މަޖިލީހުގެ ރިޔާސަތުގައި އިންނެވިހާ ދުވަހަކު މަޖިލީހުގެ އެކި ކޮމެޓީތަކުގައި ތިއްބެވި އެއްވެސް މެމްބަރެއްގެ ރުހުމަކާއި ނުލައި އެމެމްބަރަކު ކޮމެޓީތަކުން ވަކި ނުކުރެވޭނެކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ޕާލިމަންޓަރީ ގުރޫޕުގެ ލީޑަރު، މުހައްމަދު އަސްލަމް ސޮއި ކުރައްވައި މަޖިލީހުގެ ރައީސް، މުހައްމަދު ނަޝީދަށް އިއްޔެ ފޮނުވި ސިޓީއެއްގައި ވަނީ އަށް ކޮމިޓީއެއްގައި އެ ޕާޓީ ތަމްސީލު ކުރައްވާ މެމްބަރުންނަށް ބަދަލުތަކެއް ގެނެސްދިނުމަށް އެދިފައެވެ. އެކަމާ ގުޅޭ ގޮތުން ރައްޔިތުންގެ މަޖިލީހުގެ މެމްބަރުން ހިމެނޭ ރަސްމީ ވަޓްސްއެޕް ގްރޫޕަށް ނަޝީދު ފޮނުއްވި ޓެކްސްޓް މެސެޖެއްގައި ވަނީ މަޖިލީހުގެ ގަވާއިދުގައިވާ ގޮތުގެ މަތީން މަޖިލީހުގެ ކޮމެޓީތަކުގައި ތިއްބެވި މެމްބަރުންގެ ރުހުމާއި ނުލައި އަދި ރިޔާސަތަށް ނޭގި އެއްވެސް މެމްބަރަކު ވަކިކުރަން ޖާގަ ނުދޭނެކަމަށެވެ.
މަޖިލީހުގެ ރިޔާސަތުގައި އަޅުގަނޑު އިންނަ ހިނދަކު މެމްބަރުންގެ ރުހުމާ ނުލައި މަޖިލީހުގެ އެއްވެސް ކޮމިޓީއަކުން އެއްވެސް މެމްބަރަކު ވަކިނުކުރެވޭނެ. މަޖިލީހަކީ ރައީސުލްޖުމްހޫރިއްޔާ އެމްޑީޕީގެ އިސް ލީޑަރު، ރައީސް އިބްރާހީމް މުހައްމަދު ސޯލިހު އެދިވަޑައިގަންނަވާ ގޮތަކަށް ހިންގާން އޮންނަ ތަނެއް ނޫން.
– ނަޝީދު އަސްލަމަށް ފޮނުވި ސިޓީގައި ވިދާޅުވިއެވެ.
ނަޝީދުގެ އެ މެސެޖަށް އެމްޑީޕީގެ ޕާލިމެންޓްރީ ގްރޫޕްގެ ޗީފް ވިޕް އަދި ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ މެމްބަރު އަބްދުލްމުޣުނީ ރައްދު ދެއްވައި ޓެކްސްޓެއް ކުރެއްވިއެވެ. އޭނާ ވިދާޅުވީ "މަޖިލީހަކީ އެ މަޖިލީހުގެ ރިޔާސަތުން ވެސް ބޭނުންވާ ގޮތަކަށް ހިންގާން އޮތް ތަނެއް ނޫން" ކަމަށެވެ.
މަޖިލީހުގެ ގަވާއިދުގެ 136 ގެ (ށ)ގައި ބުނެފައިވަނީ ސިޔާސީ ޕާޓީއަކުން ބޭނުން ވަނީ މަޖިލީހުގެ ދާއިމީ ކޮމިޓީއެއްގައި ހިމެނޭ މެންބަރެއްގެ ބަދަލުގައި އެ ޕާޓީގެ އެހެން މެންބަރަކު އައްޔަން ކުރަން ކަމުގައިވާނަމަ، އެ ޕާޓީގެ ޕާލިމެންޓްރީ ގްރޫޕުން އެ ކަން ލިޔުމުން މަޖިލީހުގެ ރައީސަށް އަންގަން ވާނެކަމަށެވެ.
އަދި އެ ލިޔުން މަޖިލީހުގެ ރައީސަށް ލިބުމުން، އެ މެންބަރުގެ އިއުތިރާޒެއް ނެތް ކަން މަޖިލީހުގެ އިދާރާއިން ކަށަވަރު ކުރުމަށް ފަހު މަޖިލީހުގައި ހިމެނޭ ސިޔާސީ ޕާޓީތަކުގެ ޕާލިމެންޓްރީ ގްރޫޕްގެ ލީޑަރުންނަށް މަޖިލީހުގެ ރައީސް އެ ކަން އަންގަން ވާނެކަމަށެވެ.
ނަޝީދުގެ ފެކްޝަނަށް ނިސްބަތްވާ މެންބަރުން މަޖިލީހުގައި އާއްމުކޮށް މަސައްކަތެއް ކުރަން ނުޖެހޭ، އަދި މާބޮޑު ބާރެއް ވެސް ނޯންނަ ކޮމެޓީތަކަށް ބަދަލު ކުރަން އަސްލަމް ވަނީ އެދިވަޑައިގެންފައެވެ.
އަސްލަމް ހުށަހެޅި ބަދަލުތަކުގެ ތެރޭގައި ހާރިޖީ ގުޅުންތަކުގެ ކޮމިޓީގައި ހިމެނިވަޑައިގަންނަވާ ވިލުފުށި ދާއިރާގެ މެމްބަރު، ހަސަން އަފީފުގެ ކޮމެޓީން ވަކިކުރުމަށާއި އާންމު ކޮމިޓީއަށް ކުޅުދުއްފުށި އުތުރު ދާއިރާގެ މެމްބަރު، ޔާސިރު އަބްދުއްލަތީފް އައްޔަން ކުރުމަށާއި ޕެޓިޝަން ކޮމިޓީއަށް ވިލުފުށި ދާއިރާގެ މެމްބަރު، ހަސަން އަފީފާއި ހެންވޭރު ހުޅަނގު ދާއިރާގެ މެމްބަރު، ހަސަން ލަތީފު އައްޔަން ކުރުން ހިމެނެއެވެ.
ސްޓޭޓް އޯންޑު އެންޓަޕުރައިޒަސް ކޮމިޓީގައި ހިމެނިވަޑައިގަންނަވާ ހުޅުދޫ ދާއިރާގެ މެމްބަރު، އިލްޔާސް ލަބީބު ކޮމެޓީން ވަކިކުރުމަށާއި ޖުޑިޝަރީ ކޮމިޓީގައި ހިމެނިވަޑައިގަންނަވާ ހެންވޭރު ހުޅަނގު ދާއިރާގެ ދާއިރާގެ މެމްބަރު، ހަސަން ލަތީފު ކޮމެޓީން ވަކިކޮށް އިހަވަންދޫ ދާއިރާގެ މެމްބަރު، މުހައްމަދު ޝިފާއު އަދި މާފަންނު އުތުރު ދާއިރާގެ މެމްބަރު، އިމްތިޔާޒް ފަހުމީ ކޮމެޓީން ވަކިކޮށް ކޮމިޓީގައި މަރަދޫ ދާއިރާގެ މެމްބަރު، އިބްރާހިމް ޝަރީފް ހިމެނުމަށް ވެސް ވަނީ ހުށަހަޅާފައެވެ.
އޭގެ އިތުރުން އިޖްތިމާއީ ކޮމިޓީއަށް މާފަންނު އުތުރު ދާއިރާގެ މެމްބަރު، އިމްތިޔާޒް ފަހުމީ އައްޔަން ކުރުމަށާއި ސަލާމަތީ ހިދުމަތްތަކާ ބެހޭ ކޮމިޓީން ހުޅުދޫ ދާއިރާގެ މެމްބަރު، އިލްޔާސް ލަބީބު އާއި މެދު ހެންވޭރު ދާއިރާގެ މެމްބަރު، އަލީ އާޒިމް ވަކިކުރަން ވެސް އަސްލަމް ވަނީ ހުށަހަޅާފައެވެ.
One Response
ކިއްސައްދެވި މަލިކަށް އެރިފަތިއިނީ! ދެންނުފައިބާތި! އެކޮޅުކޮޅުންއޮވެބަލަ!