މެދު ހެންވޭރު ދާއިރާގެ މެމްބަރު އަލީ އާޒިމްއަކީ އެމްޑީޕީގެ މެމްބަރެއް ނޫން ކަަމަށް އިލެކްޝަންސް ކޮމިޝަން (އީސީ)ން ނިންމައިފިއެވެ.
އެމްޑީޕީގެ ދަފްތަރުން އާޒިމުގެ ނަން އުނިކުރުމަށް އެ ޕާޓީން ހުށަހެޅުމާ ގުޅިގެން އިއްޔެގެ ވަގުތެއްގައި އާޒިމުގެ ނަން އެމްޑީޕީގެ ދަފްތަރުން އުނިކޮށްފައިވާ ކަމަށް ކޮމިޝަނުން ޔަގީންކޮށްދެއެވެ.
އެމްޑީޕީގެ ދަފްތަރުން އާޒިމްގެ ނަން އުނިކުރީ، އޭނާ ވަކިކުރި ކަން އީސީއަށް އެ ޕާޓީން އެންގުމުންނެވެ. އާޒިމް ވަކިކުރީ، އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމުގެ މައްސަލާގައި ސޮއިކުރެއްވުމާއި ޗާގޮސް މައްސަލާގައި އިދިކޮޅު ފަރާތްތަކުން ބޭއްވި ޕްރެސް ކޮންފަރެންސްގައި ބައިވެރިވެވަޑައިގަތް މައްސަލައިގައެވެ.
އާޒިމް ވަކިވެފައިވާ ކަން އީސީން ރައްޔިތުންގެ މަޖިލީހަށް އެންގުމުން ތަޅުމުގައި އެކަން އިއުލާންކުރުމާ އެކު އޭނާ ވާނީ އަމިއްލަ މެމްބަރަކަށެވެ. އޭނާއަށް ފިޔަވަޅު އަޅައިދޭން ޕާޓީގައި އެދުނީ އެމްޑީޕީގެ ޕާލަމަންޓްރީ ގްރޫޕުންނެވެ.
އަލީ އާޒިމް އެމްޑީޕީން ވަކިކުރަން ނިންމާފައިވަނީ އެ ޕާޓީގެ ފިޔަވަޅު އަޅާ ކޮމިޓީއަށް ޕާޓީގެ ޕާލަމެންޓަރީ ގްރޫޕުގެ ފަރާތުން ހުށަހެޅި މައްސަލައެއް ބެލުމަށްފަހުއެވެ. ޕީޖީ ގްރޫޕުން ހުށަހެޅި މައްސަލައިގައި ބުނެފައިވަނީ އާޒިމް އެމްޑީޕީގެ މެމްބަރެއްގެ ގޮތުގައި ހުންނަވައިގެން ޕާޓީގެ އަަސާސީ ޤަވާއިދާއި ހިލާފަށް ކުރައްވާފައިވާ ކަންތައްތަކެއް ފާހަގަވެފައިވާތީ، އެކަންކަން ބެލުމަށްފަހު ފިޔަވަޅު އަޅައިދިނުމަށެވެ.
މިމައްސަލާގައި އާޒިމްއަށް އެމްޑީޕީގެ އިސްތިއުނާފް ކޮމެޓީގައި އިސްތިއުނާފް ކުރުމުގެ ފުރުސަތު އޮންނާނެއެވެ. އަދި އިސްތިއުނާފް ކޮމެޓީގެ ނިންމުމާއިމެދު ހިތްހަމަ ނުޖެހޭ ކަމުގައިވާނަމަ، އެނިންމުން ސިވިލްކޯޓަށް ހުށަހަޅުއްވައިގެން ކުރިއަށް ގެންދިއުމުގެ ފުރުސަތުވެސް އޮންނާނެއެވެ.
މި މައްސަލައިގައި އެމްޑީޕީގެ ފިޔަވަޅު އަޅާ ކޮމިޓީން ނިންމާފައިވަނީ އާޒިމް އެމްޑީޕީގެ މެމްބަރުކަމުން 1 އަހަރު ދުވަހުގެ މުއްދަތަށް ވަކިކުރުމަށެވެ. އަދި 1 އަހަރު ދުވަހުގެ މުއްދަތަކަށްފަހު ޕާޓީއަށް އަލުން ވަދެވޭނީވެސް 100 މީހުންގެ ފޯމް ހުށަހެޅުމުންކަމަށްވެސް ކޮމިޓީގެ ނިންމުމުގައިވެއެވެ. މީގެއިތުރުން ކުރިއަށް އޮތް 5 އަހަރު ދުވަހުގެ ތެރޭގައި ޕާޓީގެ އެެތެރޭގެ މަޤާމަކަށްވެސް، އަދި ޕާޓީގެ އެއްވެސް ޕްރައިމަރީއެއްގައި އާޒިމްއަށް ބައިވެރިނުވެވޭނެކަމަށްވެސް ވަނީ ކަނޑައަޅާފައެވެ.
އާޒިމްގެ އިތުރުން، އެމްޑީޕީގެ ވިޕްލައިނާ ޚިލާފުވި މެމްބަރުންތަކަކަށް ވެސް ޕާޓީން ވަކިކުރާނެ ކަމުގެ ފަހު އިންޒާރު ފިޔަވަޅު އަޅާ ކޮމިޓީން ވަނީ ދީފައެވެ.
