އެކްސްޕޯޓު އިމްޕޯޓުން ފާއިތުވި އެޕްރިލްމަހު ރާއްޖެއަށް ލިބުނު އާމްދަނީ ދަށަށް ހިގައްޖެއެވެ.
ކަސްޓަމްއިން އާންމު ކޮށްފައިވާ މައުލޫމާތަށް ބަލާއިރު، ފާއިތުވެދިޔަ އަހަރުގެ އެޕްރިލްމަހު ރާއްޖެއަށް 4.7 ބިލިއަން ރުފިޔާގެ މުދާ އެތެރެކޮށްފައިވާއިރު، މިއަހަރުގެ އެޕްރިލްމަހު ރާއްޖެއަށް އެތެރެ ކޮށްފައިވަނީ 4.5 ބިލިއަން ރުފިޔާގެ މުދަލެވެ.
ކަސްޓަމްސްއިން ބުނެފައިވަނީ އޭޕްރިލް މަހު ރާއްޖެއަށް އިމްޕޯޓް ކުރި މުދަލުގެ ސީއައިއެފް އަގު 2022 ވަނަ އަހަރުގެ އޭޕްރިލް މަހާ އަޅާބަލާއިރު 4 އިންސައްތަ ދަށަށް ގޮސްފައިވާކަމުގައެވެ.
ފާއިތުވި އެޕްރިލްމަހު ދައުލަތަށް ލިބު އާމްދަނީއަށް ބަލާއިރު، މިއަދު 2022 ވަނަ އަހަރުގެ އެޕްރިލްމަހާ އަޅާބަލާއިރު ވަނީ 16 އިންސައްތަ ދަށަށް ގޮސްފައެވެ. މިގޮތުން ފާއިތުވި އަހަރުގެ އެޕްރިލްމަހު 361 މިލިއަން ފުރިޔާ ދައުލަތަށް ލިބިފައިވާއިރު، މިއަހަރުގެ އެޕްރިލްމަހު ދައުލަތަށް ލިބުނު އާމްދަނީގެ މިންވަރަކީ 305 މިލިއަން ރުފިޔާއެވެ.
ކަސްޓަމްސްއިން އާންމު ކޮށްފައިވާ މައުލޫމާތަށް ބަލާއިރު، ފާއިތުވި އެޕްރިލްމަހު ރާއްޖެއަށް އެންމެ ގިނައިން މުދާ އެތެރެ ކޮށްފައިވަނީ އިންޑިއާ، އޮމާން ، ޔޫއޭއީ، ޗައިނާ އަދި ސިންގަޕޯއިންނެވެ. މިގޮތުން އިންޑިއާއިން 757 މިލިއަން ރުފިޔާގެ މުދާ އެތެރެ ކޮށްފައިވާއިރު، އޮމާން އިން 707 މިލިއަން ރުފިޔާގެ މުދާ އެތެރެ ކޮށްފައި ވެއެވެ.
ޗައިނާއިން 520 މިލިއަން ރުފިޔާގެ މުދާ އެތެރެ ކޮށްފައިވާއިރު، ފާއިތުވި އެޕްރިލްމަހު ސިންގަޕޯރއިން 467 މިލިއަން ރުފިޔާގެ މުދާ ރާއްޖެއަށް އެތެރެ ކޮށްފައެވެ.
