މިފްކޯގެ މަސްކިރުމުގެ ކެޕޭސިޓީ އިތުރުކުރުމަށް ގެންނަން ހަމަޖެހިފައިވާ 4 ބޯޓުގެ ތެރެއިން، ފުރަތަމަ ގެނެސްފައިވާ ބޯޓު "ޖަޒީރާ 103″ ބޯޓުން އަލަށް މަސްކިރަން ފަށއިފިއެވެ.
މި ބޯޓު ބޭނުން ކުރަން ފަށާފައިވަނީ އެކަމަށްޓަކާ ބޭއްވުނު ރަސްމިއްޔާތަކަށް ފަހުއެވެ. މި ބޯޓުން އަލަށް މަސްކިރަން ފެށުމުގެ ގޮތުން، އެންމެ ފުރަތަމަ ކިރާފައިވަނީ ފަރެސްމާތޮޑާގެ "ވިލެޖް މެރީން" ނަމަކަށް ކިޔާ ދޯންޏަކުން ބޭނި މަހެވެ.
މިފްކޯއިން ގެނައި އާ ބޯޓު "ޖަޒީރާ 103″ ރާއްޖެ އައިސްފައިވަނީ ފާއިތުވި އެޕްރިލްމަހުގެ 6ވަނަ ދުވަހުއެވެ. މި ބޯޓަކީ ދެ ފަރާތުން މަސް ކިރޭ ގޮތަށް ދެ ކްރޭން ހަރުކޮށްފައިވާ، ދުވާލަކު 120 މެޓްރިކު ޓަަނުގެ މަސް ގަނެ ފިނިކުރެވޭނެ، އަދި 420 މެޓްރިކް ޓަނުގެ މަސް ރައްކާ ކުރުމުގެ ކެޕޭސިޓީ ހުރި ބޯޓެކެވެ.
މިފްކޯއަށް ގެންނަން ހަމަޖެހިފައިވާ އަނެއް ތިންބޯޓުވެސް މިހާރު ވަނީ ރަޖިސްޓްރީކޮށް ނިންމައި، ތައިލޭންޑުގައި ޑޮކުކޮށްފައެވެ. އަދި މަސްކިރުމުގެ އޮޕަރޭޝަނަށް ފަސޭހަކުރުމަށްޓަކައި ގެންނަންޖެހޭ ބައެއް ބަދަލުތައް ބޯޓަށް ގެނައުމުގެ މަސައްކަތް ކުރަމުންދާކަމަށް މިފްކޯއިން ބުނެފައި ވެއެވެ. މިއިން ކޮންމެ ބޯޓެއްގައި ދުވާލަކު 60 ޓަނު މަސް ގަނެވޭނެ ކެޕޭސިޓީ ހުންނާނެއެވެ.
މަސް ކިރާ ކެޕޭސިޓީ އިތުރުކުރުމަށް 2021 ވަނަ އަހަރުވެސް މިފްކޯއިން ވަނީ 300 ޓަނުގެ ސްޓޯރޭޖު ކެޕޭސިޓީ ހުރި އަދި ދުވާލަކު 120 ޓަނުގެ މަސްް ގަނޑުކުރެވޭ އުޅަނދަކާ، މަސް އެކްސްޕޯޓުކުރުމަށްޓަކައި 2400 ޓަނުގެ ކެރިއަރ ވެސެލްއެއް ހޯދާފައެވެ.
ފާއިތުވި އަހަރުތަކުގައި ރާއްޖޭގައި މަސްވެރިކަންކުރާ އުޅަނދުފަހަރުގެ ސައިޒު ބޮޑުވެ، މަސްވެރިން ބާނާ މަހުގެ އަދަދު ވަނީ ވަރަށް ބޮޑަށް އިތުރުވެފައެވެ. މިކަމާއި ގުޅިގެން މިފްކޯގެ މަސްކިރުމުގެ ގާބިލްކަން އިތުރުކުރުމަށްޓަކައި ސަރުކާރުން ގެންދަނީ ގިނަ މަސައްކަތްތަކެއް ކުރަމުންނެވެ.
