ރައްޔިތުންގެ މަޖިލީހުގައި އޮތް ސިޔާސީ ވާދަވެރިކަމުގެ ތެރެއިން ނަމަވެސް އެއްވެސް ހާލަތެއްގައި ބުލީ ނުކުރެވޭނެކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ވިދާޅުވެއްޖެއެވެ.
އޭނާ މިހެން ވިދާޅުވީ މަޖިލިހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާގައި، ރޮޒެއިނާ އާދަމްގެ ނަން ރިޔާސަތުން ތަކުރާރުކޮށް އިއްވުމުން ވެސް އޭނާ މަޖިލިސް ތަޅުން ދޫކުރައްވަން ދެކޮޅު ހެއްދެވައި ހިނގައިދިޔަ ކަންތައްތަކާއި ގުޅިގެން ކުރެއްވި ޓުވީޓެއްގައެވެ.
ރޮޒޭނާ ވިދާޅުވީ އޭނާގެ ނަން އިއްވުމަށްފަހު މަޖިލީހުގެ ރިޔާސަތުން އަމަލުކޮށްފައިވަނީ ވަރަށް ޒިންމާދާރުކަން ކުޑަކޮށް ކަމަށެވެ. މަޖިލީހުގެ ގަވާއިދުގައިވެސް ވަރަށް ސާފުކޮށް އަންހެން މެމްބަރުން ނެރެންވާނީ އަންހެން ސެކިއުރިޓީން ކަމަށް ބުނާކަމަށެވެ. ނަމަވެސް ނަން އިއްވުމަށްފަހު އޭނާގެ ގައިގައި އަތްލައި ތަޅުމުން ނެރެން ފޮނުވީ ފިރިހެން ސެކުރިޓީއެއް ކަމަށެވެ. ޤާނޫނު އަސާސީގައިވެސް ޤާނޫނާއި ޚިލާފަށް ކުރެވޭ އަމުރަށް ކިޔަމަންވާން ނޯންނަކަމަށް ރޮޒޭނާ ވިދާޅުވިއެވެ.
މަޖިލީހުގެ ގަވާއިދާއި ޚިލާފަށް ފިރިހެނަކު އަޅުގަނޑުގެ ގައިގައި އަތްލާން ދައްކާކަށް ނުޖެހޭނެ. ނުވެސް ދައްކާނަން. މަޑަކުންވެސް ނުހުންނާނަން. އެތާ އަންހެނުން ތިއްބާ އަޅުގަނޑު ކައިރިއަށް ފިރިހެނެއް ފޮނުވާކަށް ނުޖެހޭ. ޤާނޫނު އަސާސީގައި އޮވޭ ޤާނޫނާއި ޚިލާފް އަމުރަށް ކިޔަމަން ވާން ނުޖެހޭނެކަމަށް. ބުލީއެއް ނުކުރެވޭނެ.
– ރޮޒޭނާ ވިދާޅުވިއެވެ.
ގާތްގަނޑަކަށް ބައިގަޑިއިރު ޖަލްސާ މެދުކަނޑާލުމަށް ފަހު، އަލުން ފެއްޓެވި އިރު ވެސް ރޮޒެއިނާ އިންނެވީ މަޖިލިސް ތަޅުމުގައެވެ. އެކަމާ ގުޅިގެން ނަޝީދު ދެވަނަ ފަހަރަށް ރޮޒެއިނާގެ ނަން އިއްވެވިއެވެ. އަދި ތަޅުން ދޫކުރައްވައި ވަޑައިގަތުމަށް ތަކުރާރުކޮށް އެންގެވިއެވެ. އެކަމަކު، އެ އަށް އަމަލެއް ނުކުރައްވައެވެ.
މީގެ ކުރިން މެންބަރުން ތަޅުން ދޫކުރަން ދެކޮޅު ހެއްދެވުމުން މަޖިލީހުގެ ސާޖަންޓް އެޓް އާމްސް ނުވަތަ އެހެން މުއައްޒަފުން އައިސް މެންބަރުން ގަދަކަމުން ނެރެއެވެ. ނަމަވެސް ނަޝީދު ވިދާޅުވީ އެގޮތަށް ރޮޒެއިނާ ނެރެން ބޭނުންފުޅު ނުވާ ކަމަށެވެ. ރޮޒެއިނާ ދެކޮޅު ހައްދަވާތީ ނަޝީދު ވިދާޅުވީ ގަވައިދުގެ ބޭނުމަށްޓަކައި ރޮޒެއިނާ މަޖިލީހުގެ ތަޅުމުގައި ނެތް ކަމަށް ބަލާނެ ކަމަށެވެ. އެއްވެސް ފުރުސަތެއް ނުދީ ރޮޒެއިނާ ނެތް ކަމަށް ބަލައިގެން ޖަލްސާ ކުރިޔަށް ގެންދަވަން ނަޝީދު ނިންމެވިއެވެ.
