ރައްޔިތުންގެ މަޖިލީހުގެ އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފް (އައްޑޫ ޝަރީފް) އާ ދެކޮޅަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ސިވިލް ކޯޓަށް ހުށަހަޅުއްވާފައިވާ އަބުރުގެ ދައުވާ އަނބުރާ ގެންދަވައިފިއެވެ.
ނަޝީދަށް ތުހުމަތުކުރައްވައި ޝަރީފް ކުރެއްވި ޓްވީޓްގައި ނަޝީދު 50 މީހުން މަރަން އުޅުއްވީ ނޫސްވެރިންގެ ގޮތުގައި ކުލީ ސިފައިންގެ ބަޔަކު ރާއްޖެ ގެނެސްގެން އެމްޑީޕީގެ ބޮޑު މުޒާހަރާއެއްގެ ތެރެއިން ކަމަށް ލިޔުއްވާފައިވެއެވެ. އެ ތުހުމަތުތައް ނަޝީދުގެ ފަރާތުން ވަނީ ދޮގުކޮށްފައެވެ.
ރައްޔިތުންގެ މަޖިލީހުގެ އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފާ ދެކޮޅަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ސިވިލް ކޯޓަށް ހުށަހަޅުއްވާފައިވާ އަބުރުގެ ދައުވާ ރައީސް ނަޝީދު އަނބުރާ ގެންދެވުމުން ކޯޓުން އެ މައްސަލަ ބާތިލުކުރީ ބުދަ ދުވަހުއެވެ.
ޝަރީފާއި ދެކޮޅަށް ނަޝީދު އަބުރުގެ ދަޢުވާ ކުރަން ނިންމާފައި ވަނީ ޝަރީފު ކުރެއްވި ޓުވީޓުގައި މައުމޫން އަބްދުލްގައްޔޫމްގެ ވެރިކަން ވައްޓާލަން 50 މީހަކު މަރާލައި މަރުގެ ތުހުމަތު މައުމޫންގެ އިސްތަށިފުޅުގައި އަޅުވަން ނަޝީދު ރޭއްވެވި ކަމަށް ބުނެ ކުރި ޓްވީޓަކާއި ގުޅިގެންނެވެ. މި މައްސަލަ ނަޝީދުގެ ފަރާތުން ކޯޓަށް ހުށަހެޅީ މިދިޔަ ޑިސެމްބަރު މަހު ފަހުކޮޅުއެވެ.
ސިވިލް ކޯޓުގެ ހުމުގައިވާ ގޮތުން ދައުވާ އަނބުރާ ގެންދަވަން ބޭނުންވާ ސަބަބެއް ކަމަށް ނަޝީދު ވިދާޅުވެފައި ވަނީ މި މައްސަލަ މިހާރު ކުރިއަށް ގެންދަން ބޭނުން ނުވުމެވެ. އެހެންވެ ދައުވާ އަނބުރާ ގެންދިއުމާ މެދު، ދައުވާ ލިބޭ ފަރާތުގެ އިތުރާޒެއް އޮތްތޯ ބެލުމަށް ގާނޫނުގައި ދޭ 28 ދުވަހުގެ މުއްދަތު ފަހަނަޅައި ދިޔައިރު ވެސް ޝަރީފްގެ އެއްވެސް ހުށަހެޅުމެއް ލިބިފައިނުވާ ކަމަށް ހުކުމުގައިވެއެވެ.
މަދަނީ ދައުވާއެއް ކުރުމަށް ފަހު ދައުވާ އަނބުރާ ގެންދާ ހާލަތުގައި، ދައުވާގެ ސަބަބުން ކުރަންޖެހުނު ހަރަދެއް އޮތް ނަމަ، ދައުވާ ކުރި ފަރާތުން އެކަމަށް ޒިންމާވާންޖެހޭނެއެވެ. އެކަމަކު ޝަރީފްގެ ފަރާތުން އެ ހަރަދު ހޯދަން ވެސް ހުށައެއްނާޅުއްވައެވެ. އެހެންވެ ކޯޓުން ނިންމީ ނަޝީދު ކުރެއްވި ދައުވާ އަނބުރާ ގެންގޮސްވާ ކަމަށާއި މިހާރު ދައުވާގެ ފޯމު ބާތިލްވީ ކަމަށެވެ.
