މި ސަރުކާރުގެ ފެނަކަ ކޯޕަރޭޝަންގެ އެމްޑީކަމުގެ މަގާމުގައި ހުންނެވި މުހައްމަދު ސައީދަކީ ރައީސަށާއި ސަރުކާރަށް އޮތް ބޮޑު ލަދެއް ކަމުގައި އެސްޓީއޯގެ ކުރީގެ އެމްޑީ ހަސަން މުޢުނީ ވިދާޅުވެއްޖެއެވެ.
މުޢުނީއަށް ރައްދުވާގޮތަށް، އޮންލައިން ނޫހަކަށް މައުލޫމާތު ދެއްވަމުން ސައީދު ދައްކަވާފައިވާ ވާހަކަތަކަށް ރައްދުދެއްވާ ކުރެއްވި ޓުވީޓުތަކެއްގައި މުޢުނީ ވިދާޅުވެފައިވަނީ މި ސަރުކާރު ވެރިކަމަށް އައުމުގެ ކުރިން އެންމެވެސް ދެއްކީ ކުރީގެ ސަރުކާރުގެ ކޮރަޕްޝަންގެ ވާހަކަތައް ކަމަށާއި، އެހެންނަމަވެސް މިހާރު "ޒީރޯ ކޮރަޕްޝަން"ގެ ވާހަކަތައް ދެއްކެން ނެތް ހަގީގީ ސަބަބަކީ ފެނެކަ ކޯޕަރޭޝަންގެ އެމްޑީ ސައީދު ކަމުގައެވެ.
އަދި ކުންފުނިތައް ހިންގުމުގެ ވާހަކަ ސައީދު ދައްކަވާއިރު، އޭނާ މީގެ ކުރިން ސަރުކާރުގެ ކުންފުނިތަކެއްގައި މަސައްކަތް ކުރައްވާފައިވޭތޯ އާއި، ކުރިން މަސައްކަތް ކުރި އަމިއްލަ ކުންފުނިތަކުން އޭނާ ވަކިކޮށްފައިވަނީވެސް ކޮރަޕްޝަންގެ ތުހުމަތުތަކާއެކު ނޫންތޯވެސް މުއޫނީވަނީ ސުވާލު ކުރައްވާފައެވެ.
މުޢުނީގެ ޓުވީޓުގައި ވިދާޅުވެފައިވަނީ، އިންތިޚާބުތަކާއި ދިމާކޮށް ކޮންމެ ފަހަރަކުވެސް 30، 40 ވަޒީފާތައް ފެނަކައިން ދީގެން ރައީސް "އަތްދަށު" ލާފައި ހުންނާނެކަމަށް ސައީދު ރައްޓެހިންގެ ގާތު ވާހަކަ ދައްކާކަމުގައެވެ. އަދި އެކަން ކުރެވޭނެ މީހަކަށް ހަމައެކަނި ހުރީވެސް، ރައީސް ކެމްޕޭނަށް ފަންޑު ރައިސް ކޮށްދޭ މީހަކީވެސް "ތިމަންނާކަމަށް" ބުނެ ސައީދު ރައްޓެހިން ގާތު ވާހަކަ ދައްކާކަމަށްވެސް މުއުނީގެ ޓުވީޓިގައި ވިދާޅުވެފައި ވެއެވެ.
ސައީދަށް ރައްދުދީ މުޢުނީ ކުރެއްވި ޓުވީޓުތަކުގައި އިތުރަށް ވިދާޅުވެފައިވަނީ ކޮރަޕްޝަންގެ މައްސަލަތަކުގައި ރައީސް ސާލިހަށް "ޑިފެންސަަށް ކުޅުއްވަން" މަޖުބޫވެވަޑައިގަތީވެސް ސާއީދުގެ ސަބަބުން ކަމުގައެވެ. އޭގެ އެއް ސަބަބެއްގެ ގޮތުގައި މުޢުނީ ފާހަގަ ކުރައްވާފައިވަނީ ސައީދަށް ތުހުމަތުކޮށް އޭސީސީއަށް ހުށަހެޅި ކޮރަޕްޝަންގެ މައްސަލަތަށް ތަހުގީގު ކުރުމަށްފަހު ޕީޖީއަށް ފޮނުވުމުގެ ބަދަލުގައި، ސައީދު ޑިމާންޑް ކޮށްގެން، އެސީސީގެ އުސޫލުތަކާވެސް ޚިލާފަށް، ރައީސަށް ފޮނުވި ފޮނުވުމެވެ.
މުޢުނީ އިތުރަށް ވިދާޅުވެފައިވަނީ ސައީދުވެ ވާހަކަ ސޯޝަލް މީޑިއާގައި ދައްކަައިގެން އޭނާ ވަޒީފާއިން ވަކި ކޮށްފިނަމަ ސައީދަކީ މިސަރުކާރުގައި ވަރަށް ބާރުހަދަ މީހެއްކަމުގައި ގަބޫލުރައްވާނޭކަމުގައެވެ. އެހެންނަމަވެސް އެ ވާހަކަތައް ދެއްކެވުން ހުއްޓަވާ ނުލައްވާނޭކަމަށް ވިދާޅުވަމުން މުއުނީ ވިދާޅުވެފައިވަނީ މި ސަރުކާރުގައި ރައީސް ސާލިހަށް އެންމެ ބޮޑު ގެއްލުމެއް ދިން އެއް ފަރާތަކީ ސައީދު ކަމުގައެވެ.
އަދި ސަރުކާރުގެ ތަރުޖަމާނަކުވެސް ހުރުމާއެކު، ވާހަކަ ދެއްކުން ހުއްޓާލުމަށްފަހު އުފެއްދުންތެރި މަސައްކަތެއް ކުރުމަށް މުޢުނީވަނީ ސައީދަށް ގޮވާލައްވާފައެވެ. ހަމަ އެއާއެކު ފެނަކައިން ދޭންޖެހިފައި ހުރި ފައިސާ ނުލިބިގެން ކުދި އަދި މެދުފަންތީގެ ވިޔަފާރިތައް ބަނގުރޫޓުވަމުން ދާކަން ފާހަގަކުރައްވަމުން މުއުނީވަނީ އެފައިސާތައްވެސް ކުންފުނިތަކަށް ދޫކުރުމަށްވެސް ގޮވާލައްވާފައެވެ.
މުއުނީގެ ޓުވީޓުގައި ވަނީ ސައީދަށް ތުހުމަތުކޮށް އޭސީސީއަށް މިހާރުވެސް ހުށަހެޅިފައިވާ ގިނަ މައްސަލަތަކާއި ގުޅުންހުރި ރިޕޯޓަތަކުގެ ސްކްރީން ޝޮޓްތައް ހިމަނުއްވާފައެވެ.
ފެނަކަ ކުންފުންޏަކީ ރައީސް ސާލިހުގެ ދައުރުގައި ކޮރަޕްޝަންގެ އެންމެ ބޮޑެތި ތުހުމަތު ކުރެވެމުންދާ އެއް ކުންފުންޏެވެ. އަދި އެކުންފުނީގެ އެމްޑީ ސައީދުއާއި ގުޅުންހުރި، ކޮރަޕްޝަނަށް ތުހުމަތު ކުރެވޭ ގިނަ މައްސަލަތަކެއް މިހާރުވެސް އޭސީސީގައި ދަނީ ކުރިއަށެވެ. ހަމައެއާއެކު އެކުންފުނިން ރާއްޖޭގެ ކުދި އަދި މެދުފަންތީގެ ގިނަ ކުންފުނިތަކަށް ދައްކާންޖެހޭ ފައިސާގެ އަދަދު 3 ބިލިއަނާއި ގާތްކުރާއިރު، މި ފައިސާ ނުލިބިގެން ފާއިތުވެދިޔަ ތަނުގައި މި ކުންފުންޏާއި ދެކޮޅަށް ބައެއް ވިޔަފާރިވެރިން މުޒާހިރާވެސް ކޮށްފައި ވެއެވެ.
އޭގެ އިތުރުން ފެނަކަ ކުންފުނީގެ އެތެރޭގައި ފާއިތުވި 4 ވަރަކަށް އަހަރު ތެރޭގައި ހިނގާފައިވާ ކޮރަޕްޝަންގެ ބޮޑެތި މައްސަލަތައްވެސް ދަނީ ފެންމަތި ވަމުންނެވެ. އެހެންނަނަމަވެސް މިމައްސަލަތަކާއި ގުޅޭގޮތުން އެކަށީގެންވާ ފިޔަވަޅުތަކެއް ފާއިތުވި ތަނުގައި އަޅާފައި ނުވާކަން ފާހަގަ ކޮށްލެވެއެވެ.
