ ޓީކެޓަށް އޮތް ވާދަވެރިކަން ބޮޑުވެފައިވަނިކޮށް، ދެން އައީ ރައީސް ޔާމިންގެ މައްޗަށް ކުރެވެމުންދާ ދައުވާތަކުގެ ތެރެއިން ފުއްގިރި މައްސަލާގައި ސުޕްރިމް ކޯޓުން އިއްވި ހުކުމެވެ. އެކުމް އައިގޮތުން، އެ މައްސަލަ ދަށު ކޯޓު މަރުހަލާގައި ޔާމިނަށް ކާމިޔާވެދާނެކަމަށް ކުރެވެމުން އައި ހުރިހާ އުއްމީދެއް ފެނަށް ވެގެން ދިޔައީއެވެ. އެއީ އަދީބުއާއި ޒިޔަތުގެ ހެކިބަސް ޝަރީއަތުގެ މަރުހަލާގައި ބަލައިގަނެވޭނެކަމަށް ސުޕްރިމް ކޯޓުން ހުކުމް ކުރުމާއި ހަމައިންނެވެ.

އެހެންކަމުން، ޔާމިން މިހާރު ތަންފީޒު ކުރަމުންދާ ހުކުމާއި އަދި، ފުއްގިރި ޚިޔާނާތުގެ މައްސަލާގައި އިސްތިއުނާފްކުރި މައްސަލަ ޔާމިނަށް ނާކާމިޔާބު ވެގެންދިޔަ ހިސާބުން، ގިނަ ބަޔަކު ގަބޫލުކުރާ ގޮތުގައި، ކުރިޔަށް އޮތް ރިޔާސީ އިންތިޚާބުގައި ވާދަކުރުމަށް ޔާމިނަށް އޮތް އެންމެ ފަހުގެ އުއްމީދު ވަނީ ގެއްލިގެން ގޮސްފައެވެ.

އަދި ސިޔާސީ މަސްރަހަށް މިހާރު އައިސްފައިވާ ބަދަލުތަކާއެކު، ޔާމިނަށް ވާދަ ނުކުރެވޭ ހާލަތުގައި އިދިކޮޅު ޕީޕީއެމްއިން ރިޔާސީ ކެނޑިޑޭޓަކު ނިކުންނާނޭކަން މިއަދު މިވަނީ ޔަގީނާ ގާތަށް ކަށަވަރު ކުރެވިފައެވެ.

ޕާޓީގެ އެތެރޭގައި އެންމެ ބޮޑު ތާއީދެއް އޮތީ ކާކަށް؟

ކުރިޔަށް އޮތް ރިޔާސީ އިންތިޚާބަށް އިދިކޮޅު ޕީޕީއެމްގެ ރައީސް، ޔާމިނަށް ކުރިމަތި ނުލެވިއްޖެ ހާލަތެއްގައި އެޕާޓީގެ ފަރާތަކުން ރިޔާސީ އިންތިޚާބުގައި ވާދަކުރުމަށް ފައި ނަންގަވައިގެން ތިއްބެވި ހަތަރު ފަސް ބޭފުޅަކު ފެށުނީސުރެ ޕާޓީގެ އެތެރެއިން ދިޔައީ ފާހަގަވަމުންނެވެ. އެއީ މާލޭގެ މޭޔަރުކަމުގައި ހުންނެވި ޑރ. މުއިޒުގެ އިތުރުން ޕީޕީއެމްގެ ނާއިބު ރައީސްކަމުގެ މަގާމުގައި ހުންނެވި އައްސާން މައުމޫންއާއި، ނައިފަރު ދާއިރާގެ މެމްބަރު އަހުމަދު ޝިޔާމްގެ އިތުރުންވެސް މާވަށު ދާއިރާގެ މެމްބަރު މުހައްމަދު ސައީދު އަދި ކުރީގެ ރައީސް ޑރ. ވަހީދުފަދަަ ބައެއް ބޭފުޅުންނެވެ.

އެހެންނަމަވެސް، ޕީޕީއެމްގެ ލީޑަރޝިޕްގައި ހިމެނޭ ބައެއް ފަރާތްތަކުން މި ރިޕޯޓަށް މައުލޫމާތު ދީފައިވާ ގޮތުގައި މާވަށު ދާއިރާގެ މެމްބަރު މުހައްމަދު ސައީދުއާއި ޕީޕީއެމްގެ ނާއިބު ރައީސްގެ މަގާމުގައި ހުންނެވި އައްސާން މައުމޫނަށް ޕާޓީގެ ރިޔާސީ ޓިކެޓް ދިނުމާއި ރައީސް ޔާމިންވަނީ ދެކޮޅު ހައްދަވާފައެވެ.

އައްސާނަށް ރިޔާސީ ޓިކެޓް ލިބުމާއި ރައީސް ޔާމިންގެ އާއިލާއިންވެސް ވަރަށް ބޮޑަށް ދެކޮޅު. މުހައްމަދު ސައީދަށް ރިޔާސީ ޓިކެޓް ލިބުމަށް ރައީސް ޔާމިންގެ ރުހުމެއް ނެތް.

ނަން ހާމަ ނުކުރުމަށް ޝަރުތުކޮށް ޕީޕީއެމްގެ އިސް ބޭފުޅަކު ވިދާޅުވެފައި ވެއެވެ.

އެހެންނަމަވެސް އޭނާ ފާހަގަ ކުރެއްވި ގޮތުގައި، ރައީސް ޔާމިނަށް ރިޔާސީ އިންތިޚާބުގައި ވާދަ ނުކުރެވިއްޖެ ހާލަތެއްގައި، އެ ޕާޓީގެ ރިޔާސީ ކެނޑިޑޭޓެއްގެ ގޮތުގައި ނިކުންނެވުމަށް ޕާޓީގެ ސެނެޓްގައި މިހާރު އެންމެބޮޑު ތާއީދެއް މިހާރު އޮތީ މާލޭ ސިޓީގެ މޭޔަރު ޑރ. މުއިއްޒުއަށެވެ.

އޭގެ އެއް ސަބަބެއްގެ ގޮތުގައި ފާހަގަ ކޮށްފައިވަނީ، ރައީސް ޔާމިންގެ ދައުރުގައި ކުރިޔަށްދިޔަ ތަރައްގީގެ ބޮޑެތި ޕްރޮޖެކްޓްތައް ބެލެހެއްޓެވުމުގައި ލީޑަރޝިޕް ދައްކަވާފައިވަނީ މުއިއްޒުކަމަށް ވެފައި، އަދި އޭގެ އިތުރުން މޭޔަރުކަމުގެ މަގާމުގައި ހުންނަވައިގެންވެސް މުއިއްޒު އެ ލީޑަރުޝިޕް ދައްކަވަމުން ގެންދެވުމެވެ.

އެހެންކަމުން އިދިކޮޅު ޕީޕީއެމްގެ ރިޔާސީ ޓިކެޓު ދިނުމަށް އެޕާޓީގެ އެތެރޭގައި ޕްރައިމަރީއެއް ބޭއްވިއްޖެ ހާލަތުގައި، އެޕާޓީގެ މެމްބަރުންގެ ތާއީދާއެކީ ރިޔާސީ ޓިކެޓް ކާމިޔާބު ކުރައްވާނެކަމަށް ޔަގީންވެ ކަށަވަރުވާ ހަމައެކަނި ބޭފުޅެއްގެ ގޮތުގައި މިވަގުތު ހުންނެވީ މާލޭ ސިޓީގެ މޭޔަރު ޑރ. މުއިއްޒު ކަމުގައި ދަންނަވާން ޖެހެއެވެ. އަދި ޕީޕީއެމްގެ ލީޑަރޝިޕްގައި ހިމެނޭ ބައެއް ފަރާތްތަކާއި، އެޕާޓީގެ ސެނެޓްގައި ހިމެނޭ ގިނަބަޔަކު މިމޭރުމުން ޑރ. މުއިއްޒަށް ތާއީދުކޮށް މިހާރުވެސް ކެމްޕޭން ކުރަމުންދާކަން ފާހަގަ ކޮށްލެވެއެވެ.