މާލޭގެ އާޓިފިޝަލް ބީޗު ސަރަހައްދު ކުރިމަތީގައި ހުންނަ އެމްޑީޕީގެ މައި ހަރުގެ ހުރި ބިން ހުސްކުރަން ދިން ނޯޓިސްގެ މުއްދަތު ހަމަވުމުން ވެރިފަރާތުން، އެހެން ބަޔަކަށް އެތަން ކުއްޔަށް ދީފި އެވެ.
ގޭގެ ވެރިފަރާތްކަމުގައި ޝަފީޢާ ޒުބައިރުގެ ވަކީލްއާއި ހަވާލާދީ ބައެއް މީޑިއާތަކުގައި ބުނެފައިވަނީ އެމްޑީޕީގެ ހަރުގެ ހިންގާ ބިން ހުސްކުރަން ދިން މުއްދަތު މިދިޔަ ހަފުތާގައި ހަމަވެފައިވާކަމަށެވެ. އަދި މުއްދަތު ހަމަވެގެން އެމްޑީޕީއަށް ފުރަތަމަ ފޮނުވުނު ނޯޓިސްއާއި އެކު، ރިޔާސީ އިންތިޚާބު ކުރިއަށް އޮތުމާއި އެކު އިތުރު ތަނެއް ނެތް ކަން އަނގަބަހުން މުއާމަލާތް ހިނގި ނަމަވެސް ފަހުން އެކަމުގައި ގޮތެއް ނުނިމޭ ކަމަށް ގޭގެ ވެރިފަރާތުން ހާމަކޮށްފައިވެއެވެ. ގޭގެ ވެރިފަރާތުން ބިން ބޭނުންވާތީ، ނޯޓިސް ދިނުމަށް ފަހު ތަނާ ހަވާލުވެފައިވާކަމަށްވެސް ވަކީލާއި ހަވާލާދީ ބައެއް މީޑިއާތަކުގައި ބުނެފައިވެއެވެ.
އެންމެ ފުރަތަމަ އެމްޑީޕީއަށް ހަރުގެ ހުސްކުރަން ނޯޓިސްދިނީ އެ ބިން ތަރައްގީކުރަން ވެރިފަރާތުން ބޭނުންވެގެންނެވެ.
އެ ގޭގެ ވެރިފަރާތް، ޝަފީއާ ޒުބެއިރު އަންނަނީ އެމްޑީޕީގެ ހިޔާލުތަފާތުވުމުގައި، "ފިކުރެއްގެ ދިރުން" ފެކްޝަންގައި އިސްކޮށް ހަރަކާތްތެރިވަމުންނެވެ.
އެމްޑީޕީން ބުނެފައި ވަނީ ހަރުގެ ހުސްނުކޮށް ހުރީ އެތަން ބަދަލުކުރާނެ އިތުރު ތަނެއް އަދި ނުލިބިގެން ކަމަށެވެ. ތަނެއް ލިބެންދެން އެތަނުގައި ތިބެވޭނެ ގޮތް ހަދައިދޭން ގޭގެ ވެރިފަރާތުގައި އެދުނު ކަމަށް އެ ޕާޓީން ބުންޏެވެ.
އެ ޕާޓީން ބުނި ގޮތުގައި، އެ ބިމުގައި ހަރުގެ ހިންގަން ދިން އެއްބަސްވުމުގެ މުއްދަތު ހަމަވެފައި ވިޔަސް، އެތަން ހުސްކުރަން ވެރިފަރާތުން އެންގީ ސެޕްޓެމްބަރު 9 ގައި ބާއްވާ މި އަހަރުގެ ރިޔާސީ އިންތިޚާބު ނިމެންދެން އެތަނުގައި ތިބެވޭނެ ކަމަށް ބުނުމަށް ފަހު އެވެ.
