މާލޭ ގެއެއްގައި އޮސްޓްރިޗެއް ގެންގުޅޭ ފޮޓޮއެއް ސޯޝަލް މީޑިއާގަައި އާންމުވުމާއެކު، އެ ގޭގައި އޮސްޓްރިޗް ގެންގުޅޭ މައްސަލަ ފިޝަރީޒް މިނިސްޓްރީން ބަލަން ފަށައިފިއެވެ.

ފިޝަރީޒް މިނިސްޓްރީގެ އޮފިޝަލަކު ވިދާޅުވީ ރަސްމީކޮށް އެކަން މިނިސްޓްރީއަށް ހުށަހަޅައިފައި ނުވި ނަމަވެސް ސޯޝަލް މީޑިއާގައި ދައުރުވާ ފޮޓޯއިން އެ ކަން ސަމާލުކަމަށް އައިސްފައިވާކަމަށެވެ. އޭނާ ވިދާޅުވީ ރާއްޖޭގައި އޮސްޓްރިޗު ގެންގުޅުމުގެ ހުއްދަ އެ މިނިސްޓްރީން ދޫކޮށްފައި އޮންނަ ކަމަށެވެ. ނަމަވެސް އެއީ ޕޯލްޓްރީ ފާމްތަކުގައި އެކަނި ކަމަށް އޭނާ ވިދާޅުވިއެވެ.

މާލޭގައި މި ދޫނި ގެންގުޅޭކަން އިނގުނީ ސޯޝަލް މީޑިއާގައި އާންމުވެފައިވާ ފޮޮޓޯއަކުންނެވެ. އެ ފޮޓޯއިން ފެންނަ ގޮތުން އެ ދޫނި މިހާރު ވަނީ ގާތްގަނޑަކަށް ފަސް ފޫޓަށް އިސްކޮޅު ދެމިލާފަ އެވެ. އަދި, އެ ގެންގުޅޭ ކަމަށް ބެލެވޭ މީހާވެސް އެ ފޮޓޯއިން ފެނެއެވެ.

ފޮޓޯއިން ފެންނަ އޮސްޓްރިޗު ރާއްޖެއަށް އެތެރެކުރަން ހުއްދަ ވެސް ވަަނީ ދޫކޮށްފައެވެ. އެ އޮސްޓްރިޗުގައި ފަސްފޫޓު ހުންނާނެކަމަށް ބެލެވެއެވެ. ފޮޓޯއިން ފެންނަނީ މީހަކު އެ އޮސްޓްރިޗު ކައިރީ ހުއްޓި އޭގައި އަތް އަޅައިގެން ހުންނަ މަންޒަރެވެ.

އީޕީއޭގެ ޑިރެކްޓަރ ޖެނެރަލް ނައީމް ވިދާޅުވީ މި މާހައުލުގައި ނޫޅޭ ޖަނަވާރު, ދޫނި ފަދަ ތަކެތި ގެނައުމަކީ ދިވެހި މާހައުލުގެ އެހެން ދިރުންތަކަށް ގެއްލުން ލިބޭނެ ކަމެއް ކަމަށާއި ހުއްދަ ނަގައިގެން ނަމަވެސް އެފަދަ ކަންކަން ކުރުމަކީ ރަނގަޅު ކަމެއް ނޫން ކަމަށެވެ.